PSALME ya 66

₁Lena mafase ohle, thabelang Modimo ka mekgolokwane.

₂Hlabang sefela sa borena bja leina la gagwe, godišang bothakga bja ditheto tša gagwe.

₃Le mmolele le re: Modimo, mediro ya gago ga se ka go šiiša! Manaba a gago a loba a bone bogolo bja maatla a gago.

₄Lefase ka moka a le go lotšhe, le go binele, le hlabe sefela sa leina la gago.

₅Tlang le bone ditiro tša Modimo; o a šiiša ka tše a di dirago go bana ba batho.

₆Lewatle o kile a le šatola ya ba naga ye e omilego; noka ba e setše ka dinao; ke moo re kilego ra thaba ka yena.

₇O buša ka maatla a gagwe neng le neng; mahlo a gagwe a leta ditšhaba, bahlanogi ba se ke ba tsoga.

₈Hee lena ditšhaba! Retang Modimo wa rena; Le hlaboše mantšu a go mo godiša.

₉Yena wa go bolokela meoya ya rena bophelo, a se lese dinao tša rena tša thedimoga.

₁₀Modimo, ga o lese go re leka, ra etša tshipitshehla ye e tšwago meubeng.

₁₁O re išitše kgolegong, wa rweša magetla a rena bothata.

₁₂Wa lesa batho ba re gata dihlogo, ra tsena ka meetseng le ka mollong; mme wa ba wa re tšweletša molaleng.

₁₃Ngwakong wa gago ke tla le dihlabelo; ke phetha tše ke go enetšego tšona.

₁₄Tše ke di boletšego ka molomo, tša tšwa ganong ga ka mohla wola ke tlaletšwe.

₁₅Ke go tlišetša dihlabelo tša go nona, le diorelo tša makhura a dikgapa; ke go hlabela kgomo le dipudi.

₁₆Tlang le kweng ka moka ba go boifa Modimo, ke le anegele tšohle tše a di dirilego moya wa ka.

₁₇Ge ke mmitša ka molomo wa ka, ke ge leleme la ka le šetše le na le tebogo.

₁₈Ge pelo ya ka e kabe e nyaka tša bobe, Morena a kabe a sa ka a nkwa.

₁₉Mme bjale Modimo o nkwile, a utlwela ruri ge ke rapela.

₂₀A Modimo a lebogwe, gobane ga a ka a nyatša thapelo ya ka, ga a ka a ntlhokiša botho bja gagwe.