PSALME ya 149

₁Haleluya! Hlabelang Morena sefela se sefsa, theto ya gagwe phuthegong ya bagaugelwa.

₂A Isiraele a thabele yeo a mo dirilego, ba Tsione ba goloke Kgoši ya bona.

₃A ba rete leina lagwe ka go le binela, ba mo leletše meropa le makope.

₄Gobane Morena o kgahlwa ke setšhaba sagwe, o tšhepiša babotlana ka phološo.

₅Bagaugelwa ba gagwe a ba fadiše letago, ba mo hlalalele ba le dilaong tša bona.

₆Megolo ya bona a e be ya direto tša Modimo; diatla tša bona a e be tša marumo a magale a mabedi,

₇a gore go išwe tefetšo go ba ditšhaba, dikotlo di išwe merafong.

₈Gore dikgoši tša bona di tlengwe ka tšhipi, le dinopodi tša bona di bofiwe ka dingangane.

₉Gore ba dirwe ka molao wo o ngwadilwego; e tlo ba bokwala bja bagaugelwa ba gagwe. Haleluya!