PSALME ya 48

₁Morena ke yena mogolo, Moretwaretwa wa motseng wa Modimarena thabeng e kgethwa ya gagwe.

₂Thaba ya Tsione e eme e kgahliša, e le lethabo la naga ka moka. Mošate wa kgoši e kgolo o thoko ya leboa.

₃Nywakong e megolo ya gona Modimo o tsebja ge e le yena lentswesebo.

₄Re di bone mohla wola magoši a rapane, a botoga gammogo.

₅Le ona a di bone mme a tšhoga, a šia, a tšhaba.

₆A welwa ke mororomelo gona moo, ba šokwa wa mmelegi.

₇Le maselawatle a magolo o a robaganya ka ledimo letšwabohlabela.

₈Tšona tšeo re di kwile, re bile re di bone fa ga Morena wa mašaba, fa motseng wa Modimarena. O tlo fela a o thekga neng le neng.

₉Modimo re gopola botho bja gago re le fa Ngwakong wa gago.

₁₀Ditheto a di ye le leina la gago di fihlele magomo a lefase. Letsogo la gago le tletše go loka.

₁₁Thaba ya Tsione a e ithabele, barwedi ba Juda ba hlakele pušo yaago.

₁₂Potologang thaba ya Tsione, le e bone thoko tšohle; le bale dibo tša yona.

₁₃Bogelang merako ya yona, le fete ka nywakong ya gona ya mošate; le kgone go tlo botša ditlogolo tša mehla e tlago, la re:

₁₄Modimo yo ke yena Modimo wa rena wa mehleng le neng le neng; o tlo re sepediša go ya go ile.