PSALME ya 94

₁Modimo Molefetši Morena Modimo Molefetši, tšwelela!

₂Iphagamiše, wena Moahlodi wa lefase; o bušetše baikgogomoši tše ba di dirilego.

₃Go tlo kgaotša neng? Morena, go tlo kgaotša neng go nyakalala ga bakgopo?

₄Ba fufula mare ge ba bolabola maikgantšho; badirabobe bohle ba a ikgantšha.

₅Morena, ba šilakanya setšhaba sa gago; ba gatakanya naga ya gago.

₆Ba bolaya basadi ba bahlologadi le badiiledi, ba kgabutla le dišuanyana.

₇Ba re: Morena ga a bone selo; Modimo wa Jakobo ga a di lemoge!

₈Lemogang, lena le lego mašilo mo go batho! Lena ditlatla, le tlo hlalefa neng?

₉A le re e a šemilego tsebe ga a kwe? Mmopi wa leihlo le re ga a bone?

₁₀Mootla ditšhaba le re ga lefetše? Mola e le yena a rutago batho tlhaloganyo!

₁₁Morena o tseba kgopolo tša batho e le tša lefela.

₁₂Monna wa lehlogonolo ke yo o mo solago, wa mo ruta molao wa gago, Morena.

₁₃Gore a khutše matšatši a mabe, go fihla ge yo kgopo a epelwa molete.

₁₄Gomme Morena ga a lahle setšhaba sa gagwe, mme naga ya gagwe a ka se e tlogele.

₁₅Gobane toko e tlo ba ya boa, ya ba molao o tlogo latelwa ke bohle ba dipelo tša go loka.

₁₆Ke mang a nkemelago ge ke lwa le bakgopo? Ke mang wa go ntwela, ge ke lwa le badirabobe?

₁₇Ge nkabe ke se thušwe ke Morena, moya wa ka o kabe o šetše o ituletše khomolelong.

₁₈Mohla ke šetše ke re ke a thekesela, ka thekgwa ke botho bja gago, Morena.

₁₉Mohla ke goletšwe ke dipelaelo ka teng ga ka, ka bewa pelo ke dikhomotšo tša gago.

₂₀Ga o lakane le letlatswa la go senya, la ba dirago bosenyi molao.

₂₁Ba kwana ge ba yo lwa le wa moya wa go loka, ba lahla madi a se nago molato.

₂₂Ge e le nna, sebo sa ka ke Morena; Modimo wa ka ke mo tseba e le lentswe setšhabelo.

₂₃O ba lefetša bokgopo bja bona o ba fediša ka bobe bja bona. O a ba fediša, Morena Modimo wa rena.