PSALME ya 27

₁Morena ke seetša sa ka le go phologa ga ka. Ke sa boifa mang? Morena ke yena sebo sa bophelo bja ka. Ke sa tlo tšhoga mang?

₂Mola ke khukhunetšwa ke ba babe, ba re ba je nama ya ka, ke ra bahloi ba ka le manaba a ka, ba kgopilwe ba wa.

₃Ge ke tšwelwa dira, pelo ya ka ga e tšhoge. Le ge nka tsogelwa ke tlhabano, le moo ke a holofela.

₄Se ke se kgopelago go Morena ke se tee; se ke se nyakago ke gore ke dule Ngwakong wa Morena mehla yohle ke sa phela, ke boge mabothakga a Morena, ke fahlogele Ntlokgethwa ya gagwe.

₅Gomme moo thopeng ya gagwe o nkuta ka mohla o mobe, o mphihla phapošing ya Ngwako wa gagwe, o nnametša mo lentsweng.

₆Le bjalo hlogo ya ka e tlo phagamišwa godimo ga manaba a go ntika; mme didimo tša tlhalalo ke tlo kgona go di tliša mo Ngwakong wa gagwe; ka mo opelela, yena Morena, ka hlaba sefela sa gagwe.

₇Morena kwaa! Ke hlaboša lentšu la ka ke go bitša; nkgaugele o nkarabe.

₈Pelo ya ka e re: Ke wena o itšego: Nyakang sefahlego sa ka; ya ba gona ke nyakago sefahlego sa gago Morena.

₉Se nkgerule; mme nna mohlanka wago o se nteleke o befetšwe. O Moemedi wa ka. O se ke wa ntahla wa ntlogela, wena Modimo wa go mphološa.

₁₀Gobane tate le mme bona ba ntlogetše; mme wena Morena o a nkamogela.

₁₁Morena, nthute tsela ya gago, o ntlhahle mmileng wa go loka, ka lebaka la ba ntheilego.

₁₂Se nkgafele boomo bja mpateletši, gobane ke tsogetšwe ke dihlatse tša maaka tše di pelofaletšego tša bošula.

₁₃Ge nkabe ke sa holofele go bona tše dibotse tša Morena nageng ya ba phelago, gona ga re tse.

₁₄Letela Morena, o tie maatla, o tleme pelo. Letela Morena.