Iimbusiso zabagcina isivumelwano
1Nanilalela ilizwi lakaSomnini uZimenu, niyelela ukwenza yoke imiyalwakhe enginiyala ngayo namhlanje, uSomnini uZimenu uzoniphakamisa ngaphezu kwazo zoke izizwe zephasi. 2Iye, nanilalela ilizwi lakaSomnini uZimenu, zoke iimbusiswezi zizakwehlela phezu kwenu, zinembathe. 3Nizakubusiswa ngedorobheni, nibusiswe nemasimini. 4Kuzakubusiswa iimbeletho zenu, iinthelo zequlwanenu, inzalo yeenlwana zenu: Iinkomo, izimvu neembuzi zenu zizakwanda. 5Kuzakubusiswa iinqwebu zenu nezitja zenu zokudubela. 6Nizakubusiswa naningenako nalokha naniphumako. 7USomnini uzakwenza bonyana izitha zenu ezinivukelako zihlulwe phambi kwenu, zizanisahlela ngandlelanye, zibaleke phambi kwenu ngeendlela ezilikhomba. 8USomnini uzakuvulela iimbusiso phezu kweenlulu zenu nakikho koke enikwenzako. Iye, uzanibusisa enarheni aninikela yona.
9USomnini uzanijamisa njengesizwe esicwengileko kuye njengombana afunga kini, iye, nanigcina imiyalo kaSomnini uZimenu benikhambe eendleleni zakhe. 10Boke abantu bephasi bazakubona bonyana nibizwa ngebizo lakaSomnini, yeke bazanesaba. 11USomnini uzanandisela ipumelelo: Nizakuba nabantwana abanengi, ifuyo enengi neenthelo ezinengi zequlwani enarheni ayifungele ukuyinikela aboyihlomkhulu. 12USomnini uzanivulela umnonwakhe omuhle, okumazulu, kobana aniphe izulu enarhenenu ngesikhathi sakhona abe abusise woke umsebenzi wezandla zenu. Nizakuboleka izizwe ezinengi kodwana nina ningaboleki litho kizo. 13USomnini uzanenza ihloko, ningabi msila. Nizakukhuphuka njalo ningehli. Lokho kuzakwenzeka kwaphela nanilalela imiyalo kaSomnini uZimenu enginiyala ngayo namhlanje kobana niyilonde beniyenze, 14nalokha naningaphambukiko emazwini enginiyala ngawo namhlanje ngokudlhemadlhema ngemva kwabosingazimu nibalotjhe.
Amanikelela wabangagcini isivumelwano
15Naningalaleli ilizwi lakaSomnini uZimenu namkha ningatjheji ukwenza yoke imiyalwakhe neemiso zakhe enginiyale ngazo namhlanje, yeke woke amanikelela la azakwehlela phezu kwenu anembathe. 16Nizakunikelelwa edorobheni, ninikelelwe nemasimini. 17Kuzakunikelelwa iinqwebu zenu, kunikelelwe nezitja zenu zokudubela. 18Kuzakunikelelwa iimbeletho zenu, iinthelo zequlwanenu, iinkomo, izimvu neembuzi zenu.
19Nizakunikelelwa naningenako, ninikelelwe nalokha naniphumako. 20USomnini uzanithumelela iinthuweleliso, ihlangahlangano nokungezwani kikho koke enikwenzako kufikela lapha nirhayileka khona. Nizakuphela msinyana ngebanga lezenzo zenu ezimbi nanimhlubukako. 21USomnini uzakubangela bonyana amatshwenyeko aninamathele abe aniqotjhe enarheni eningena kiyo bonyana niyithumbe: 22Izanibetha ngesifo esiqeda amandla nangomgomani, nokutjhisa komzimba nokuhlangahlangana kwengqondo; inibethe ngesomiso, ububori nokukghora. Koke lokhu kuzaninamathela bekunibhubhise nya. 23Umkayi ngehla kwenu uzakuba yikoporo nomhlaba ngaphasi kwenu ube yisimbi. 24USomnini uzakwenza izulu enarhenenu libe lithuli neputjhana, uzakwehlela phezu kwenu avela emkayini abe anirhayile nya.
