PSALME ya 44

₁Modimo, re kwile ka ditsebe tša rena, ge botatawešo ba re anegela tša mediro o e dirilego mehleng ya bona, mehleng ya bogologolo.

₂Ba ditšhaba o ba khudušitše ka seatla sa gago, wa agiša borawešo; ditšhaba wa di roba, bona wa ba atiša.

₃Gobane naga ye ga se ba e tšea ka marumo a bona, ga se ba fenya ka matsogo a bona; ke diatla tša gago, letsogo la gago, le seetša sa sefahlego sago, gobane o be o ba rata.

₄Modimo! Kgoši ya ka ke wena! Phalala o phološe Jakobo.

₅Ge re na le wena, re tlo katelela manaba a rena; ka leina la gago re tlo katakela ba re rumolago.

₆Gobane ga ke bote bora bja ka; le lerumo la ka le ka se mphološe.

₇Morenamoledi manabeng ke wena; ke wena o lešago barehloi hlong.

₈Modimo, re fadiša wena mehla yohle. Re leboga ina lago neng le neng.

₉Fela, bjale o lahlile, O re gakantšhitše, o sa tšwe dira le rena.

₁₀O dumetše ge manaba a re raka, ra hlakolwa ke bahloi.

₁₁Wa re gafa ra lewa bjalo ka dinku, wa re gašanya gare ga ditšhaba.

₁₂Setšhaba sa gago o se rekišitše wa go lahla, wa se boelwe ke selo ka theko ya sona.

₁₃O re gobošitše go baagišani, ra ba sekwero le sefela sa mathoko;

₁₄Wa re dira leepo go bantle; re banyatšegi ditšhabeng.

₁₅Ka mehla ke lebana le kgobogo ya ka, ke ribegetšwe ke dihlong tša sefahlego sa ka.

₁₆Ka go kwa banyefodi le barogi, ka go bona lenaba le molefetši.

₁₇Ka moka tšeo di re tletše; gomme ga ra go lebala; kgwerano ya gago ga re e hlanogele.

₁₈Dipelo tša rena ga di boele nthago; mme dinao tša rena ga di lahle tsela ya gago.

₁₉Gomme o re digetše dinageng tša diphukubje; o re khurumetša ka thiti ya lehu.

₂₀Mola re ka be re lebetše leina la Modima rena, ra iša diatla tša rena go medimo e šele.

₂₁Gona wena Modimo, o ka be o sa šitwe ke tše bjalo; ešita le dithopa tša dipelo o a di tseba.

₂₂Aowaa, ge re bolawa, ge re sengwa dinku tša go hlabja, re bolaelwa wena mehla yohle.

₂₃Phafoga, Monga rena! O reng o robala? Phakgama, o lese go re lahla moka.

₂₄O reng o uta sefahlego sa gago, wa re lebala bobotlana le mohlako wa rena?

₂₅Gobane meoya ya rena e kateletšwe leroleng, mme mebele ya rena ga e tlogelane le mmu.

₂₆Nanoga, o re hlakodiše; o re phološe, gobane o yo botho.