1 KWEBEKORINTE 15

₁Bazalwana, ngithanda ukunikhumbuza ngevangeli engalitjhumayela kini, enalamukelako nenidzimelele kilo. ₂Ngilo ivangeleli enisindiswa ngalo nanikakarela elizwini enganitjhumayeza lona. Nakungasinjalo, nizabe nikholelwe ilizwe.

₃Engakwamukelako ngakudlulisela kini ngombana kuyinto yokuthoma eqakathekileko kobana uKrestu wafela izono zethu ukuya ngokwemitlolo, ₄wabulungwa, wavuka kabafileko ngelanga lesithathu, njengombana imitlolo isitjho. ₅Wabonakala kuPitrosi, godu wabonakala kubapostoli abalitjhumi nambili. ₆Ngemva kwalapho, wabonakala kubazalwana abangaphezu kwamakhulu amahlanu ngesikhathi esisodwa, inengi labo elisaphilako, nanyana-ke abanye sebalala nje. ₇Godu wabonakala kuJakopo, ngemva kwalapho wabonakala kibo boke abapostoli. ₈Ekugcineni wabonakala nakimi mina onjengaloyo obelethwe ngendlela engakajayeleki. ₉Ngitjho ngombana ngingomncancani kubapostoli, nje-ke abengikafaneli nokubizwa bona ngimpostoli ngombana ngahlukumeza ibandla lakaZimu. ₁₀Kodwana ngebanga lesirhawu sakaZimu ngingilokhu engingikho begodu isirhawu sakhe kimi azange sibe lilize. Awa, ngasebenza khulu kunabo boke, kodwana bekungasimi, bekusirhawu sakaZimu ebesinami. ₁₁Nje-ke nanyana bekungimi namkha bekungibo, leli ngilo ivangeli esilitjhumayelako begodu ngilo enalikholwako.

₁₂Nakube uKrestu utjhunyayelwa bona uvusiwe kabafileko, bangatjho njani-ke abanye benu bonyana akukho ukuvuka kwabafileko na? ₁₃Kodwana nakube akukho ukuvuka kwabafileko, khona-ke kutjho bona noKrestu azange avuswe. ₁₄Nje-ke nakube uKrestu azange avuswe, khona-ke ukutjhumayela kwethu kulilize lakolize, nokukholwa kwenu kunjalo. ₁₅Ngaphezu kwalapho, kutjho bona sifunyaniswa sibofakazi bamanga ngoZimu ngombana sifakaze ngaye bonyana wavusa uKrestu kabafileko. ₁₆Ngitjho ngombana nakube abafileko abavuswa, khona-ke kutjho bona noKrestu azange avuswe. ₁₇Nje-ke nakube uKrestu azange avuswe, kukhomba bona ukukholwa kwenu kulilize lakolize, nisahlezi ezonweni zenu. ₁₈Yeke nalabo esele balala bakuKrestu kutjho bona balahlekile-ke. ₁₉Nakube ithemba lethu kuKrestu lingelokuphila lokhu kwaphela, khona-ke singebokulilelwa ukudlula boke abantu.

₂₀Kodwana ngambala uKrestu uvusiwe kabafileko, yena osithelo sokuthoma sabaleleko. ₂₁Njengombana ukufa kweza ngomuntu, kunjalo nokuvuka kwabafileko kuza ngomuntu. ₂₂Njengombana ku-Adamu boke bayafa, ngokunjalo kuKrestu boke bazakuvuswa. ₂₃Kodwana omunye nomunye ngedlhego lakhe: Kuzokuthoma uKrestu ntangi bese kuthi nabuyako, kuvuke labo abangebakhe. ₂₄Nje-ke isiphetho sizakufika lokha nanikela umbuso kuZimu uBaba ngemva kobana atjhabalalise yoke imibuso, ubukhosi namandla ₂₅ngombana kumele abuse bekufike lapha arabhalalisa khona zoke izitha zakhe ngaphasi kweenyawo zakhe. ₂₆Isitha sokugcina esizokubhujiswa, kukufa ₂₇ngombana umtlolo uthi: “Ubeke koke ngaphasi kweenyawo zakhe.” Nje-ke nawuthi “yoke into” ibekwe ngaphasi kwakhe, kuyakhanya bonyana lokhu akufaki uZimu phakathi, okunguye obeka zoke izinto ngaphasi kwakaKrestu. ₂₈Nasele enze lokhu, yeke iNdodana ngokwayo izakwenziwa bona ibe ngaphasi koZimu okunguye obeka zoke izinto ngaphasi kwayo ukuze kuthi yena Zimu abe ngongaphezu kwakho koke.

