PSALME ya 64

₁Modimo, kwaa lentšu la ka ge ke lla; diša bophelo bja ka ge le lenaba le šiiša.

₂Mphemele ge bakgopo ba ntakana, ge badirabobe ba tsoša lerole.

₃Ke ba maleme a bogale bja marumo, a nepa motho ka mesebe ya dipolelo tša go hlokofatša.

₄Ba rata go betša yo bolo ba mo laletše; yo bolo o tšhoga ba mmetša ba sa boife.

₅Ba hlohloletšana go dira tše dimpe, ba lakana go rea melaba, ba re: Re bonwa ke mang?

₆Ba eletša tša bohlola, ba re: Re reile; go logilwe maano ruri. Matswalo le dipelo tša bona ka moka di tletše bomenetša.

₇Modimo ke yena a tlogo betša bona ka mosebe; ba tlo tšhoga ba hlabilwe.

₈Ba tlo wa ba rarilwe ke maleme a bona; gwa tlo kgotsa bohle ba ba di bonago.

₉Batho bohle ba tlo tšhoga ba re: Ke modiro wa Modimo! Ba lemoga se a se dirago.

₁₀Moloki o tlo ithabela Moreneng, a khuta ka yena; ba dipelo tša go loka ba tlo itlhalalela.