2 IINKRONIKE 3

₁USolomoni wathoma ukwakha ithempeli lakaSomnini eJerusalema entabeni iMoriya lapha uyise uDavida afumana khona isambulo. Gade kuseselelweni saka-Arawuna umJebusi, indawo eyathengwa nguDavida. ₂Wathoma ukwakha elangeni lesibili lenyanga yesibili emnyakeni wesine wokubusa kwakhe.

₃Lezi ziinlinganiso ezaquntwa nguSolomoni mayelana nokwakhiwa kwethempeli lakaZimu ukuya ngokweenlinganiso zaphambilini: Kwakumamitha amatjhumi amathathu ubude namamitha alitjhumi ububanzi. ₄Ubude bethempeli bebululwe ngamathuri anobubanzi bethempeli obumamitha alitjhumi, namamitha alitjhumi ukuphakama. Wanameka ilingaphakathi lawo ngegolide elitsengileko.

_5-7Wavala ilawu elikhulu ngomsayipurusi bewalinameka ngegolide elitsengileko elivela eParivayimu. Walikghabisa ngomuthi wesundu, ngemikghabiso yeketani nangamatje aligugu. Godu wabaza namakerubhi emabodeni. Wanameka loke ilawelo ngegolide: amabhaluga, amagoseni, amaboda kanye neminyango.

₈Indawo ecwenge khulu beyingenelele emsamo ngamamitha alitjhumi ilingana nobubanzi bethempeli. Ububanzi bayo nabo bebumamitha alitjhumi. Wanameka ilingaphakathi layo pheze ngeenkulungwana ezimatjhumi amabili zamakhilogremu wegolide elitsengileko. ₉Iinkhonkhwani zegolide bezinobudisi obungaphezu kwamakhilogremu amatjhumi amabili nabunane. Godu wanameka namalawu angaphezulu ngegolide.

₁₀Wabumba amakerubhi amabili endaweni ecwenge khulu bewawanameka ngegolide. ₁₁Ubukhulu bamaphiko wamakerubhi gade bumamitha alitjhumi. Iphiko elilodwa lekerubhi gade limamitha amabili nesiquntu ubude lithintene neboda lethempeli, khibe iphiko elinye lalo nalo elimamitha amabili nesiquntu ubude liphawulukeleke ephikweni lekerubhi elinye. ₁₂Ngokunjalo iphiko elilodwa lekerubhi lesibili belimamitha amabili nesiquntu ubude begodu lithinte iboda elinye lethempeli, iphiko lalo elinye nalo elimamitha amabili nesiquntu belinamathelene nephiko lekerubhi lokuthoma. ₁₃Nje-ke amaphiko wamakerubhi lawo gade amamitha alitjhumi. Bekajame ngeenyawo zawo aqale ngelawini elikhulu.

₁₄USolomoni waluka irharideni ngelineni emhlophe nangewulu ehlaza komkayi, ebubende netlerebede linomfanekiso wamakerubhi.

₁₅Wakhela icabazi lethempeli iinsika ezimbili. Isika ngayinye sele ihlangene nepundwayo beyimamitha amatjhumi amabili ukuphakama. Ipundu ngayinye beyimamitha amabili nesiquntu. ₁₆Wenza iinketani njengombana uDavida ambulelwa, wazirhorheja eempundwini zeensika. Godu wenza amarharinada alikhulu wawakghwayeja eenketanini. ₁₇Wajamisa iinsikezo ecabazini lethempeli, enye yaba ngesewula, enye yaba ngetlhagwini. Kwathi engesewula wayithiya bona yiJakini, engetlhagwini wathi yiBhowazi.