Pono ya go thewa le go agiwa ga Jerusalema
1Ka lebelela ka bona dinaka tše nne. 2Ka botšiša Morongwa e a bego a bolela le nna ka re: Ke eng tšeo?
Yena a re: Ke tšona dinaka tše di tšitlantšego Juda le Isiraele le Jerusalema.
3Morena a mpontšha barudi ba bane. 4Nna ka re: Bao ba tlile go dirang?
Yena a fetola a re: Dinaka tšela ke tšona tše di gašantšego Juda, gwa hlokwa le wa go emiša hlogo. Barudi ba ba tlile go raka dinaka tšeo tša bantle, le go di digela fase, bantle bao ba emišeditšego naga ya Juda dinaka ba e senya.
5Ya re ke lebelela ka bona monna a eme a swere lenti la go ela. 6Nna ka re: O ya kae?
Yena a re: Ke yo ela motse wa Jerusalema gore ke bone bophara bja wona le bonami bja wona.
7Ka bona Morongwa yola a bego a bolela le nna, a etšwa; gwa tla Morongwa a gahlana nae. 8A bolela le yena a re: Kitima, o botše lesogana leo, o re: Jerusalema go tlo dulwa e le motse molaleng, ka bontši bja batho ba gona le dikgomo tša gona. 9Morako wa wona e tlo ba nna, ke etša legora le mollo, ke le letago la gare ga wona.
10Hee, hee! Tšhabang nageng ya leboa! -- O realo Morena, -- gobane ke le tšitlanyetša thoko tše nne tša lefase! O realo Morena. 11Hee! Tšhabelang Tsione, lena ba le dutšego motseng wa Babele.
12Gobane Morena wa mašaba o re o nthometše go bantle ba ba le hlakotšego, gore letago la gagwe le bonale, gobane mokgwathalena o a iphahla. 13Le tsebe gobane ke akalatša tsogo la ka godimo ga bona, gore ba thopiwe ke ba e lego bahlanka ba bona; ke mo le tlogo tseba ge e a nthomilego e le Morena wa mašaba.
14Hlalala o thabe, wena Morwedi wa Tsione, gobane ke nna e, ke etla gore ke dule mo go wena. -- O realo Morena. --
15Mohla woo Morena o tlo gomarelwa ke ditšhaba tše dintši; mme e tlo ba batho ba ka, ka dula gare ga lena. Ke mo le tlogo tseba ge e a nthomilego e le Morena wa mašaba. 16Mme Morena o tlo tšea Juda ya ba kabelo ya gagwe ya naga e kgethwa; o tlo ikgethela motse wa Jerusalema.
17Nama yohle a e homole pele ga Morena, gobane o tsogile moagong wa gagwe o mokgethwa.
