1 IINKRONIKE 10

₁AmaFilista gade alwa nama-Israyeli. Ama-Israyeli abaleka phambi kwamaFilista. Inengi lama-Israyeli lafa ngokurajalaliswa entabeni iGilibowa. ₂AmaFilista amlala nje uSawula, abe abulala amadodanakhe uJonathani, u-Abinadaba noMaliki-Tjhuwa. ₃Ipi yamrhagalela uSawula. Abadumuza ngemisubi bamfikela bamkhubaza okwesabekako. ₄Nje-ke uSawula wathi kusonkhandakhe: “Rhwatjha isabulakho ungitlhofoze, kungabe kufike abarhedenaba bangirhubutjhe.” Kodwana usonkhande loyo wesaba khulu ukwenza lokho. Yeke uSawula wathatha isabulakhe wazidlhunya phezu kwayo. ₅Kuthe lokha usonkhande nakabona bonyana uSawula ufile, naye wazidlhunya phezu kwesabula, wafa. ₆USawula namadodanakhe amathathu bahlongakala. Yeke umndenakhe wahlongakala ngendlwana. ₇Kuthe lokha ama-Israyeli agade ahlala ngemrhobeni nakabona bonyana ipi yawo ibalekile nokobana uSawula namadodanakhe bahlongakele, atjhiya imizawo woke abaleka. Kwaba kungena kwamaFilista azihlalela emizini leyo-ke.

₈Ilanga emva kwepi amaFilista ahlubulisa iindumbu. Afunyana uSawula namadodanakhe barabhalele phezu kwentaba iGilibowa. ₉Amhlubulisa aqunta ihlokwakhe ayithatha kanye neenkhande zakhe, athumela umlayezo enarheni yoke yamaFilista abika iindabezi kibosingazimu nebantwini bawo. ₁₀Afaka iinkhande zakhe ngethempelini labosingazimawo, ihlokwakhe yona ayilengisa ngethempelini lakaDagoni.

₁₁Kuthe bona kuzwakale kibo boke abantu beJabetjhi-Giliyadi lokho amaFilista akwenze ngoSawula, ₁₂kwaphuma woke amadoda anesibindi ayokuthatha isidumbu sakaSawula nezamadodanakhe aziletha eJabetjhi. Bangcwaba iindumbezo ngaphasi komuthi omkhulu eJabetjhi, bebazila amalanga alikhomba balila.

₁₃USawula wahlongakala ngombana angakhange athembakale kuSomnini, akhange abulunge ilizwi lakaSomnini. Ukudlula lapho waya esangomeni bonyana ayokuthukula. ₁₄Akhange abuze indlela kuSomnini. Yeke uSomnini wamnikela ekufeni, bewathatha ubukhosi wabunikela uDavida umsa kaJese.