PSALME ya 146

₁Haleluya! Reta Morena, hee moya wa ka!

₂A nke ke rete Morena ge ke sa fela ke phela; a nke ke opele sefela sa Modimo wa ka, ge ke sa fela ke le gona.

₃Se boteng magoši e lego bana ba batho, bao go sego phološo go bona.

₄Moya wa motho o a tloga, mme yena o boela mmung wa gagwe; mohla woo ke mo go felago maano a motho.

₅Wa lehlogonolo ke eo phološo ya gagwe e lego Modimo wa Jakobo, poto ya gagwe a re ke Morena Modimo wa gagwe.

₆E a dirilego magodimo le mafase le mawatle, le tšohle tše di lego mo go ona, mmatapotego wa mehleng.

₇Moahlolela ba patwago, mosolela ba tlaleng, Morena, molokolla bagolegi.

₈Morena o budola mahlo a difofu; Morena o tsoša ba bokaletšego, Morena moratabaloki.

₉Morena mohlekabafaladi, mmabaledi wa tšhuana le mosadi wa mohlologadi; mme tsela tša babe o a di raranya.

₁₀Morena o tlo buša neng le neng. Hee Tsione, ke yena Modimo wa gago wa mehleng le go ya go ile. Haleluya!