OBADYA 1

₁Pono ya Obadya. Se Morena Mong a bohle a se bolelago a era Edomo. Re kwele lentšu le le tšwago go Morena. Motseta o romilwe a ya dithabeng a re: Tsogang re yo hula felo fao. ₂Tseba gore ke go dira e monyane gare ga ditšhaba, wa tlo nyatšega gagolo. ₃O forilwe ke boikgantšho bja pelo ya gago, wena modulamariba a mantswe. Wa re o agile kua tletlolo, mo pelong ya gago wa re: Ke mang a kago ntheolela fase? ₄Le ge o ka akalala bjalo ka lenong, wa aga sehlaga sa gago kua gare ga dinaledi, ke tlo go fološa moo. O realo Morena. ₅Ge o ka tlelwa ke mahodu bošego, le ge e le bahlakodi, a e ka se be go senyegelwa? A ga ke re bona ba ka utswa tše ba lekanego? -- Mme ge o ka tlelwa ke ba go fula kenyo tša gago, a ba ka se go šiele dipudutša? ₆Mme bjale Esau ba a mo fenyeka; go fuputšwa le matlotlo a a fihlilwego. ₇Banna bohle ba o bego o lakane nabo ba go iša mellwaneng; ba go forile bohle ba o bego o gwerane nabo; ba go kgonne. Ba ba bego ba eja bogobe bjago, ba go epetše moreo. -- Ga a di hlaloganye. ₈Ka kgonthe, Morena o itše: Mohla woo ke tlo ba ke fedišitše ba bohlale ba Edomo, le ba tlhaloganyo dithabeng tša ga Esau. ₉Hee Themane! Bagale ba gago ba nolegile moko, gore dithabeng tša Esau banna ba fele ka molato wa polao. ₁₀Molato ke sehlogo wa go se dira Jakobo ngwaneno, ge bjale o nyatšega, o le wa go fedišwamoka. ₁₁Ke tša mohla wola o eme o lebeletše, ge manaba a thopa thoto ya gagwe, ge bantle ba tsena dikgorong tša gagwe, ba tšea tša Jerusalema ka matengwa. Ke ge wena o le gona, o na le bona. ₁₂O ka be o lesitše go nyankela mohla woo wa tšatši la kotsi ya gagwe; o ka be o lešitše go sega ba ga Juda mola ba senyega, o lešitše go ba kwera mohla wa patikego. ₁₃O ka be o lesitše go tsena ka kgoro ya setšhaba sa ka, o lesitše go tla le wena, wa thabela kotsi ya bona ba šaraketšwe; o ka be o lesitše go iša dithoto tša bona seatla mohla woo wa molahlego wa bona. ₁₄O ka be o se eme difateng o fofotša baphonyokgi ba bona; e ka be mohla woo wa dikgakanego o se tlemiše mašalela a bona. ₁₅Ka kgonthe, le kgauswi tšatši la Morena la go tlela bantle bohle. Tše o di dirilego, o tlo dirwa tšona; mediro ya gago e tlo go ana hlogo. ₁₆Gobane bjalo ka ge le nwele thabeng e kgethwa ya ka, ditšhaba ka moka di tlo nwa ka mehla di bolabola tša lefela, gomme gwa tlo ba eke di be di se gona. ₁₇Fela, thabeng ya Tsione go tlo ba bophologelo, e tlo ba e kgethwa; mme ba moloko wa Jakobo ba tlo ba le magae a bona. ₁₈Moloko wa Jakobo e tlo ba mollo; moloko wa Josefa e tlo ba kgabo; mme moloko wa Esau e tlo ba makobi; ba tlo a tšhuma ba a fiša. Go ka se ke gwa šala mophonyokgi wa moloko wa Esau; gobane Morena o boletše. ₁₉Ba thoko ya borwa ba tlo tšea thaba tša Esau; ba molaleng ba tlo tšea naga ya Bafilisita; le naga ya Efuraimi le ya Samaria e tlo ba ya bona; mme ba Benyamini ba tlo tšea Gileada. ₂₀Ba ba bego ba thopilwe go mašaba a a Baisiraele, ba tlo tšea naga ye e lego ya Bakanana go fihla Tsarepata; mme mathopša a Jerusalema a a bego a le Sefaradi, a tlo tšea metse ya thoko ya borwa. ₂₁Bahlakodiši ba tlo rotogela thabeng ya Tsione, ba buša ba dithaba tša Esau; mme bogoši e tlo ba bja Morena.