25USomnini uzanenza nihlulwe zizitha zenu, nizisahlele ngandlelanye kodwana nizakubaleka phambi kwazo ngeendlela ezilikhomba. Nizakuba sibonelo esesabekako emibusweni yoke yephasi: 26Iindumbu zenu zizakuba kugoma kwazo zoke iinyoni zomkayi neembandana zephasi. Kuzakutlhogeka umuntu wokuzethusa. 27USomnini uzanibetha ngamathumba weGibhide, iinlonda, ukubhibhidlha nangobuzikazikani besikhumba okungapholiko. 28USomnini uzanibetha ngokurhapha nangobuphofu, nihlangane iinhloko, 29nizakuphumbutha emini ka bha inga kusemnyameni njengesiphofu.
Anizukuphumelela eendleleni zenu, nizakuhlala nigandelelwe benidlelezelwe njalo, nizakutlhoga umuntu ozanisiza. 30Omunye wenu nabona intombi, omunye umuntu uzayigagadlhela. Nizakwakha iinkumba kodwana ningazihlali, nitjale isidiribe kodwana ninganandiphi neenthelo zakhona. 31Kuzakuhlatjwa iinkomo zenu niqalile, ningagomi neqatjhana lakhona. Kuthathwe abodumbana benu ngekani niqalile, bangasabuyiselwa kini. Izimvu zenu zizakunikelwa izitha zenu, kungabi nomuntu onisizako. 32Amadodana namadodakazenu azakunikelwa abanye abantu ningabi namandla wokukukhandela lokho. Kwenu kuzakuba kuhlala nigolozele ukubuya kwawo. 33Isizwe eningasaziko sizakurhiribidela iinthelo zequlwanenu nomsebenzi woke wezandla zenu. Nizakuhlala nigandelelwe njalo beniphathwe kumbi 34kufikela lapha nihlanyiswa khona ngilokho enikubonako. 35USomnini uzonibetha ngamathumba amambi nangalaphekiko emadolweni neenyonga, ehlele eenyaweni abe akhuphukele neenhloko.
36USomnini uZimu uzanithatha nekosi enizibekele yona inise esizweni eningasaziko nina naboyihlomkhulu. Lapho-ke nizakulotjha abosingazimu besigodo nebelitje. 37Nizakuba sithuko, isiga nesiphoqo phakathi kwabo boke abantu lapha uSomnini azanisa khona. 38Nizakutjala imbewu enengi emasimini, kodwana nivune idlanzana ngombana isivuno senu sizakurhiribidelwa yintethe. 39Nizakutjala isidiribe benisihlunge, kodwana anizukusela iwayini lakhona namkha nikhe amadiribe wakhona ngombana azakudliwa ziimbungu zobubori. 40Nizakuba nemithi ye-oliva esifundeni senu soke, kodwana anizozizesa ngamafutha wakhona ngombana ama-olivenu azakuthintitheka. 41Nizakubeletha amadodana namadodakazi, kodwana akazukuba ngewenu ngombana azakuthunjwa. 42Intethe izakumumela yoke imithenu neenthelo zequlwanenu. 43Isikhonzi esiphakathi kwenu sizakuphumelela sindlondlobale sibe ngehla kwenu, nina nichake nehlele phasi phasi. 44Nizakuboleka kiso, kungasaba ngiso esiboleka kini, sizakuba yihloko nina nibe msila. 45Woke amanikelela la azanehlela, anilale nje, abe anembathe kufikela lapha nirhayileka khona nya ngombana azange nilalele ilizwi lakaSomnini uZimenu, ukulonda imiyalwakhe nemithethwakhe aniyale ngayo. 46Azakuba njengesibonakaliso nesimangaliso phezu kwenu naphezu kweenzukulwana zenu nini nanini.
