PSALME ya 107

₁Lebogang Morena, gobane ke yo bolo, ke yo botho ka mehla le mehla.

₂A ba realo baphološwa ba Morena, ba go phološwa kotsing,

₃Ba go kgobiwa kua bohlabela le bodikela, ba thoko ya borwa le ya leboa.

₄Ba go putlaputla naga ya lenyora ka tsela ya mahanateng, ba hloka motse wa go dula,

₅Ba swarwa ke tlala le lona lenyora, meoya ya bona e feletšwe maatla,

₆Ba bitša Morena ba gakanegile, a ba hlakodiša tlalelong,

₇A ba iša tseleng ya go loka, ya go gorogela magaeng;

₈Bona bao a ba leboge Morena botho le mehlolo, a go e dira go bana ba batho.

₉Ka gobane o horišwa moya wo o lapilego, le moya wa tlala o o tlatša tše di botse.

₁₀Ba go dula swiswing la thiti ya lehu, ba tlemilwe ke tšhego le tshipi,

₁₁Ka ge ba ganne lentšu la Modimo, ba nyaditše morero wa Yogodimo,

₁₂Yena a ba roba pelo ka tapišo, ba ušwa ba hloka mothuši,

₁₃Ba bitša Morena ba gakanegile, a ba hlakodiša tlalelong,

₁₄A ba ntšha swiswing la thiti ya lehu, a ripa ditlemo tša bona;

₁₅Bona bao a ba leboge Morena botho le mehlolo a go e dira go bana ba batho,

₁₆Gobane o pšhatla mamati a mphiri, o thokga mepheko ya tšhipi.

₁₇Ba mašilo ba go itlhakiša ka karogo le makgopo,

₁₈Ba ba ba hlaswa dijo ka moka, ba batamela kgoro ya go hwa,

₁₉Ba bitša Morena ba gakanegile, a ba hlakodiša tlalelong,

₂₀A roma lentšu la gagwe a ba rekola, a ba gomiša mabitleng,

₂₁Bona bao a ba leboge Morena botho le mehlolo a go e dira go bana ba batho,

₂₂Ba tliše didimo tša go leboga, ba kwatše ditiro tša gagwe ka go hlalala.

₂₃Baeti batshelamawatle, ba sela ka tsela ya meetsemagolo,

₂₄Bona ba bone ditiro tša Morena, le matete a gagwe mo madibeng,

₂₅A mola a laile, gwa tsoga ledimo la phagamiša mankwele a meetsemagolo,

₂₆Ba kukega, ba koduma, ba ba ba nolega moko di befile,

₂₇Ba dikologa, ba phokaela, mantiko a ba swara ba ba ba hloboga,

₂₈Ba bitša Morena ba gakanegile, a ba hlakodiša tlalelong,

₂₉A latša ledimo, gwa napa gwa ruthela, mankwele ala a ikhomolela,

₃₀Ba thaba ge go sile, ge a ba iša letšibogong le ba bego ba le nyaka;

₃₁Bona bao a ba leboge Morena botho le mehlolo a go e dira go bana ba batho,

₃₂Ba mo rete gare ga mašaba, ba mo tumiše kgorong ya banna.

₃₃O pšhiša dinoka, ya ba lešabašaba; meela ya meetse ya oma;

₃₄Naga ya mašemo ya ba e tshehla; o dira bjalo ge go senya baagi ba yona.

₃₅O upša a buša madiba lešokeng, naga ya lenyora ya ela dinoka.

₃₆A agiša ba ditlala gona moo, ba thea motse wa legae,

₃₇Ba lema mašemo, ba bjala dihlare, ba fula dienywa ba buna;

₃₈A ba šegofatša ka boati bjo bogolo; dikgomo tša bona a se lese tša notlega.

₃₉Ba be ba notlegile mme ba loba ba patilwe ke go hlaka le ka mahloko.

₄₀Babuši a ba tšhilafatša ka nyatšego, a ba dira baneneri ba mahanateng mo go sego tsela.

₄₁Mme modiidi o mo ntšha mo tšhegong, a mo phagamiša, moloko wa gagwe wa etša mohlape go ata.

₄₂Baloki ba di bona mme ba di thabela; bakgopo ka moka melomo ya bona ya thibja.

₄₃Yo bohlale ke mang wa go šetša tšona tše, a lemoga botho bja Morena?