PSALME ya 116

₁Morena ke mo rata ka gobane o kwele lentšu la ka ge ke mo llela.

₂Ge ke sa fela ke phela, ke tlo mmitša ka mehla, ka gobane o ntshekegela tsebe.

₃Ke be ke tantšwe ke tlemo tša lehu; ke be ke wetšwe ke ditlalelo tša bodulabahu; ke be ke fihlile mehlakong le mahlokong,

₄ka goelela leina la Morena, ka re: Hle Morena, phološa moya wa ka!

₅Morena ke Mogaugedi, ke Moloki; mme Modimo wa rena ke yo tlhomogelo.

₆Morena ke mohleki wa mohlokamaano. Nna o mphološitše ke šetše ke hloboga.

₇Wena moya wa ka, boela bokhutšong bja gago, gobane Morena o go seditše.

₈O namoletše moya wa ka diatleng tša lehu; o tlošitše mahlo a ka megokgong; o efošitše dinao tša ka boreledi.

₉Ke tlo sepela ke lebeletšwe ke Morena, ke le mo nageng ya ba phelago.

₁₀Ke be ke holofela ka bolela ka re: Ke nna ke hlokogago kudu!

₁₁Ke gakanegile ka ba ka re: Batho ka moka ke ba maaka.

₁₂Bjale ke re, Morena ke tlo mo leboga kang tše di botse tšohle tše a ntiretšego tšona?

₁₃Ke tlo ipega ka selebogatopololo, ka bitša leina la Morena.

₁₄Keno tšaka tše ke di enetšego Morena, ke tlo di phetha ke bonwa ke setšhaba sa gagwe ka moka.

₁₅Lehu la bagaugelwa ba gagwe ke selo se segolo mahlong a gagwe.

₁₆Go bjalo, Morena! O ntlemolotše ditlemo tša ka, ka gobane ke molata wago, ke ngwana wa mme molata waago.

₁₇Ke tlo go tlišetša sedimo sa tebogo, ka bitša leina la gago, Morena.

₁₈Keno tša ka tše ke di enetšego yena Morena, ke tlo di phetha ke bonwa ke setšhaba sa gagwe ka moka,

₁₉ke le malapeng a Ngwako wa Morena, ke le mo gare ga gago, wena motse wa Jerusalema. Haleluya!