Thapelo ya ge batho ba ntlhanogela
Ya mohlabeledi, ka makope. Thuto ya Dafida.
1Modimo, theetša ge ke rapela. Se nkgerule ge ke go llela.
2Nkutlwele ruri o nkarabe; ke a phoraphora, ke bobola ke bega mahloko.
3Ke hlohlwa ke mašata a manaba le legoa la ba babe; ba ntakana bošula; ba lwa le nna ba befetšwe.
4Pelo ya ka e tlaletšwe ka teng ga ka; ke wetšwe ke tšhogo ya lehu.
5Ke swerwe ke poifo le go thothomela, ke ribegetšwe ke tlhobogo.
6Ke bile ke re: Nkabe ke be le diphego bjalo ka leeba, ke fofe ke yo itulela.
7Ka kgonthe, nkabe ke fulara ka ya kgole, ka dula lešokeng.
8Nkabeke akgofa go phonyokga phefo e tšutlago le ledimo.
9Monga ka, fediša dilo tše, o raranye maleme a bona, gobane motseng ke bona tše dišoro le ntwa.
10Ke tšona tša go potologa le merako mosegare le bošego; mo gara motse go bošula le mohlako.
11Mo gara wona go na le kgobogo; lepatlelong la wona go pateletša le go fora ga di sa tloga.
12Bjale, ge ba nkgobošago e kabe e le manaba, nkabe ke sa fele pelo. Ge ba ba ntsogelago e kabe e le ba go ntlhoya kgale, nkabe ke ba efoga.
13Anthe, ke wena monna wa gešo, wena mogwera wa ka, yo re tsebanago.
14Wena yo re bego re botana gabotse, re eya Ngwakong wa Modimo re na le makoko.
15Lehu le tlo ba kganyelela ba fologela moleteng wa bahu ba sa phela, ka gobane malapeng a bona le mo dipelong tša bona go befile.
16Ge e le nna ke bitša Modimo; mme Morena o tlo ntlhakodiša.
17Mantšiboa le bosasa le mosegare ke mo llela ke bobola; mme lentšu la ka o le kwile.
18O phološa moya wa ka a o khutšiša ntwa, mo go sa fihlego bao ba mpokago ka bontši.
19Modimo o a kwa; yena Kgoši ya mehleng o tlo ba kokobetša, bona bao ba go se fetoge, ba go se boife Modimo.
20Ba rumola ba leago; ba senya kgwerano ya Modimo.
21Melomo ya bona ke e boreledi wa lebebe, sa mo teng pelong ke kgang; polelo tša bona di etša makhura, mola tšhoša e hlomotšwe.
22Lahlela Morena morwalo wa gago; yena o tlo go babalela; a ka se ke a ba a lesa moloki ge a ka šuthišwa.
23Le gona, wa go tlo ba lahlela moleteng, banna bala ba madi le maaka, ke wena Modimo. Ba ka se ke ba phela galelele. Gomme nna ke botile wena.
