PSALME ya 73

₁Ka kgonthe, Modimo o setša Isiraele; o setša ba pelotshekegi.

₂Mme nna ke nyakilo kgopša, lenao la ka le nyakilo thedimoga,

₃Ge ke pelokgolela baipoti, ke bona ba babe ba dula ba thabile.

₄Ga ba na se se ba tlemago; mme mebele ya bona e tiile, e nonne.

₅Tshwenyego tša batho ba bangwe go bona ga dio; ga ba otlwe bjalo ka ba bangwe;

₆mme ba kgona go apara pheta ya boikgodišo; le bošoro go bona ke seaparo.

₇Bošaedi bja bona bo tšwa go noneng, go tšwelela dikelelo tša dipelo.

₈Sa bona ke dikwero le ditshele, le go lakana motho; mme ba bolela ba iphagamiša.

₉Melomo ba e iša kua legodimong, mme maleme a bona a sepela lefaseng.

₁₀Ke tšona tše ba goketšago batho ba gabo ka tšona, ba ba kgodiša ka meetse a tletšego.

₁₁Ba re: Modimo o di tseba kae! Yogodimodimo a o na le se a se tsebago?

₁₂Ke bona bao gee, ba babe, ba go dula ba iketla ka mehla, ba atelwa ke menono.

₁₃Hleng e ke ke lefela ge ke seketša pelo ya ka, ge ke hlapa diatla ka go ila dibe?

₁₄Le ge go le bjalo ke a otlwa ka matšatši ohle; ka mehla ke tsoga ke solwa.

₁₅A nke ke ipolele; nkile ka re: Ke tlo hlanogela mohuta wo wa bana ba gago!

₁₆Gomme ka re ke akanya taba yeo gore ke e hlaloganye, ka hwetša e nthatafalela.

₁₇Ka ba ka ya Sekgethweng sa Modimo, le gona ka šetša bofelo bja bala.

₁₈Anthe o ba beile mo matheleding; o ba uša ba robega.

₁₉Re tšhoga ba lobile go se thata, ba fedile ka di šiišago.

₂₀Ba ile bjalo ka diloro ge o phafogile. Wena Mong wa rena ge o tsoga, o široša maina a bona.

₂₁Mola pelo ya ka e sa baba, le letswalo la ka le sa gana,

₂₂ke be ke le lešilo ke sa tsebe selo, wa mpona ke le bjalo ka phoofolo.

₂₃Ge e le nna ke dula ke na nago; o ntshwere ka seatla sa ka sa le letona.

₂₄O ntshepediša ka morero wago, wa tlo ba wa nkamogela wa nkgodiša.

₂₅Ke na le mang legodimong? Le mo lefaseng go nkgahla mang ge e se wena?

₂₆Le ge nka felelwa ke mmele le pelo, wena Modimo o dula o le lentswe la pelo ya ka, o le legae la ka neng le neng.

₂₇Gobane šebao, ba ba lego kgole nago ba a loba; bohle ba ba go hlalago o tlo ba fediša.

₂₈Ge e le nna ke natefelwa ke go ba kgauswi le Modimo. Setšhabelo sa ka, ke tseba e le wena Mongaka Morena. Go bjalo, gore ke be ke bolele ditiro tša gago ka moka.