PSALME ya 21

₁Morena, kgoši e thabela maatla a gago; e hlalala gagolo ka ge o phološitše.

₂O mo neile se pelo ya gagwe e bego e se kganyoga; mme topo ya molomo wagwe ga wa ka wa e gana.

₃O mo hlakaneditše ka ditšhegofatšo tše dibotse; o mo rwešitše mphapahlogo wa gauta.

₄O kgopetše go fiwa bophelo ke wena, wa mo fa go ata matšatši a go se fele go ya go ile.

₅Leina la gagwe ke le legolo ka go phološwa ke wena; o mo apešitše borena le letago.

₆Ka kgonthe o mmeile a ba tšhegofatšo tša ka mehla; o mo atla ka lethabo pele ga gago.

₇Gobane yena Kgoši o botile wena Morena; o thekgwa ke botho bja Yogodimodimo.

₈Seatla sa gago se swara manaba a gago ka moka; bahloi ba gago, letsogo la gago le tlo ba hwetša.

₉Mohla o rotogago o tlo ba dira sebešo sa mollo; Morena o tlo ba fediša ka bogale, mme mollo o tlo ba ja.

₁₀Bana ba bona o tlo ba fediša lefaseng, mohuta wa bona wa tlošwa go bana ba batho.

₁₁Ge ba go lakana, ba loga maanomabe, ba ka se kgone selo.

₁₂O tlo ba tšhoša ba tšhaba, ge o ba nepa difahlego ka mesebe.

₁₃Morena, phagama ka maatla a gago, re bine re tlotle bogale bja gago.