PSALME ya 53
Leswiswi la go se dumele (Ps. 14)
Ya mohlabeledi, ka bonya. Thuto ya Dafida.
1Setlaela pelong ya sona se re: Ga go Modimo! Ba dira tše di befilego, tša bolalogi. Ga go yo a dirago botse.
2Modimo a le kua magodimong, o ukametše bana ba batho, a bone ge go ka ba wa temogo yo a nyakago Modimo.
3Ba arogile ka moka ga bona; ba gobogile bohle; ga go yo a dirago botse, le o tee.
4Badirabobe bao ba go ja setšhaba sa ka, a ga ba lemoge gore lerumo le ja ba go se rapele Modimo?
5Mohla wola ba tšhogile wa go tšhoga go se se se tšhošago, ge Modimo a gašanya mašapo a ba bego ba mo bokanetše. Ba wetše dihlonyeng, ba lahlilwe ke Modimo.
6A phološo ya Isiraele e tle e etšwa Tsione! Mohla Modimo a tlogo fediša mohlako wa tšhaba sa gagwe, ke mo Jakobo a tlogo hlalala, Baisiraele ke mo ba tlogo thaba.
© Bible Society of South Africa 1986. Used with permission. All rights reserved.
