UDUTERONOMI 32

₁Lalelani, nina mazulu ngikhulume,

nomhlaba uzwe amezwi womlomami.

₂Ifundiswami ayehle njengezulu,

ikulumami iwe njengombethe,

iwuluke njengemvula phezu kwehlungu

nanjengomfefezwana phezu kweemila.

₃Ngambala ngizakumemezela ibizo lakaSomnini;

nje-ke, dumisani ubukhulu bakaZimethu!

₄Ulidwala, umsebenzakhe uphelele,

iye, zoke iindlela zakhe zilungile.

UnguZimu wokwethembeka,

uZimu onganasiphambeko,

umsulwa begodu uneqiniso.

₅Kodwana abantwabakhe baziphethe ngameswe,

kusukela kwakade basizukulwana

esiphambeneko nesikhohlakeleko.

₆Leyo yindlela enithokoza ngayo uSomnini na?

Nibabantu abaziindlhadlha nabanganangqondo!

USomnini akasiyihlo owanidalako na?

Iye, nguye owanenza bewaninzinzisa!

₇Khumbulani isikhathi esadlulako,

niyelele okwenzeka ngesizukulwana ngesizukulwana;

nibuze aboyihlo banikhombise,

abaphathi benu, banidembele.

₈Lokha uZimu ongoPhezulu anikela izizwe ilifa lazo,

nalokha nahlukanisa amadodana wabantu,

wajamisa imikhawulo yabantu

ukuya ngesibalo samadodana kaZimu.

₉Kodwana uSomnini wathatha abantu bakhe njengesabelo sakhe,

iye, uJakopo waba lilifa lakhe.

₁₀Wamfumana enarheni elirhalawumba,

endaweni engahlalwa muntu,

emajukujukwini anabaphaphi;

wamgona, wamtjheja,

wambabalela njengehlavu yelihlo lakhe.

₁₁Njengekhozi elikhanukeza idzinyani lalo ukuphapha,

liphuphuruze ngehla kwalo,

livule amaphikwalo, lilibambe,

lilithwale ngawo,

₁₂ngokunjalo noSomnini nguye kwaphela owamrholako;

kungekho singazimu hlanu kwakhe.

₁₃Wamkhweza eendaweni eziphakemeko zenarha,

wagoma iinthelo zommango;

wamenza wazitika ngeliju edwaleni

namafutha we-oliva elitjeni legwari.

₁₄Wazitika ngamakghamatha weenkomo

nebisi leembuzi

kanye namafutha weemvana;

wazitika ngamaqama weBhatjhani neembuzi

kanye namafutha wehliziyo yekoroyi;

wazitika ngomhluzi wamadiribe,

iye, wasela iwayini elisabilako.

₁₅Kodwana uJetjhuruni wanona bewatjakadula,

iye, wanona, waba sibhumbudu bewaragalala.

Watjhiya uZimu owamdalako,

wanyefula iDwala lesindiswakhe.

₁₆Abantu bakaZimu bamvusela isikhwele

ngabosingazimu abatjhili,

bamthukuthelisa ngemifanekiso enyenyisako.

₁₇Bahlabela imimoya emimbi,

izinto ezibosingazimu,

okubozinyana abangazange babazi,

izinto ezifike izolo,

naboyihlo abangazange bazazi.

₁₈Ngitjho neDwala elakubelethako walikhohlwa,

walibala uZimu owezwa ubuhlungu ngawe.

₁₉Lokha uSomnini nabona lokho,

wathukuthela khulu

ngebanga lokudabukiswa madodana namadodakazakhe

₂₀bewathi: “Ngizokufihla ubuso bami kiwo,

khengibone bonyana azokuphelelaphi

ngombana asizukulwana esikhohlakeleko,

abantwana abangathembekiko:

₂₁Bangivusela isikhwele ngento engasinguzimu,

bangithukuthelisa ngezinto ezingatjho litho.

