Kotlo ya ba babe
Ya mohlabeledi, sefela sa Dafida.
1Modimo, yo ke go retago, se homole!
2Gobane melomo ya babe, le melomo ya bafori, e nkahlametše; ke bolelwa ke maleme a maaka.
3Ba nkgobotla ka ditaba tša lehloyo, ba nthumola ke se ne molato.
4Ba ntsogela ka bonaba, mola nna ke ba ratile, ke ba rapeletše.
5Tše bolo ba mpušetša ka tše mpe; lerato ba mpušetša ka lehloyo.
6O ke o mmeele yo mobe a mmuše; mme lenaba a le batagane nae.
7Tshekong a tloge a tšwilwe, thapelo ya gagwe e fetoge sebe.
8Matšatši a gagwe e se be a mantši, kabelo ya gagwe e newe o šele.
9Bana ba gagwe e be dišuana, mosadi wa gagwe e be mohlologadi.
10Bana ba gagwe e be baneneri le bakgopedi, ba yo diilela kgole le marope a bona.
11Thoto ya gagwe a e tlengwe ke molefiši; tše a di rekilego a di thopše ke mathoko.
12A a hloke wa go mo dira ka botho, mme dišuana tša gagwe di se be le mogaugedi.
13Ditlogolo tša gagwe di fedišwe, leina la gagwe le hwe le ditlogolwana.
14Morena a se lebale dibe tša botataagwe; mme sebe sa mmagwe se se ke sa phumolwa.
15Morena a a dule a di lebeletše, a fediše maina a bona nageng.
16Ka gobane a sa ka a gopola go dira ka botho; sa gagwe ya ba go hlomara monna mmotlana mohloki, a rata go bolaya mojapelo.
17Maroga a a bego a a rata a a mmoele; tšhegofatšo, ye a bego a sa e rate, a e be kgole le yena.
18Maroga a gagwe a a mo apeše boka kobo, a a mo tsene bjalo ka meetse, a a etše makhura mo dithong tša gagwe.
19A a etše seaparo se a se aperego, a etše moketwana wa go itlema ka mehla.
20A e be tšona tšeo di tlogo dirwa lenaba la ka di etšwa go Morena, le bao ba mpharago ka tše mpe.
21Mme wene Morena Mong wa ka, nna o ntire se se swanetšego leina la gago; o ntlhakodiše gobane botho bja gago ke bjo bobotse.
22Gobane nna ke mmotlana mosenyegi, mme pelo ya ka ka teng ga ka e gobetše.
23Ke felela bjalo ka meriti ge e gonogile, ke tšoka boka tšie.
24Matolo a ka a fo thekesela ka go ikona dijo; le mmele wa ka o gwametše, mme ke hloka moko.
25Go bona ke wa go hlwa ke kwerwa; ge ba mpona ba šišinya dihlogo.
26Morena Modimo wa ka, a ke o nthuše, o ntlhakodiše ka botho bja gago,
27Gore ba lemoge gobane tše bjalo ke seatla sa gago, di dirwa ke wena Morena.
28Bona a ba roge, mme wena o šegofatše; bona ge ba tsoga, ba tlo lewa ke dihlong, gwa thaba molata wa gago.
29Bampeki a ba apešwe dihlong, ba iphuthe ka kgobogo boka kobo.
30Morena ke tlo mo leboga kudu ka molomo wa ka, ke tlo mo reta ke le gare ga lešaba.
31Gobane o lwela mmotlana, o mo namolela diatleng tša bao ba mo lahlilego.
