KUTOLLO 13

₁Ka emišwa lešing la lewatle. Ka bona mo lewatleng go rotoga sebata sa dihlogo tše šupago le dinaka tše lesome. Mo dinakeng tša sona go be go na le maina a go roga Modimo. ₂Sebata seo ke se bonego se be se swana le nkwe; marofa a be a swana le a tawana; molomo o be o swana le wa tau. Mme noga ya se fa maatla a yona, le sedulo sa bogoši bja yona, le bogoši bjo bogolo. ₃Ka bona e nngwe ya dihlogo tša sona eke e gobetše wa go bolawa; fela, ntho yeo e bego e iša lehung, ya fodišwa; lefase ka moka la tlabega, la šala sebata morago. ₄Batho ba tla ba lotšha noga ka ge e neile sebata maatla, ba tla ba lotšha sebata ba re: Mokasebata ke mang? Ke mang a kago lwa naso?

₅Sa newa molomo o bolelago tše kgolo le maroga; sa newa maatla a go fetša dikgwedi tše masome a mane a metšo e mebedi se dira mediro ya sona. ₆Sa tla sa ahlama sa roga Modimo, sa roga leina la gagwe le Ngwako o mokgethwa wa gagwe, le ba ba agilego legodimong. ₇Sa dumelelwa go lwa le bakgethwa le go ba fenya; sa fiwa maatla a go buša meloko le merafo le maleme le ditšhaba tšohle. ₈Se tlo lotšhwa ke bohle ba ba agilego lefaseng, bao maina a bona a sa kago a ngwalwa pukung ya bophelo ya Kwana ye e hlabilwego, ba ngwalwa go tloga go theweng ga lefase.

₉E a nago le tsebe a a kwe. ₁₀E a gapago mathopša, le yena o tlo ya bothopša. E a bolayago ka lerumo, le yena o tlo bolawa ka lerumo. Ke moo go nyakago kgotlelelo le tumelo ya bakgethwa.

₁₁Ka bona sebata se sengwe se rotoga lefaseng, se na le dinaka tše pedi tše e kego ke tša kwana, mola se bolela boka noga. ₁₂Se tla se dira maatla ka moka a sebata sa pele, sona se lebeletše; se dira gore lefase le ba ba agilego mo go lona ba lotšhe sebata seo sa pele, se se fodilego ntho ya sona e bego e iša lehung. ₁₃Se dira mehlolo, sa ba sa neša mollo o tšwago legodimong, wa wela lefaseng, batho ba lebeletše. ₁₄Ba ba agilego lefaseng se ba aroša ka mehlolo ya sona ye se dumeletšwego go e dira pele ga sebata sela. Se botša ba ba agilego lefaseng se re: Sebata seo sa ntho ya lerumo se se boetšego sa phela, ba se betlele seswantšho. ₁₅Sona se fiwa maatla a gore seswantšho seo sa sebata sa pele se se fe bophelo, seswantšho seo se bolele, sa be sa kgona go bolaiša ba ba sa khunamelego seswantšho sa sebata. ₁₆Se kgona gore batho bohle, ba banyane le bagolo, bahumi le badiidi, bahunologi le bahlanka, ba swaiwe ka leswao seatleng se setona le ge e le phatleng, ₁₇le gore go se be le e a kgonago go reka le go rekiša, ge e se eo a nago le leswao la leina le sebata, le ge e le palo ya leina la sona.

₁₈Moo go nyaka bohlale; e a nago le tlhaologanyo a a hlathe palo ya sebata, gobane ke palo ya motho. Palo ya sona ke makgolo a selelago a nago le masome a selelago a metšo e selelago.