₂₉Alo-ke nakube akukho ukuvuka kwabafileko, bazokwenzanjani labo ababhabhadiselwa abafileko na? Nakube abafileko abakazokuvuswa nakanye, kubayini abantu babhajadiswe ngenca yabo na? ₃₀Nakungithi-ke khona kubayini sizifake engozini umzuzu nomzuzu na? ₃₁Mina ngifa ngamalanga, iye, ngitjho njalo bazalwana kanjengombana ngambala ngizigqaja ngani kuKrestu Jesu iKosi yethu. ₃₂Nakube bengilwa neembandana ezinelunya e-Efesu ngebanga lomuntu tle, bengizakuthi ngizuzeni nje? Nakube abafileko angeze bavuswa, khona-ke asizaliseni ikulumo ethi: “Asigomeni, sisele ngombana ngomuso siyokufa.”

₃₃Ningakhohliswa! “Ukujayelana nabantu abakhohlakeleko konakalisa isimilo esihle.” ₃₄Qaqulukani njengombana nifanele, nilise ukona ngombana kukhona abathileko abangayeleli uZimu. Ngitjho lokhu khona nizakhe khenizikhuze.

₃₅Kodwana omunye angase abuze athi: “Abafileko bavuswa njani na? Bazokuvuka ngomzimba onjani na?” ₃₆Ubudlhadlha obungaka! Okutjalileko angeze kwamila ngaphandle kobana kufe qangi. ₃₇Lokha nawutjalako, awutjali umzimba ngesingawo kodwana utjala imbewu kwaphela kungaba mhlambe ngeyekoroyi namkha okhunye nje. ₃₈UZimu nguye onikela imbewu leyo umzimba njengokuhlosa kwakhe. Unikela omunye nomunye umhlobo wembewu umzimba wayo.

₃₉Inyama yoke ayifani: Abantu bamhlobo othileko wenyama, iinlwana ziimhlobo omunye, iinyoni nazo ziimhlobo omunye neenhlambi ngokunjalo.

₄₀Ikhona-ke nemizimba yezulwini nemizimba yephasini, kodwana ukuphazimula kwemizimba yezulwini kukodwa, nokuphazimula kwemizimba yephasini nakho kukodwa. ₄₁Ikhona iphazimulo yelanga, nenye iphazimulo yenyezi godu nenye iphazimulo yeenkwekwezi ngombana iinkwekwezi ziyahlukahlukana ngephazimulo.

₄₂Kuzokuba njalo-ke ngokuvuka kwabafileko. Okutjalwako kuyabola, okuvuswako akuboli. ₄₃Kutjalwa ngokudelwa, kuvuswa ngephazimulo. Kutjalwa ngobuthakathaka, kuvuswa ngamandla. ₄₄Kutjalwa kumzimba wenyama, kuvuswa kumzimba wommoya. Nakube kukhona umzimba wenyama, kukhona nomzimba wommoya. ₄₅Ngokunjalo kutloliwe kwathiwa: “Umuntu wokuthoma u-Adamu, waba sibunjwa esiphilako,” u-Adamu wokugcina waba nguMoya ophilisako. ₄₆KoMoya akusikho okweza qangi, kodwana ngokwemvelo, ngemva kwalapho-ke kwaba ngokoMoya. ₄₇Umuntu wokuthoma wavela ethulini lephasi, wesibili wavela ezulwini. ₄₈Indlela angayo umuntu wephasi, banjalo nalabo abangebephasi. Indlela angayo umuntu wezulwini, banjalo nalabo abangebezulwini. ₄₉Njengombana sinomfuziselo womuntu wephasi, ngokunjalo sizokuba nomfuziselo womuntu wezulwini.

₅₀Ngiyatjho kini bazalwana ngithi inyama neengazi angekhe kwalidla ilifa lombuso kaZimu, nokubolako angekhe kwalidla ilifa lokungaboliko.

₅₁Lalelani nginitjele nasi ifihlakalo: Asizukulala soke, kodwana soke sizokutjhugululwa ₅₂ngomzuzwana, iye, ngokuphazima kwelihlo, nakulila iporompita yokugcina. Kuzokulila iporompita, abafileko bavuswe bangasenakho ukubola bese siyatjhugululwa-ke. ₅₃Lokhu okubolako kumele kuzembathise okungaboliko bese kuthi okubhubhako kuzembathise okungabhubhiko. ₅₄Nasele okubolako kwembathiswe okungaboliko, nokubhubhako sekwembathiswe okungabhubhiko, sizakuzaliseka-ke isitjho esitloliweko esithi:

₅₈Ngalokho-ke bazalwana bami abathandekako, dzimelelani. Akungabi nento eninyakazisako. Hlalani njalo nizinikele ngokupheleleko emsebenzini weKosi ngombana niyazi bonyana ukuzikhandla kwenu eKosini akusingelize.