47Ngombana nakhu anizange nilotjhe uSomnini uZimenu ngethabo nangokuthokoza kwehliziyo ngebanga lokobana benisutha, 48ngalokho nizakusebenzela izitha zenu uSomnini azazithumela bona zijamelane nani. Zizanibulalisa ngendlala, zinibangele umrhawu, zinihlubulise nibe bhunubhunu niswele koke. USomnini uzakubeka ijogi lesimbi eentanyeni zenu abe anibhubhise nya. 49USomnini uzakuletha isizwe esizakujamelana nani esivela kude epelazwe, esizakufika inga likhozi, isizwe eningazi ilimi laso, 50isizwe esinelunya nesingekhe sarhawukela umuntu omdala namkha sibe nomusa ebantwaneni. 51Sizakufika siqothule inzalo yefuywenu neenthelo zequlwanenu kufikela lapha nirhayileka khona: Angeze sanitjhiyela ikoroyi, iwayini namkha amafutha we-oliva. Singanitjhiyeli inzalo yeenkomo, yezimvu neembuzi zenu kufikela lapha sinibhubhisa khona. 52Sizanivimbezela kiwo woke amadorobhenu enarhenenu yoke, kufikela lapha kugirika khona imithangalenu ephakamileko neqinileko enithembele kiyo. Iye, sizanivimbezela kiwo woke amadorobhenu enarhenenu yoke eniyinikelwe nguSomnini uZimenu 53benitle abantwabenu, inyama yamadodanenu namadodakazenu eniwaphiwe nguSomnini uZimenu. Lokho kuzakwenzeka esizini nebudisini enizakuhlunguphazwa ngabo zizitha zenu. 54Ngitjho nendoda ephakathi kwenu ethambileko ngombana ikhuliswe ngokutotoswa khulu, mhlokho ayizukutlhuwela umfowayo, umkayo emthanda khulu kanye nomntwanayo esele kusele yena yedwa zwi. 55Ayizukupha namunye wabo inyama yabantwabayo eyigomako ngombana kuzabe kungasenalitho layo eliseleko. Lokho kuzakwenzeka esizini nebudisini enizakuhlunguphazwa ngabo zizitha zenu kiwo woke amadorobhenu. 56Ngitjho nomfazi ophakathi kwenu othambileko nodedesa khulu, ongekhe agadanga ubunyonyo ngendlela adedesa ngayo, mhlokho angeze atlhuwela indodakhe ayithanda khulu, indodanakhe nendodakazakhe. 57Akazukubapha ingubo yomntwana ephuma hlangana nemilenzakhe nenyama yomtwanakhe ambelethako. Koke lokho uzakutlela ngemsitheleni ngebanga lokuswela kwakhe. Lokho kuzakwenzeka esizini nebudisini enizakuhlunguphazwa ngabo zizitha zenu emadorobhenenu.
58Naningaqapheli ukwenza woke amezwi womthetho lo atlolwe encwadinapha ukuze nesabe ibizo elidumileko nelesabekako lakaSomnini uZimenu, 59khona-ke uSomnini uzanehlisela nina neenzukulwana zenu amatshwenyeko eningazange kheniwabone, amatshwenyeko amakhulu nangapheliko kanye namagulo amambi angalaphekiko. 60Uzanehlisela zoke izifo zeGibhide ebenizesaba, ngithi zizaninamatha. 61Godu uzanehlisela woke amagulo namatshwenyeko angakatlolwa ngencwadini yomthetho le benirhayileke nya. 62Nizakusala niyikereketjhana phezu kobana beniliwoma njengeenkwekwezi zomkayi ngombana azange nilalele ilizwi lakaSomnini uZimenu. 63Njengombana uSomnini athabela ukunenzela okuhle abe anandise, ngokunjalo uzakuthabela ukuniqeda abe anirhayile. Nizakuqotjhwa enarheni eningena kiyo bona niyithumbe. 64USomnini uzanihlakaza hlangana nabantu boke, ukusuka egumbini elinye lephasi ukuya kelinye. Lapho nizakulotjha abosingazimu besigodo nebelitje eningabaziko nina ngitjho naboyihlomkhulu. 65Anizukufumana ukuthula hlangana nezizwezi; iye, iinyawo zenu angeze zaphumula. USomnini uzokwenza iinhliziyo zenu zithuthumele, amehlwenu afifiyele nemiphefumulwenu iphelelwe mamandla; 66ipilwenu izakulengela erharheni. Ubusuku nemini nizakuphila ngevalo ningabi nesiqiniseko ngepilwenu. 67Ngebanga lokugcwala kwevalo eenhliziyweni zenu nalokhu okuzakubonwa mamehlwenu, nizakuthi ekuseni, “Hayi, thana sele kusebusuku!” bese kuthi entambama nithi, “Hayi, thana sekusile!” 68USomnini uzanibuyisela eGibhide ngemikhumbi, ikhambo enganithembisa bona angeze nisalibona. Lapho nizazinikela ezitheni zenu njengamakhoboka namakhobokakazi, kodwana akunamuntu ozanithenga.
