UDavida noGoliyadi
1AmaFilista abutha amabutho wawo azilungiselela ipi ahlanganela eSoko kwaJuda. Ahloma itende e-Efesi-Damimi, phakathi kweSoko ne-Azeka. 2USawula nama-Israyeli bahlangana bahloma itende labo emrhobeni we-Ela bazilungiselela ukuhlangabezana namaFilista. 3AmaFilista ahlala ngaphetjheya kombundu, ama-Israyeli ahlala nganeno kombundu, bahlukaniswa mrhoba phakathi.
4Kwaphuma itsitsirimba yekulwazo ekampeni yamaFilista, ibizo layo kunguGoliyadi weGathi. Ubude bakhe babungaba mamitha amathathu. 5Wayethwele isikupuru sekoporo, embethe nembaji yepi enamarhururhuru wekoporo enobudisi obubalelwa kumakhilogremu amatjhumi amahlanu nalikhomba. 6Eenyaweni afake amapatanisi wekoporo; abhebhule izenjana lekoporo. 7Umphini womkhontwakhe wawufana nompherho womluki, kanti itlobo yakhona yayinesimbi enobudisi obumakhilogremu asithandathu. Usonkhandakhe aphethe isihlangu esikhulu akhamba phambi kwakhe.
8UGoliyadi wehlela emrhobeni wajokolela iinqhema zama-Israyeli wathi: “Kutheni niphume imijeje kobana nilwe ipi? NgimFilista mina. Nina nimakhobokana kaSawula! Khethani indoda ezizwako sihlangane. 9Nangabe iyakghona ukulwa nami ingirhayile, yeke sizakuba makhobokenu. Kodwana nange mina ngiyirhirizile, nina nizakuba makhobokethu nisikhonze.” 10UmFilista waragela phambili wathi: “Namhlanje ngiyazeyisa zoke iinqhenyana zakwa-Israyeli! Khuphani indoda ezizwako ibe yinye sihlangane.” 11Kwathi lokha nabezwa amagama womFilista la, uSawula nama-Israyeli woke besaba khulu bathuthumela. 12-16Kwaba malanga amanengi umFilista alokhu ajokola lapho ekuseni nantambama.
Yeke uDavida gade ayindodana yomEfratha ekuthiwa nguJese, ogade avela eBhethe-Lehema lakwaJuda. UJese gade anamadodana abunane, kanti ngesikhathi sakaSawula wayesele aluphele khulu kobana angaphuma ipi. Amadodana amathathu amadala kaJese alandela uSawula epini: Izibulo kwakungu-Eliyabu; alanywa ngu-Abinadaba; yena alandelwa nguTjhama. UDavida bekabuphetjhani. Amadodana amathathu amakhulu ahlala noSawula, kodwana uDavida bekalokhu eza kuSawula begodu abuyele emuva ayokwelusa umhlambi kayise eBhethe-Lehema.
17UJese wathi endodanenakhe uDavida: “Thatha upumpana wekoroyi ekhanzingiweko lo, neempani ezilitjhumi zesikwezi uzise kubafowenu ekampeni msinyazana. 18Iintina ezilitjhumi zetjhizezi, ziphathele umphathisiqhema. Uhlole bonyana abafowenu baphethe njani bewubuye nobufakazi bona gade unabo. 19Abafowenu banoSawula kanye nawo woke amadoda wakwa-Israyeli emrhobeni we-Ela, ukuyokulwa namaFilista.”
20Kwathi ekuseni uDavida watjhiya izimvu nomelusi, wathatha umthwalo wakhamba njengokutjho kwakaJese. Wafika ekampeni lokha amabutho nakathoma ukuzilungiselela ukuya evadleni, avuma ingoma yepi, 21ngombana ama-Israyeli namaFilista begade azihlela ngeengaba zawo bona alwe. 22UDavida watjhiya umthwalo wakhe kugadi wemithwalo wagijimela evadleni walotjhisa abafowabo. 23Kuthe nasakhuluma nabafowabo, kwavela uGoliyadi weGathi, ikulwazo yetsitsirimba yamaFilista, waphuma esiqhemeni sakhe ajokola, akhuluma amagama anamadinyana njengemihleni. UDavida wakuzwa lokho. 24Lokha ama-Israyeli nakabona indoda le, ethuka khulu ahlehla woke.
25Ama-Israyeli atjelwa kwathiwa: “Niyayibona indoda ejokolako le, iphumele ukurhubutjha u-Israyeli. Umuntu ozokubulala umrhali lo ikosi izomnjingisa khulu. Begodu izamendisela indodakazayo kanti nomndeni kayise lomuntu loyo awuzukuhlawuliswa umthelo kwa-Israyeli.” 26UDavida wabuza amadoda agade ajame hlanu kwawo wathi: “Uzakwenzelwani umuntu ozakubulala umFilista lo bese ususa ihlazweli ku-Israyeli na? Ungubani yena umFilista ongakasoki lo bonyana angazokurhubutjha amabutho kaZimu ophilako?” 27Amphendula uDavida amadoda la abuyekeza lokho agade akukhuluma athi: “Umuntu ozakubulala umFilista uzakwenzelwa lokhu nalokhuya.” 28U-Eliyabu, umfowabo omdala kaDavida wezwa lokha uDavida nakhuluma namadoda lawo, wamcasukela wathi: “Ufunani lapha? Izimvu zinobani emrhuleni nawulapha nje? Ngiyakwazi bonyana ungumaqobolwana begodu unobuqili; uzele ukuzokubukela ipi nje kwaphela.” 29UDavida wabuza wathi: “Sengenzeni-ke gadesi? Kanti lokhu akukaqakatheki na?” 30UDavida waya komunye umuntu, wambuza njengombana abuze ekuthomeni, yeke umuntu loyo naye wamphendula njengombana aphendulwe ekuthomeni.
