1Kwaa! A ga se Bohlale bo bitšago? -- A ga se Tlhaloganyo e goelelago? 2Bo eme ntsweng la go okama mmila, magahlano a ditsela. 3Bo eme kgorong, le dikgorwaneng tša motse, bo goeletša bo re: 4Hee banna! Nna ke bitša lena; lentšu ke hlabošetša bana ba batho. 5Hee lena mašilo! Ithuteng bohlale; lena ditlatla! Le ithute tlhaloganyo. 6Kwang, ke bolela tabataba; ke ahlama ka tša go loka. 7Ganong gaka go tša maano a therešo. Melomo yaka e hlaswa bokgopo. 8Polelo tšaka tšohle ke tša toko; go tšona ga go bomenetša le go fora. 9Wa tlhaloganyo o tlo hwetša di rereša tšohle; mohlalefi o re di lokile. 10Amogelang ditsholo tša ka; di fetiša tshipitshehla; le tsebo ya ka e fetiša tshipi ya bohlokwa. 11Bohlale bo phala dipheta ka botse; le tšohle tše di rategago ga di bo fihlele. 12Nna Bohlale ke agile le Maano; tsebo ke e hwetša ka kelello. 13Go boifa Morena ke go hloya bobe. Ke hloile boikgantšho, le boikgogomošo, le tsela tše mpe, le molomo wa go fora. 14Keletšo le thuto ya maano di na le nna; ke na le tlhaloganyo le bogale. 15Dikgoši di buša ka nna; mme bagolo, melao ya go loka ba e bea ka nna. 16Balaodi ba laola ka nna, le babuši, le bohle baahlodi ba lefase, 17ke rata ba nthatago; wa go mphafogela o tlo nkhwetša. 18Mahumo le kgodišo di go nna, le leruoruo, le go loka. 19Seenywa saka ke se bolo, se phala tshipi e khwibidu, tshipi ya bohlokwa; ke ruiša motho se fetago tshipitshehla tshekegi. 20Ke tla ka mmila wa toko; ga ke aroge tsela ya molao; 21gore ke nee banthati leruo le ruri, ke ba tlaletše nywako ya matlotlo. 22Nna, Morena o ntlhomile mola a thoma ditsela tša gagwe; nna ke wa mola a sešo a dira mediro ya gagwe. 23Ke ge ke šetše ke beilwe kgoši kgalekgale, pele ga mathomothomo, lefase le sešo la hlolwa. 24Ka wa mola go sešo gwa tswalwa madiba, go sešo gwa ba le methopo e elago meetse. 25Ke wa mola dithaba di sešo tša thewa, le meboto e sešo ya ba gona. 26Ke wa mola a sešo a dira mafase le mašoka, go sešo gwa ba le marole a lefase. 27Mola a thekga magodimo, ke be ke le gona, le mola a ruma morumo wa bodiba. 28Mola a bapa lerata kua godimo, mola go seloga methopo ya bodiba, 29mola a beela mawatle magomo, gore meetse a se sele mo a go boletšego, mola a thea metheo ya lefase. 30Ke ge ke na nae ke le mohlankana wagwe, ke mo kgahla mehla yohle, ke bapala pele ga gagwe ka mehla, 31ke bapala mo faseng la gagwe lohle, ke kgahlwa ke bana ba batho. 32Bjale bana ba ka! Le nkweng! Ba lehlogonolo ke bao ba lotago tsela tšaka. 33Kwang dithuto le hlalefe; le se ke la di lahla. 34Wa lehlogonolo ke motho e a nkwago, a fela a hlapetša kgoro tša ka, a leta dijakwana tša mejako ya ka. 35Gobane monkhwetši o hwetša bophelo, o thabelwa ke Morena. 36Monthumodi o gataka moya wagwe; bohle ba ba ntlhoilego ba ratile lehu.
