UDUTERONOMI 13

₁Kungenzeka bonyana kuvuke umphorofidi phakathi kwenu, namkha umbhudangi wamabhudango anibonise itshwayo namkha isimangaliso ₂bese itshwayelo namkha isimangalisweso siyenzeka begodu ngemva kwalokho athi: “Asilandeleni abozinyana sibalotjhe.”

Nakube labo bozinyana, akusinguZimu enimaziko, ₃ningalaleli amezwi womphorofidi namkha wombhudangi loyo ngombana uSomnini uZimenu uyanizizinya ukubona bonyana nimkhathalela ngeenhliziyo zenu zoke nangomphefumulwenu woke na. ₄Nizakulandela uSomnini uZimenu kwaphela benimesabe, nilonde imiyalwakhe, nilalele ilizwi lakhe, nimlotjhe benikakarele kuye kwaphela. ₅Kodwana umphorofidi namkha umbhudangi wamabhudango loyo akabulawe ngombana unihlohlozele bona nihlubuke uSomnini uZimenu owanikhupha enarheni yeGibhide wanihlenga ekumbeni yobukhoboka. Uniyenge bona nisuke endleleni uSomnini uZimenu aniyala bona nikhambe ngayo. Ngalokho thanyelani ubumbi phakathi kwenu.

₆Nakube umfowenu, indodana kanyoko namkha indodanakho nanyana indodakazakho namkha umfazakho oyintandokazi namkha umnganakho enimamathe nelimu, ukuyenga ngasese athi: “Namba siyokulotjha abozinyana.”

Nakube labo bozinyana, akusinguZimu omaziko wena ngitjho naboyihlomkhulu ₇kodwana khibe ngomunye wabosingazimu babantu abanibhodileko nanyana bangaba seduze namkha kude nani, ukusuka egumbini lomhlaba ukuya kelinye, ₈ungaphiki naye, ungamlaleli begodu ungamtlhuweli, ungamzweli namkha umfihle. ₉Umbulale nya! Isandla sakho asibe ngesokuthoma bese kulandele zabo boke abanye abantu. ₁₀Mkhandeni ngamatje abe afe ngombana ufune ukukuyenga kobana usuke kuSomnini uZimakho owakukhupha enarheni yeGibhide, ekumbeni yobukhoboka. ₁₁Woke u-Israyeli uzakuzwa, esabe, angasenza ubuhlola obunjengalobo obenzeke phakathi kwenu.

₁₂Kungenzeka bonyana kelinye lamadorobhenu uSomnini uZimenu aninikela wona bona nihlale kiwo, ₁₃kunabaphehli benturhu abaphuma bayokuyenga abahlali bedorobhabo bathi: “Nambani siyokulotjha abozinyana.”

Nakube labo bozinyana, akusinguZimu enimaziko ₁₄khona-ke nizakubuzisisa bese niyafunisisa nikhambe nibuza ngokuzimisela. Nakube ngambala nifunyana bona isinyenyisweso senzekile phakathi kwenu, ₁₅bulalani nya abahlali bedorobhelo ngesabula, nirhayile ngokupheleleko loke idorobhelo nakho koke okukilo, ngitjho nefuyo yakhona yoke, niyibhubhise ngesabula. ₁₆Buthelelani ipango yakhona niyibeke ekabeni yetatawu ledorobho, nitjhise idorobho nayo yoke ipangwalo njengomnikelo otjhiswa woke kuSomnini uZimenu. Idorobhelo lihlale liliqubi njalo lingabe lisakhiwa godu. ₁₇Ningababaleli izinto ekufanele zirhayilwe ukuze uSomnini atjhuguluke ekuthukutheleni kwakhe. Uzakuba nomusa kini, anandise njengombana afunga kiboyihlomkhulu ₁₈nakube nilalela ilizwi lakaSomnini uZimenu, nigcine yoke imiyalwakhe enginiyale ngayo namhlanje, nenze okuhle phambi kwakhe.