DIEMA 15

₁Phetolo e boleta e phohliša dipefelo; lentšu la go ferelela le tsoša bogale.

₂Leme la bahlale le tsefiša tsebo; melomo ya ditlatla e tšhologa tša bošilo.

₃A mo go fela, mahlo a Morena; a okametše ba babe le ba bolo.

₄Boleta bja leleme ke sehlare sa bophelo; ge le sa loke le gobatša moyemotho.

₅Lešilo le nyatša tayo ya tatalo; go tlo hlalefa modumelatsholo.

₆Ngwako wa moloko o na le matlotlo; leruo la e mobe le na le mafereka.

₇Melomo ya bahlale e bjala tsebo; pelo ya lešilo ga e loke.

₈Morena o nyenya didimo tša babe; o kgahlwa ke thapelo ya baloki.

₉Morena o nyenya tsela ya yo mobe; o rata wa go phegelela toko.

₁₀Moarogi o tlo tlelwa ke dikotlo tše bohloko; monyatšatšholo o tlo hwa.

₁₁Bodulabahu le sekoti sa tahlego, Morena o a di bona; o bona le pelo tša bana ba batho.

₁₂Mokweri ga a rate eo wa go mo sola; ga a ye go mohlale.

₁₃Pelo e thabilego e thakga, sefahlogo; mojapelo o gataka moya.

₁₄Pelotlhalefi e tsomeša tsebo; mahlo a setlatla a thabela tša bošilo.

₁₅Yo madimabe matšatši a gagwe ka moka ke mabe; mafolofolo ke monyanya wa ka mehla.

₁₆Lehumo le legolo le hlokišago khutšo, le phalwa ke tšhego e nago le go boifa Morena.

₁₇Go ja morogo re ratana, go phala mola go hlabilwe kgomo e nonnego re hloyana.

₁₈Wa sebefedi o tsoša tšhitano; wa go se fele pelo o fediša kgang.

₁₉Tsela yy sebodu e hwa ka meetlwa; ya moloki ke mmila, e lekelane.

₂₀Ngwanamohlalefi o kgahla tatagwe; monyatšammagwe ke motho wa lešilo.

₂₁Mohlokakgopolo o thabela tša bošilo; monna wa kelello o swara tsela ya go loka.

₂₂Maano a padile, go se keletšano; a tlo kgonega ge baeletši ba ka ata.

₂₃Monna o thabela phetolo ya molomo wagwe; ka kgonthe lentšu la go tla lebakeng la gona, ke lona le le botse.

₂₄Go yo bohlale mmila wa bophelo o iša godimo, gore a tlogelane le bodulabahu bo se kgole.

₂₅Motse wa baipoti o tlo thubja ke Morena; mosadi wa mohlologadi o mo kgaolela tšhemo.

₂₆Morena o hlaswa maano a mabe; tše e sego tšhila ke polelo tše di rategago.

₂₇Wa bokgonatha o itšhenyetša motse; go tlo phela moilatsogolekobong.

₂₈Pelo ya moloki e akanya diphetolo; molomo wa yo kgopo o tšhologa tše di befilego.

₂₉Morena o kgole le ba babe; o kwa dithapelo tša baloki.

₃₀Mahlo a mašweu a thabiša pelo; foko le bolo le tiiša ditho.

₃₁Tsebe e thaetšago tsholo ye e phedišago, e itiša le bahlale.

₃₂Molahlathuto o nyatša bophelo bja gagwe; mothaetša tšholo o huma tlhaloganyo.

₃₃Go šia Morena ke yona thuto ya bohlale; boikobetšo bo latelwa ke kgodišo.