U-Arhabi ubulawa epini
1Kwaba minyaka emithathu kunganapi phakathi kwama-Aramu nama-Israyeli. 2Kodwana kwathi emnyakeni wesithathu uJehotjhafathi ikosi yakwaJuda wehla wayokuthekela ikosi yakwa-Israyeli. 3Ikosi yakwa-Israyeli yayithe eenkhulwini zayo: “Anazi bonyana iRamothi eGiliyadi ingeyethu na? Kodwana sihlezi asilubalubeli ukuyibuyisa ezandleni zekosi ye-Aramu!”
4Kwathi lokha uJehotjhafathi nafikako, ikosi yakwa-Israyeli yambuza yathi: “Uzakwehla nami siyokulwa neRamothi eGiliyadi na?”
UJehotjhafathi wathi ekosini yakwa-Israyeli: “Ngithi nginawe! Amajonami ngewakho neenjomani zami ngezakho!”
5Kodwana uJehotjhafathi godu wathi ekosini yakwa-Israyeli: “Buza kuSomnini mantange.”
6Yeke ikosi yakwa-Israyeli yabizela abaphorofidi ndawonye, babamadoda amakhulu amane. Wababuza wathi: “Nithi angiphume ngiyokulwa neRamothi eGiliyadi, namkha ngihlale na?”
Baphendula bathi: “Khamba ngombana uSomandla uzoyinikela ezandleni zekosi.”
7Kodwana uJehotjhafathi wabuza wathi: “Akunamphorofidi kaZimu eduzapha esingabuza kuye na?”
8Ikosi yakwa-Israyeli yathi: “Awa, usekhona yena ongasibuzela kuZimu, into nje mina uyangikghabhudlha ngombana akunanto ehle akhe ayiphorofide ngami, uhlala angikhuluma kumbi njalo. Batjho nguMikaya umsa kaYimla.”
UJehotjhafathi wathi: “Akusikuhle bonyana ikosi ikhulume njalo.”
9Ikosi yakwa-Israyeli yabiza esinye seenkhulu zayo yathi: “Rhaba uze noMikaya umsa kaYimla loyo.”
10Ikosi yakwa-Israyeli noJehotjhafathi ikosi yakwaJuda babembethe izambatho zabo zobukhosi bahlezi eenhlalweni zobukhosi eselelweni ngaphandle kwesango leSamariya, kuthe swi abaphorofidi phambi kwabo basemmoyeni wokuphorofida.
11UTsedekhiya umsa kaKenana wenza iimpondo zesimbi wathi: “Nakhu okutjhiwo nguSomnini, ‘Ngeempondwezi, uzakutlhofoza ama-Aramu abe aphele nya.’ ”
12Boke abaphorofidi abanye bebaphorofida bakhuluma into eyodwa basithi: “Sahlela iRamothi eGiliyadi bewuhlule ngombana uZimu uzayinikela ezandleni zekosi.”
13Isithunywa ebesiyokubiza uMikaya sathi kuye: “Qala, abaphorofidaba bakhuluma ngalizwi linye, boke baboniswa okuhle ngekosi. Nawe-ke zwana nabo ukhulume okuhle njengabo.”
14Kodwana uMikaya wathi: “Ngiyaqinisa phambi kwakaSomnini ngithi, ngizokukhuluma kwaphela lokho uSomnini akukhuluma kimi.”
15Kwathi nafikako ikosi yambuza yathi: “Mikaya, ngiye epini ukuyokulwa neRamothi eGiliyadi, namkha ngilise na?”
Yena wathi: “Iye, khamba uyokusahlela bewuhlule ngombana uSomnini uZimu uzayinikela ezandleni zekosi.”
16Ikosi yathi kuye: “Ufuna ngikufungise kangaki bonyana ungitjele iqiniso kwaphela ebizweni lakaSomnini na?”
17Yeke uMikaya wathi:
“Ngibone woke u-Israyeli asabalaliswe emibundwini
njengezimvu ezinganamelusi.
