BAROMA 13

₁Batho bohle a ba se gane go bušwa ke ba ba filwego maatla a go buša; gobane ga go na mmušo o sa tšwego go Modimo; mmušo wo o lego gona o beilwe ke Modimo. ₂Ke gona, e a nganganago le mmušo, o lwa le molao wa Modimo; gomme ba ba lwago le wona, ba oba molato. ₃Gobane babuši ga ba boifiše ge go dirwa tše botse; ba boifiša ge go dirwa tše mpe. Gomme ge o sa rate go boifa mmušo, dira tše botse, o retwe ke wona. ₄Gobane mmušo ke mohlanka wa Modimo wa go go hola. Fela, ge o dira tše mpe, gona boifa; gobane mmušo ge o swere lerumo, ga o le swarele lefela. Ke mohlanka wa Modimo, molefetši wa go otla e a dirago tše mpe. ₅Go swanetše ge ge re sa gane go bušwa, e sego ka go šia kotlo, e le ka baka la letswalo.

₆Ke ka baka leo le tšhelago makgetho; gobane ke batseta ba Modimo, ba ba beetšwego wona modiro woo. ₇Ke gona ntšhetšang bohle tše di ba lebanego. E a swanetšwego ke lekgetho le mo fe lekgetho. E a swanetšwego ke dibego le mo fe dibego. E a swanetšego go boifša le mmoife. E a swanetšego go godišwa le mo godišeng.

₈Le se ke la šala le molato wo le swanetšego go o lefa, ge e se tshwanelo ya go ratana; gobane moratamotho o phetha molao. ₉Gobane ge go itšwe: O se ke wa otswa, o se ke wa bolaya, o se ke wa utswa, o se ke wa bolela bohlatse bja maaka, o se ke wa kganyoga, le ge go ka ba le molao o mongwe, ka moka e akaretšwa ke lentšu la go re: Wa geno o mo rate ka mokgwa wo o ithatago ka wona. ₁₀Lerato ga le senyetše motho. Bjale phetho ya molao ke lona lerato.

₁₁Dirang ka mokgwa woo le tseba lebaka la gore ke nako ya go tsoga borokong, gobane go phološwa ga rena bjale ke gona go batametše go fetiša mola re sa thoma go dumela. ₁₂Bošego e šetše e le bja matlagosa, letšatši le kgauswi. Ke gona a re apoleng mediro ya leswiswi, re apareng marumo a seetša. ₁₃A re sepeleng senatla sa mosegare, e sego ka bohori le botagwa, e sego ka bootswa le ditšhila, e sego ka phapang le pefelo. ₁₄Aparang Morena Jesu Kriste; gomme pabalelo ya mmele le se ke la e fetišetša dikganyogong.