Ukukhalinywa ngabosingazimu
1Yeke angithandi bazalwana bona ningabi nelwazi lokobana abakhokho bethu boke bebangaphasi kwelifu begodu boke bayama elwandle. 2Boke babhabhadiselwa kuMosi ngelifini bangelwandle. 3Boke bagoma ukudla kunye kwakaMoya, 4basela isiselo sinye sakaMoya ngombana basela edwaleni lakaMoya ebelibaphekelela. Idwalelo belinguKrestu. 5Nanyana kunjalo uZimu azange athokoze ngenengi labo; iindumbu zabo zarhatjheka kilo loke irhalawumba.
6Izintwezi zenzeka kobana zibe sibonelo ukusikhandela bona singabeki iinhliziyo zethu ezintweni ezimbi njengombana benza bona. 7Ningabi balotjhi babosingazimu njengombana abanye babo benza ngombana kutloliwe kwathiwa: “Abantu bahlala phasi bagoma bebasela, basikima bagida.” 8Asingenzi izenzo zokukhohlakala ngokwamabhayi njengombana abanye babo benza, bekwathi ngelanga linye kwabhujiswa iinkulungwana ezimatjhumi amabili nantathu zabo. 9Asingayilingi iKosi, njengombana abanye babo benza, babulawa ziinyoka. 10Godu ningarhononi njengombana abanye babo benza, babulawa yingilozi ebhubhisako.
11Izintwezi zabehlela zaba sibonelo bezatlolwa njengesiyeleliso kithi thina esele sifikelwe kuphela kweenkhathi.
12Nje-ke nawudlumbana bona ujame udzimelele, yelela bona ungawi. 13Akunasilingo esiniwisileko ngaphandle kwalokho okujayelekileko ebantwini. Nje-ke uZimu uthembekile; angeze avume bona nilingwe ngaphezu kwamandlenu. Kodwana nanilingwako, uzaninikela nendlela yokuphepha ukuze nijamelane naso.
14Nje-ke, bangani bami abathandekako, balekelani ukulotjha abosingazimu. 15Ngikhuluma nabantu abavuthiweko, ziboneleni nina lokho engikutjhoko. 16Ikapho yokuthokoza esithokoza ngayo, ayisiyo yokuzibandakanya eengazini zakaKrestu na? Isikwa esisihlephulako akusiso sokuzibandakanya emzimbeni kaKrestu na? 17Njengombana kunesikwa sinye nje, simzimba munye nanyana sibanengi ngombana soke sihlanganyela isikwa esisodwa.
18Khumbulani abantu bakwa-Israyeli: Kanti labo abagoma umhlabelo abahlanganyeli e-aldarini na? 19Alo, ngitjho bona umhlabelo owenzelwe usingazimu ulilitho namkha usingazimu ulilitho na? 20Awa, nginqophe ekutheni imihlabelo yabarhedeni yenzelwe amadimoni; ingasi uZimu. Nje-ke angithandi bona nihlanganyele namadimoni. 21Angekhe nasela ikapho yeKosi godu nibuye nisele neyamadimoni. Angeze naba nehlanganyelo etafuleni leKosi nelamadimoni. 22Kghani sifuna ukuvusa isikhwele seKosi na? Sinamandla kunayo na?
23“Koke kuvumelekile” kodwana akusikho koke okusizako. Iye, “koke kuvumelekile” kodwana akusikho koke okwakhako. 24Akungabikhona ozifunela ubuhle bakhe, kodwana akafune nekwabanye.
25Gomani koke okuthengiswa esilarheni ngaphandle kokubuza imibuzo ngonembeza 26ngombana: “Iphasi nakho koke okukilo ngekwakaSomnini.”
27Nangabe ongakholwako animemela ekudleni, nithanda ukuya, gomani nanyana yini ebekwa phambi kwenu ngaphandle kokubuza imibuzo kanembeza. 28Kodwana nangabe omunye uthi kini: “Lokhu kuhlatjelwe abosingazimu,” ningabe nisakugoma ngebanga laloyo otjho njalo nangebanga lakanembeza, 29unembeza womunye umuntu, angitjho unembeza wenu. Ngitjho ngombana ilungelo lami lizakugwetjelwani ngonembeza womunye umuntu na? 30Nangabe ngihlanganyela ekudleni ngokuthokoza, kubayini ngifanele ngilahlwe ngebanga lalokho engithokoza uZimu ngakho na? 31Nje-ke nanyana niyagoma namkha niyasela namkha nenza nanyana yini, kwenzeni koke mayelana nedumo lakaZimu. 32Ningabangeli namunye bona akhubeke, kungaba mJuda, umGirigi namkha ibandla lakaZimu 33njengombana nami ngilinga ukuthokozisa woke umuntu ngazo zoke iindlela. Angizifuneli mina ubuhle kodwana ubuhle babanengi ukuze basindiswe.