Nje-ke, mina ngizabavusela isikhwele ngesingasizwe,

ngibathukuthelise ngeendlhayela zabantu.

₂₂Lokha itukuthelwami nayivutha umlilo

ubabule bekube sekuzikeni kwendawo yabafileko;

uzakuqothula iphasi nesivuno salo,

ukhothe isisekelo seentaba.

₂₃Ngizabadindela ngamatshwenyeko,

ngibarhululele ngemisubelami.

₂₄Indlala izabaqoba,

badliwe matshwenyeko nobhubhani wesifo.

Ngizabanikelela ngamazinyo weembandana

nangesihlungu seenrhurhubi.

₂₅Endleleni isabula izabathathela abantwana,

emizinabo kubuse ukwesaba.

Kuzakubhubha amasokana kanye namatlawu,

amasana kanye nabathukgheleko.

₂₆Bengithe ngizabathanyela,

ngisuse ukukhunjulwa kwabo ebantwini,

₂₇kodwana azange ngifune ukuzwa isiphoqo sesitha sabo:

Abajamelani babo bebazazitjhaya ngamanga,

bathi, ‘Izandla zethu ngizo ezihlulileko;

akusinguSomnini owenze koke lokhu.’ ”

₂₈Basisizwe esinganatlha,

abanawo umbono phakathi kwabo.

₂₉Nangathana bebahlakaniphile,

bebazakghona ukuzwisisa lokhu,

bahlole bona siyini isiphetho sabo.

₃₀Umuntu munye angeze agijimisa abaziinkulungwana

nababili angeze balwise itjhumi leenkulungwana,

ngaphandle kwanange iDwala labo libathengisile;

iye, iKosabo ibalahlile!

₃₁Idwala abalithembako alifani neDwala lethu

nezitha zethu kumele zikubone lokho.

“Amadiribabo abuya eSodoma

esidiribeni seGomora.

Amadiribabo anesihlungu

nesitjhutha sakhona simunyu.

₃₃Iwayini abazolisela lisihlungu seenyoka,

isihlungu esibulalako samabululu.

₃₄Lokhu kubulungwe kimi,

kuvalelwe ngekumbenami yamagugu.

₃₅Ukubuyiselela nokuhlomulisa kungokwami,

ngesikhathi sakhona iinyawo zabo zizakutjhelela.

Ngambala ilanga labo lehlekelele selitjhidele,

iye, ilangelo libarhabile.”

₃₆Iye, uSomnini uzokumela abantu bakhe

abe nesirhawu eencekwini zakhe.

Lokha nabona bonyana amandlazo aphelile

sekusele bona zinyamalale zoke,

₃₇uzakuthi: “Alo, baphi-ke abozinyana babo

abalidwala ababalekela kilo,

₃₈abozinyana abagoma amafutha wemihlabelwabo

basele iwayini lomphahlwabo na?

Abavele phela banisize!

Baninikele umthunzi!

₃₉Qalani-ke gadesi, mina ngingimi kwaphela;

akunaZimu ngaphandle kwami!

Mina ngiyabulala, ngibuye ngiphilise,

nangilimazileko, ngibuye ngipholise;

akakho ongasindisa esandleni sami.

₄₀Ngambala ngiphakamisela isandla sami ezulwini

ngifunge ngithi, ‘Ngokuphila kwami kwanini nanini:

₄₁Nangilola isabulami emanyazelako,

isandla sami siyibambe bona ngigwebe,

ngizazibuyiselela ezitheni zami,

ngibuyiselele kilabo abangizondako.

₄₂Ngizakucwilisa imisubelami eengazini

zababuleweko nabathunjiweko;

khibe isabulami irhiribidela inyama

yabosaziwako bezitha.’ ”

₄₃Nina zizwe, thokozisani abantu bakaSomnini

ngombana uzokubuyiselela iingazi zeenceku zakhe.

Lokha nazibuyiselela ezitheni zakhe

uzabe enzela abantu bakhe nenarhakhe itethelelo.