KUTOLLO 6

₁Ka bona Kwana e kgaola lehuto la pele la mahuto ao a šupago. Ka kwa se sengwe sa diphedi tšela tše nne se hlaboša lentšu la modumo se re: Tlaa o bone! ₂Ka lebelela ka bona pitsi e tšhweu; e a e nametšego a swere bora, a fiwa mphapahlogo, a tšwa e le mofenyi le wa go tlo fenya.

₃Kwana ge e kgaola lehuto la bobedi, ka kwa sephedi sa bobedi se re: Tlaa o bone! ₄Gwa tšwelela pitsi e nngwe e khulong; e a e nametšego a fiwa modiro wa go amoga lefase khutšo, gore batho ba bolayane; yena a newa lerumo le legolo.

₅Ge Kwana e kgaola lehuto la boraro, ka kwa sephedi sa boraro se re: Tlaa o bone! Ka bona go tšwelela pitsi e ntsho, e a e nametšego a swere seelaboima, a se swere ka seatla. ₆Ka kwa lentšu le e kego le gare ga diphedi tše nne, le re: Leselwana la mabele ke šeleng; maselwana a mararo a leotša ke šeleng! Ge e le makhura le morara o se di senye!

₇Ge Kwana e kgaola lehuto la bone, ka kwa lentšu la sephedi sa bone le re: Tlaa o bone! ₈Ka bona go tšwelela pitsi e tshehla, e a e nametšego, leina la gagwe ke Lehu; o latelwa ke bodulabahu. Ba fiwa maatla a go bolaya karolo ya bone ya ba mo lefaseng ka lerumo le ka tlala le ka dinkhu, le ka dibata tša naga.

₉Ge Kwana e kgaola lehuto la bohlano, ka bona ka tlase ga aletare go le meoya ya ba bolailwego ka baka la lentšu la Modimo, le ka baka la bohlatse bjo ba bego ba na le bjona, ₁₀Ba hlaboša mantšu wa mokgoši, ba re: Morena Mokgethwa Morereši! O tlo ahlola neng wa lefetša madi a rena go ba ba agilego lefaseng? ₁₁Gomme ka moka ga bona ba newa dikobo tše ditshweu, ba botšwa gore ba khutše lebakanyana, go be go tlale palo ya ba e lego bahlanka ka bona le bana ba bobona, ba ba sa tlogo bolawa byalo ka bona.

₁₂Ka bona Kwana e kgaola lehuto la go selela; gwa napa gwa tla tšhišinyego e kgolo; letšatši la fifala la swana le mokotla wa boditsi, kgwedi ya hubala boka madi. ₁₃Dinaledi tša legodimo tša wela lefaseng boka mogo ge o hlohlorwa matata a wona ge o utlautlwa ke ledimo le legolo. ₁₄Legodimo la široga bjalo ka letlakala la lengwalo ge le menwa; dithaba tšohle le dihlakehlake tša šuthišwa tša tloga madulong a tšona. ₁₅Dikgoši tša lefase tša utama mefomeng le mo magageng a dithaba, di na le bagolo le matona, le bahumi le ba maatla, le bahlanka bohle le bahunologi bohle. ₁₆Ba bolela le dithaba le mariba ba re: Re weleng, le re tšhabiše sefahlogo sa eo a dutšego sedulong sa bogoši, le re tšhabiše bogale bja Kwana. ₁₇Gobane letšatši le legolo la bogale bja yona le tlile; gomme ke mang e a kago ema?