Modimo Mofenyi
Ya mohlabeledi. Sefela sa Dafida. Kopelo.
1Modimo o a tsoga! Manaba a gagwe a a gašana! Ba ba mo hloilego ba tšhaba ge a fihla.
2Ba tloga boka muši ge o tologa le phefo; ba bjalo ka moti ge o tologa mollong. Ba babe ba loba ge go fihla yena Modimo.
3Mme baloki ba a thaba, ba hlalala pele ga Modimo, ba natefelwa ke lethabo.
4Opelelang Modimo, le tlotle leina la gagwe; le lekelelanye mmila wa eo a phatšago ka mašoka. Leina la gagwe ke Jehofa. Pele ga gagwe le gobe megobo.
5Ke yena tatago dišuana, le moahloledi wa bahlologadi. Ke yena Modimo; o moagong o mokgethwa wagwe.
6Ba ba lelekilwego Modimo o ba agiša magae. Bagolegwa o ba bušetša leagong. Bahlanogi bona ba tlo dula kua mahanateng.
7Modimo, mola o etšwa o etile setšhaba sago pele, mola o phatša lešoka,
8lefase la na la roromela, magodimo a tšhologa pele ga Morena; thaba ya Sinai ye ya roromela pele ga Modimo, Modimo wa Isiraele.
9Mme wena Modimo wa neša pula ye e lekanego, wa lapološa naga ya gago ye e bego e lapile.
10Mohlape wa gago wa dula go yona; mme wena Modimo wa thekga mmotlana ka botho bja gago.
11Mong wa rena wa kwatša lefoko; dikgoeledi ya ba tše dintšintši.
12Dikgoši tša dira tša tšhaba, tša tšhaba; mosadi wa lapeng a abaganya dithebola.
13A le tlo hlwa le patlame merakeng? Diphego tša leeba di phadima boka tshipitshehla; diphofa tša lona di etša gauta e tshehla.
14Mohla wola ge Ramaatla a tšitlanya dikgoši tša naga, gwa na leswela kua Tsalamona.
15Dithaba tša Basani ke dithaba tša Modimo. Dithaba tša Basani, tša dintlha tše di ntši!
16Lena dithaba tša dintlha tše dintši, le be le reng le gerula thaba ye Modimo a ithatetšego go dula go yona? Ka kgonthe Morena o tlo dula mo go yona neng le neng.
17Madira a Modimo ke a diketekete; Mong wa rena o na le ona; ke thaba ya Sinai ka bokgethwa.
18O rotogetše kua godimo, o thopolla mathopša, o tšea dibego tša batho; le baganetši ba tlo ba ba aga go Morena Modimo.
19A go retwe Morena Modimo, o re rwala ka mehla, yena Modimo morehlakodiši.
20Yena Modimo, go rena ke Modimo Mophološi; Morena Mong wa rena ke montšhalehung.
21Modimo o tlo ba a pšhatlaganya dihlogo tša manaba a gagwe, le phogo ya moganela sebeng sa gagwe.
22Mong wa rena o boletše a re: Ke tlo ba gomiša kua Basani; ke tlo ba gomiša madibeng a lewatle,
23gore dinao tša gago di hlape ka madi, gore maleme a dimpša tša gago a abelwe tša manaba.
24Modimo, ba bona makoko a gago, makoko a Modimo wa ka, a Kgoši ya Sekgethweng.
25Baopedi ba etile pele, ba latelwa ke baletši; basetsana baletši ba meropa ba ka gare.
26Lebogang Morena Mong wa rena mo diphuthegong, lena ba sediba sa Jakobo.
27Benyamini šo, yena yo monyane, yena o a ba buša, le bakgoma ba Juda, le makoko a bona, le bakgoma ba Sebulone, le bakgoma ba Nafutali.
28Modimo wa gago o laola maatla a gago. Modimo a tiiše tše a re diretšego tšona.
29Magoši a tliša dibego ka lebaka la Ntlo e kgethwa ya gago ya kua Jerusalema.
30Kgalemela sebata sela sa lehlakanoka, le sephohla sa dipoo tše di nago le mamane a ditšhaba; a ba itigele go wene ka dibego; mme ditšhaba tša go rata ntwa o di tšitlanye.
31Go tlo tla dikala tše di tšwago Egipita; Bakushe ba kganyela go iša diatla go yena Modimo.
32Lena mebušo ya lefase, hlabang sefela sa Modimo, le binele Mong wa rena koša.
33Yena monamela magodimodimo a bogologolo šoo, a hlaba mokgoši wa gagwe, mokgoši o maatla.
34Le re: Maatla ke a Modimo; borena bja gagwe bo okametše Isiraele; maatla a gagwe a marung.
35Modimo, o a boifega ka ditiro tše dikgethwa tša gago. Modimo wa Isiraele, ke wena o fago setšhaba maatla le go kgona. A go retwe yena Modimo!
