Abalindi bethempeli
1Iinqhema zabalindisango bezijame bunje: Emndenini kaKhorarhi bekunguMetjhelemiya umsa kaKhore osizukulwana saka-Asafa. 2Amadodana kaMetjhelemiya bekunguZakariya izibulo, alanywa nguJediyaheli, wesithathu kunguZebadiya, wesine kunguJatiniyeli, 3wesihlanu kungu-Elamu, wesithandathu kunguJehorhanani wekhomba kungu-Eliyehowenayi. 4Amadodana ka-Obede-Edomu bekunguTjhemaya olizibulo alanywa nguJehozabadi, wesithathu kunguJowarhi, wesine kunguSakari, wesihlanu kunguNetaneli, 5wesithandathu kungu-Amiyeli, wekhomba kungu-Isakari noPewuletayi wobunane. UZimu gade ambusisile u-Obede-Edomu. 6UTjhemaya umsa ka-Obede-Edomu naye gade anamadodana. Amadodana lawo bekabarholi emndenini kayise ngombana gade kuziingorho. 7Amadodana kaTjhemaya bekungu-Otini, uRefayeli, u-Obede no-Elizabadi; iinhlobo zakaTjhemaya u-Elihu noSemakiya bekumadoda anekghono. 8Zoke iinzukulwana zaka-Obede-Edomu lezo, zona namadodanazo nabafowazo bekumadoda anetlha nanamandla ekusebenzeni. Sezizoke bezimatjhumi asithandathu nambili. 9UMetjhelemiya gade anamadodana nabafowabo, kumadoda anekghono. Bebalitjhumi nabunane sebaboke. 10URhosa osizukulwana sakaMerari gade anamadodana alandelako: uTjhimri (owathi nanyana angasilo izibulo, uyise wamenza ihloko yomndeni), 11alanywa nguRhilikhiya, wesithathu kunguThebaliya, wesine kunguZakariya. Amadodana nabafowabo kaRhosa bebalitjhumi nantathu.
12Iinqhema zabalindisangwezi, ngokurholwa ziinduna zazo, gade zenza imisebenzi yokulotjha ethempelini lakaSomnini njengombana gade kwenza iinhlobo zazo. 13Isango nesango lenzelwa ifumbe ngokwemindeni emikhulu nemincani ngokufanako. 14Kwathi lokha nakuphoswa iimfumbe, zawa ngendlela le:
Ifumbe yesango langepumalanga yadla uTjhelemiya.
Ifumbe yesango langetlhagwini yadla indodana kaTjhelemiya uZakariya obegade amluleki ohlakaniphileko.
15Ifumbe yesango langesewula yadla u-Obede-Edomu.
Ifumbe yeenlulu yadla amadodanakhe.
16Ifumbe yesango langetjingalanga nendleleni ekhuphukela esangweni leTjhalekethi yadla uTjhupimu noRhosa.
Iindlwana zabalindaba bezisemaduzana. 17Imihla ngemihla bekugada amaLevi asithandathu ngepumalanga yethempeli, amane ngetlhagwini, amane ngesewula. Isilulu ngasinye besigadwa babantu ababili. 18Abane bagada indlela eya emathurini ngetjingalanga yethempeli, ababili bagada ngemathurini.
19Labo-ke bekuziinqhema zabalindisango ebegade baziinzukulwana zakaKhorarhi noMerari.
Abaphathisikhwama nezinye iinkhulu
20AmaLevi amanye gade aqalene nokuphathwa kweenlulu zethempeli lakaZimu neenlulu zeminikelo ekhethekileko. 21Iinlulwezi bezisesandleni seenhloko zomndeni kaLadani osizukulwana sakaGeritjhoni ngoJerhiyeli. 22UZetamu umsa kaJerhiyeli noJuweli umnakwabo gade balawula iinlulu zethempeli lakaSomnini.
23Godu bezisesandleni semindeni ka-Amrami, uJitsihari, uRhebroni no-Uziyeli: 24UTjhebuyeli isizukulwana sakaGeritjhoni umsa kaMosi gade asikhulu esengamele amagugu. 25U-Eliyezeri umnakwabo kaTjhebuyeli bekunguyise kaRerhabiya onguyise ka-Isaya, uyise kaJoramu, onguyise kaZikiri, uyise kaTjhelomithi. 26UTjhelomithi lo neenhlobo zakhe gade bengamele yoke iminikelo ekhethekileko eyahlukaniselwa yikosi uDavida, iinhloko zemindeni, iinduna zeenkulungwana, iinduna zamakhulu kanye nezinye iinduna zamabutho. 27Enye yepango eyahlangulwa epini bayinikelela ukutjhejwa kwethempeli lakaSomnini. 28Yoke into eyahlukaniselwa nguSamyela umboni, noSawula umsa kaKhitjhi, u-Abineri umsa kaNeri noJowabi umsa kaTseruya nazo zoke izinto ezazihlukaniselweko, gade zisesandleni sakaTjhelomithi neenhlobo zakhe.
29Emndenini kaJitsihari uKenaniya neenzukulwana zakhe gade banikelwe umsebenzi ongaphandle kwethempeli kilo loke lakwa-Israyeli kobana babe batjheji nabagwebi.
30Emndenini kaRhebroni uRhatjhabiya neenhlobo zakhe okumadoda anekghono ayikulungwana namakhulu alikhomba, gade batjheje umsebenzi wezokuphathwa kwa-Israyeli ngetjingalanga yeJordani okutjho ukuphelelisa yoke imisebenzi kaZimu neyekosabo. 31Emndenini kaRhebroni uJeriya gade ayihloko. Kwathi ngomnyaka wamatjhumi amane wokubusa kwakaDavida, kwenziwa irhubhululo, kwafunyanwa hlangana kweenzukulwana nemindeni yakwaRhebroni amadoda aziingorho eJazeri eGiliyadi. 32Iinhlobo zakaJeriya gade kumadoda anekghono. Iinhloko zemindenazo beziziinkulungwana ezimbili namakhulu alikhomba. Wona-ke ikosi uDavida yawabeka phezu kwebakwaRubeni, bakwaGadi naphezu kwesiquntu sekoro yabakwaManase mayelana nazo zoke iindaba zakaZimu nekosabo.
