2 KWEBEKORINTE 13

₁Sekungekwesithathu ngisiza kini: “Yoke indaba kumele iqiniswe ngabofakazi ababili namkha abathathu.” ₂Ngabayelelisa labo abonako ngaphambilini kanye nabo boke abanye, godu ngisabayelelisa nanje nanyana ngingekho phakathi kwabo, njengombana ngenza lokha nangiphakathi kwenu nanginikhambele kwesibili. Ngithi angisoze ngaba nesirhawu ₃njengombana nithi nifuna ubufakazi bona uKrestu ukhulume ngami. Yena akasibuthakathaka ekusebenzeni ngani kodwana unamandla hlangana nani. ₄Yena wabethelwa ebuthakathakeni kodwana waphila ngamandla kaZimu. Sibuthakathaka kuye, kodwana ekusebenzeni kwethu ngani, sizokuphila naye ngamandla kaZimu.

₅Zihlolisiseni bona nisaphila ekukholweni na. Zizizinyeni. Kanti anilemuki bonyana uJesu Krestu ungaphakathi kwenu na? Nakungasinjalo khona-ke kutjho bona anikayiphumeleli ihlolo. ₆Ngiyathemba bona nizakufunyana bonyana thina azange sibhalelwe. ₇Sithandaza kuZimu bona ningenzi ilitho elingakalungi. Ingasi bona sibonakalise ebantwini bonyana siphumelele ihlolo, kodwana kobana nenze okulungileko ngitjho nanyana kubonakala inga sibhalelwe. ₈Ngitjho ngombana akunalitho esingalenza ukujamelana neqiniso ngaphandle kobana silijamele, ₉ngombana sihlala sithabile njalo lokha nasibuthakathaka kodwana nina ninamandla. Nje-ke imithandazwethu kukobana nipheleliswe. ₁₀Kungalokho ngitlola izintwezi nangingekho phakathi kwenu ukuze kuthi nangizako ngingafiki ngibe bukhali ekusebenziseni kwami igunya, iye, igunya engaliphiwa yiKosi kobana nginakhe ingasi bona nginigirize.

₁₁Kokugcina bazalwana, yenisale kuhle. Phikelelani ukupheleliswa, nilalele isibawo sami. Yibani hliziyonye, nihlale ngokuthula. UZimu wethando nokuthula uzakuba nani.

₁₂Lotjhisanani ngokwangana okukhethekileko. ₁₃Boke abazalwana bayanilotjhisa.

₁₄Umusa weKosi uJesu Krestu, ithando lakaZimu nobudlelwana bakaMoya oCwengileko, akube nani noke.