31Ikulumo kaDavida yafika eendlebeni zakaSawula. USawula wathi akabizwe. 32UDavida wathi kuSawula: “Akungabi nomuntu onyamako ngebanga lomFilista lo; incekwakho izakwehla iyokulwa naye.” 33USawula wathi: “Angeze wakghona ukwehla uyokulwa nomFilista loya; usesemsana, kanti yena uyitsitsirimba eyathoma ukulwa kusukela ebutjheni bayo.” 34Kodwana uDavida wathi kuSawula: “Incekwakho beyelusa izimvu zakayise. Bekuthi nakufika ibhubezi nanyana ibhere ithathe imvu hlangana nomhlambi, 35ngiyilandele, ngifike ngiyisawule bese ngihlangula imvu emlonyenayo. Nayibe iyangijikela, ngiyibambe ngomphinjanayo, ngiyimadlhe phasi ngiyibulale. 36Incekwakho ibulele iibhubezi nebhere, yeke nomFilista ongakasoki lo, uzakufana nenye yazo ngombana uhlazise amabutho kaZimu ophilako. 37USomnini owangisindisa eqatheni lebhubezi neqatheni lebhere, uzangisindisa esandleni somFilista lo.” USawula wathi kuDavida: “Khamba, yeke uSomnini abe nawe.”
38USawula wembathisa uDavida izambatho zakhe zepi. Wamembathisa imbaji yepi wamthwesa nesikupuru sekoporo. 39UDavida wabophelela isabula yakaSawula ezambathweni zepi, walinga ukukhambakhamba ngazo ngombana ubangakazijayeli. Wathi kuSawula: “Angikghoni ukukhamba ngembethe izintwezi ngombana angikazijayeli.” Yeke wazihlubula.
40Wathatha isibhuku sakhe wasiphatha ngesandla sakhe, wakhetha amatje amahlanu nabutjhelelezi emlanjaneni, wawafaka ngesikhwameni sembadakhe yekweluseni, waphatha isarwayi sakhe ngesandla, wanqomba kumFilista. 41UmFilista watjhidela kuDavida apeleselwa ngusonkhandakhe aphethe isihlangu esikhulu. 42Waqala uDavida wambona amsanyana, akhanya begodu aqaleka, yeke wamnyaza. 43Wathi kuDavida: “Ngiyinja na, uza kimi uphethe iingojwana nje?” UmFilista wathuka uDavida ngabosingazimu bakhe. 44Wathi: “Yizapha ukuze ngiphe amadlanga nabophagana inyamakho!”
45UDavida wathi kumFilista: “Uza kimi ngesabula nomkhonto nangezenjana, kodwana mina ngiza kuwe ngebizo lakaSomnini uMninimandlawoke, uZimu wamabutho ka-Israyeli, oweyisileko. 46Namhlanje uSomnini uzokunikela ezandleni zami, ngizokumadlha phasi bese ngiqunta ihlokwakho. Namhlanje ngizokuthatha iindumbu zamabutho wamaFilista ngiziphe amadlanga nabophagana. Iphasi loke lizakwazi bonyana kunoZimu kwa-Israyeli. 47Woke umuntu olapha namhlanjesi uzakwazi bonyana uSomnini akasindisi ngesabula nomkhonto kwaphela ngombana ipi ngeyakaSomnini. Nje-ke uzoninikela ezandleni zethu nokanyana nje.”
48Kuthe lokha umFilista natjhidelako afuna ukulwa, uDavida wagijima ngebelo wanqomba evadleni wamhlangabeza. 49Wafaka isandla ngesikhwameni sembadakhe wakhupha ilitje, walijuguja ngesarwayi walidedela, lafike lavirimeja umFilista epandla. Ilitje lamodza epandla yakhe bewarabhalala ngobuso phasi. 50Yeke uDavida wahlula umFilista ngelitje nesarwayi; angakaphathi isabula esandleni, kodwana wamadlha phasi umFilista bewambulala. 51UDavida wagijima wafika wajama ngehla kwakhe. Warhwatjha isabula yomFilista loyo emgodlanenayo, wamqedelela bewaqunta ihlokwakhe ngayo. Lokha amaFilista nakabona bonyana ikutana yawo ifile, ajika abeletha iinthende. 52Amadoda wakwa-Israyeli newakwaJuda aragela phambili arhuwelela, agijimisa amaFilista awaragela ebungenweni beGathi nemasangweni we-Ekroni. Iindumbu zawo zazirhatjheke magegana nendlela yeTjharayimi ukuya eGathi ne-Ekroni. 53Ama-Israyeli nabuya ekugijimiseni amaFilista, aphanga ikampawo. 54(Ngemva kwesikhathi uDavida wathatha ihloko yomFilista wayiletha eJerusalema, wathatha neenhlabani zomFilista wazifaka endlinakhe.)
55Kwathi lokha uSawula nabona uDavida ahlangabeza umFilista, wathi ku-Abineri umphathibutho: “Abineri-ke, msakabani isokaneliya?” U-Abineri waphendula wathi: “Ngiqinisile kosi, abe angazi.” 56USawula wathi: “Akhe ubuze bonyana msakabani isokaneli.” 57Kuthe lokha uDavida nabuya ukubulala umFilista, u-Abineri wamthatha wamusa kuSawula; asaphethe ihloko yomFilista. 58USawula wambuza wathi: “Umsa kabani, sokana?” UDavida wathi: “Ngimntwana wencekwakho, uJese weBhethe-Lehema.”
