Tšhaba go itlema, le bobodu, le maaka, le ditšhila
1Ngwanaka! Ge o itlemile wa re: Ke humetše ngwana wešo, wa fana diatla le motho, 2ge o itlemile ka ntšu la molomo, gona o tlemilwe ka polelo tša molomo wago. 3Gona, e sa le bjale, dira se o se boletšego, ngwanaka, gobane o atleng tša ngwana weno. Yaa o mo otelele o mo phafogele. 4O kune mahlo a gago boroko; o se dumelele dintšhi tšago go otsela, 5o be o phonyokge boka phudufudu molabeng, boka nonyana e bego e tantšwe.
6Sebodu, yaa go mohlwa o bone mokgwa wa wona; o tle o hlalefe. 7Ga o ne mokgoma, le ge e le molaki, goba molaodi; 8le ge go le bjalo, o ikgobela dijo lehlabula, o ipeela dilewa selemo. 9Mme wena sebodu! O tlo robala go le gokae? Borokong bja gago o tlo tsoga neng? 10Wena o re: Ke sa ya le borokonyana! Ke sa bo re šwaa; ke sa hunyetša matsogo ke robetše! 11Mme tšhego ya go tlela bjalo ka mokhukhunetši, bohloki bja go tlela wa mogale.
12Mothomobe, monna wa sehlola, ke yeo wa go tšama a senya ditaba; 13o kobonya ka mahlo, o thetša ka lenao, o kgwathetša ka menwana; 14ke wa pelo ya bomenemene, wa go hlwa a loga maanomabe, molohlanyabatho. 15Yena eo o tlo tšhoga kotsi e mo wetše, a phumegile mme a hloka moalafi.
16Go na le dilo tše tshelela tše Morena a di hloilego; ke tše di šupago tše a di hlaswago: 17Ke mahlomaikgantšhi, ke leme la maaka, ke atla tša go thula madi a se nago molato, 18ke pelo ya go loga maanomabe, ke kitimešitomakganyelabobeng. 19Ke hlatsiphori kgebamaaka, ke molohlanyabanabamotho.
20Ngwanaka! Boloka ditaelo tša tatago, o se lahle thuto tša mmago. 21Dula o di tlemeletše mo pelong ya gago, o di apere molaleng wa gago. 22A di go hlahle mo o yago, di go diše ge o robetše, di bolele nago ge o tsoga. 23Gobane tayo ke lebone, thuto ke seetša; tšholo le keletšo ke tsela ya bophelo. 24Di tlo go efoša mosadi e mobe, le leme la boreledi la mosadi o šele. 25Pelo ya gago a e se kganyoge botse bja gagwe, a se tlo go tanya ka ditebalebo. 26Mosadi wa seotswa o diitša motho, a be a hloka le bogobe: ge e le wa monna o šele, o hlakola motho moya, lona lehumohumo.
27A fa motho a ka gokogela mollo sehubeng a se tšhume diaparo tšagwe? 28A motho a ka gata leretha a se fse maoto? 29Ke tša eo a tsenego go mosadi wa wa gabo. E a mo kgomago a ka se tšwe a se ne molato. 30Hodu ga go nyatšwe la go utswa le lapile le swerwe ke tlala. 31Ge le ka swarwa, le lefa gašupa; le ka ntšha thoto yohle ya lapeng. 32Ge e le e a otswago ke lešilo; e a dirago tšeo o itshenyetša bophelo. 33Sa gagwe ke dikotlo le dihlong, le kgobogo e sa phumolwego. 34Gobane lehufa ke kgalefo ya monna; mohla wa tefetšo ga a šetše; 35ga a amogele selefa; ga a fepeletšege, le ge o ka mo tetelela ka dineo.