UZimu wathi, ‘Abantwaba abanamelusi.
Omunye nomunye akaziyele kwakhe ngokuthula.’ ”
18Ikosi yakwa-Israyeli yathi kuJehotjhafathi: “Uyezwa-ke! Angithi ngikutjelile bonyana abe akunabuhle angabuphorofida ngami. Into ayaziko sekungikhuluma kumbi!”
19UMikaya waragela phambili wathi: “Yeke lalela okwatjhiwo nguSomnini nangimbona ahlezi esihlalweni sakhe sobukhosi aphahlwe mkhambathi woke wezulwini, ngesigomeni nangesinceleni sakhe 20asithi, ‘Ngubani ungayokuyenga u-Arhabi bonyana asahlele iRamothi eGiliyadi ukuze aziphekelele yena ekufeni na?’ Omunye watjho lokhu nomunye watjho lokhuya. 21Khonapho kwavela omunye womkhambathi wajama phambi kwakaSomnini wathi, ‘Ngizamyenga.’ 22USomnini wabuza wathi, ‘Uzamyenga njani?’ Yena wathi, ‘Ngizakuphuma bese ngiba mummoya wamala emilonyeni yabo boke abaphorofidi bakhe.’ USomnini wathi, ‘Khamba uyomyenga, uzakuphumelela.’ 23Nje-ke, qala uSomnini ubeke ummoya wamala emilonyeni yabo boke abaphorodi bakhwaba. USomnini ukuhlelele ihlekelele.”
24UTsedekhiya umsa kaKenana wakhuphuka wafika wawahla uMikaya emhlathini wathi: “Kuzenjani bonyana ummoya obuya kuSomnini usuke kimi uzokukhuluma kuwe?”
25UMikaya wathi: “Uzakwazi mhlana uyokubhaca elawini elisemsamo.”
26Ikosi yakwa-Israyeli yathi: “Thathani uMikaya lo nimbuyisele ku-Amoni oyinduna yedorobho nakuJowatjhi umntwanekosi 27bese nithi, ‘Ikosi ithi: Phoselani umrhali lo ngesikhungweni, nimuphe isikwana nethosana lamanzi ngamalanga kufikela bengibuye ngisaphephile.’ ”
28UMikaya wathi: “Nange ngambala ungabuya uphephile, uZimu uzabe angakakhulumi ngami.”
(Umphorofidi lo ufaniswa nowathi: “Yizwani noke nina bantu!”)
29Yeke ikosi yakwa-Israyeli noJehotjhafathi ikosi yakwaJuda bakhuphukela eRamothi eGiliyadi. 30Ikosi yakwa-Israyeli yathi kuJehotjhafathi: “Ngizakungena epini ngokuzitjhatjhanisa, kodwana wena yembatha izambatho zakho zobukhosi.” Yeke ikosi yakwa-Israyeli yazitjhatjhanisa, yangena epini.
31Ikosi yama-Aramu gade iyale iinduna zeenkarana ezimatjhumi amathathu nambili yathi: “Ningalwi nananyana ngubani ngaphandle kwekosi yakwa-Israyeli.”
32Kuthe lokha iinduna zeenkarana nazibona uJehotjhafathi zathi: “Sayibamba inyamazana! Ngiyo ikosi yakwa-Israyeli!” Zajika bonyana zimthelekele. UJehotjhafathi warhuwelela afuna isizo. 33Iinduna zeenkarana zalemuka bonyana akusiyo ikosi yakwa-Israyeli, zajika.
34Khonapho kwase kwaba nodumuza ngomsebe angakanqophi muntu, wanemba ikosi yakwa-Israyeli hlangana nomphetho wesiphanga sembaji yepi. Ikosi leyo yathi kumtjhayeli wekaranayo: “Jikisa ikarana ungikhuphe epinapha, nakhu sele ngilimele khulu.”
35Ipi yadlondlobala mhlokho. Ikosi yayilokhu isekelwe ekaranenayo iqalene nama-Aramu. Yayiphopha iingazi encebeni zigelezela phezu kwekaranayo, yahlongakala ilanga nalitjhingako. 36Khonokho kwahlatjwa umkhosi kiwo woke amabutho kwathiwa: “Omunye nomunye akabuyele ekhabo, buyelani eenarheni zenu!”
37Ikosi yahlongakala ngaleyondlela, yalethwa eSamariya bona ibulungelwe khona.
38Bahlanza ikarana esizibeni esiseSamariya, lokha iingwadla nazihlambako. Izinja zaqabha iingazi zaka-Arhabi njengombana ilizwi lakaSomnini lalitjhwile.
39Zoke izehlakalo zokubusa kwaka-Arhabi, nakho koke akwenzileko, isigodlo asakhileko bewasikghabisa ngamazinyo wendlovu, namadorobho awaqinisileko, kutlolwe encwadini yemilando yamakhosi wakwa-Israyeli. 40U-Arhabi wabulungwa kiboyisemkhulu. Indodanakhe u-Arhaziya yathatha iintambo esikhundleni sakhe.
Umbuso kaJehotjhafathi ikosi yakwaJuda
41UJehotjhafathi umsa ka-Asa waba yikosi yakwaJuda emnyakeni wesine wokubusa kwaka-Arhabi ikosi yakwa-Israyeli. 42UJehotjhafathi bekaneminyaka ematjhumi amathathu nahlanu lokha nathatha iintambo zobukhosi, wabusa eJerusalema iminyaka ematjhumi amabili nahlanu. Ibizo lakanina bekungu-Azubha indodakazi kaTjhilirhi.
43Wakhamba emtlhaleni kayise u-Asa kikho koke, azange aphambuke; wenza ubuhle ebusweni bakaSomnini. 44Nokho azange asuse iindunduma, ngebangelo abantu baragela phambili nokuletha imihlabelo nokutjhisa ipepho lapho. 45UJehotjhafathi naye gade anokuthula nekosi yakwa-Israyeli.
46Zoke izehlakalo zokubusa kwakaJehotjhafathi, ukuhlula kwakhe, okutjho izipi azilwileko, kutlolwe encwadini yemilando yamakhosi wakwaJuda.
47Wathanyela enarheni iintjhatjha zethempeli ebegade zisele lapho soloko kwangesikhathi kusabusa uyise u-Asa.
48Kwahlala kunganakosi kwa-Edomu; kwabusa umjaphethe.
49UJehotjhafathi wakha imijeje yemikhumbi yokurhweba kobana akghone ukuya e-Ofira ukufunyana igolide, kodwana imikhumbi leyo azange beyilinge nokuthaya, yaphahlazeka e-Etsiyoni-Gebere. 50Ngesikhatheso u-Arhaziya umsa ka-Arhabi wathi kuJehotjhafathi: “Vumela abantu bami bathaye nebakho.” Kodwana uJehotjhafathi wala.
51UJehotjhafathi wahlongakala, wabulungelwa eMzini kayisemkhulu uDavida. UJehoramu indodanakhe yathatha ubukhosi emva kwakhe.
Umbuso ka-Arhaziya ikosi yakwa-Israyeli
52U-Arhaziya umsa ka-Arhabi waba yikosi yakwa-Israyeli eSamariya emnyakeni wekhomba wokubusa kwakaJehotjhafathi ikosi yakwaJuda. Wabusa u-Israyeli iminyaka emibili.
53Wenza ubumbi phambi kwakaSomnini ngombana wakhamba emtlhaleni kayise nonina nemtlhaleni kaJerobhowamu umsa kaNebathi, abangela ngawo bonyana u-Israyeli one. 54Walotjha bewakhothamela uBhali, ngaleyondlela wathukuthelisa uSomnini uZimu wakwa-Israyeli, walingisa uyise weyi.
