NUMERI 34

₁Gomme Morena o boletše le Moshe a re: ₂Laela Baisiraele o ba botše o re: Ge le tsena nageng ya Kanana, gona e tlo ba lona lefase la magae a lena, la Kanana go goma ka mellwane ya lona. ₃Ka thoko ya borwa e tlo ba la lena go goma ka lešoka la Sini, la tloga le batagane le la Edomo. Mollwane wa lena ka thoko yeo ya borwa e tlo ba mo go fihlago Lewatle la Letswai, wa phaya la bohlabela. ₄Mollwane wa lena ka thoko yeo ya borwa e tlo ba mokonya wa diphepheng o leba Sini, wa phaya la borwa wa kgotla ka Kadese Baranea, wa leba Hatsara-Adara, wa fihla Atsimona. ₅O tlo tloga Atsimona wa fologa le Noka ya Egipita wa yo kgotla ka lewatle.

₆Thoko ya bodikela mollwane wa lena e tlo ba lewatle le legolo. Ke wona mollwane wa lena wa ka thoko ya bodikela.

₇Thoko ya leboa mollwane wa lena o tlo tloga lewatleng wa leba thaba ya Hori. ₈Go tloga thabeng ya Hori le kgaotše le lebe sefata sa Hamathi le yo kgotla ka Tsedada. ₉Mollwane o tlo fetela pele wa tla Tsifirone wa goma ka Hatsara-Enane. Ke wona mollwane wa lena ka thoko ya leboa.

₁₀Ka thoko ya bohlabela le bee mollwane wa lena go tloga Hatsara-Enane go iša Sefama. ₁₁Go tloga Sefama mollwane o tlo fologela Ribila ka thoko ya bohlabela ya Aini; wa tlo fologa ka dithaba tša Lewatleng la Genetsareta ka thoko ya bohlabela. ₁₂Mollwane o tlo fologa le noka ya Jorodane wa goma ka Lewatle la Letswai.

Ke yona naga ya lena ka mellwane ya yona ka thoko tše go fela.

₁₃Gomme Moshe a laela Baisiraele a re: Ke yona naga ye le tlogo e arolelana ka matengwa; ke yona ye Morena a laetšego a re e newa meloko e senyane le seripa sa moloko. ₁₄Ka gobane moloko wa Barubeni, go ya ka mašika a bona, le moloko wa Bagada, go ya ka mašika a bona, le seripa sa moloko wa Bamanase ba šetše ba neilwe naga ya bona. ₁₅Meloko e mebedi yeo le seripa sa ba moloko wa Bamanase ba neilwe naga ya bona ka mošono wa noka ya Jorodane go lebana le motse wa Jeriko, kgono ya bohlabela.

₁₆Gomme Morena a bolela le Moshe a re: ₁₇Maina a banna ba ba tlogo le arolela naga šea: Ke Eleasara moperisita, le Joshua morwa wa Nuni. ₁₈Mo molokong o mongwe le o mongwe le ntšhe molaodi o tee wa go arola naga. ₁₉Maina a banna bao šea: Wa moloko wa Juda ke Kalebe morwa wa Jefune. ₂₀Wa moloko wa Basimeone ke Semuele morwa wa Amihudi. ₂₁Wa moloko wa Babenyamini ke Elidada morwa wa Kisilone. ₂₂Wa moloko wa Badani molaodi ke Buki morwa wa Jogoli. ₂₃Wa moloko wa Josefa, wa leloko la Bamanase molaodi ke Haniele morwa wa Efodi. ₂₄Wa moloko wa Baefuraimi molaodi ke Kemuele morwa wa Sifitane. ₂₅Wa moloko wa Basebulone molaodi ke Elitsafane morwa Paranaga. ₂₆Wa moloko wa Isashara molaodi ke Palatiele morwa wa Asane. ₂₇Wa moloko wa Baasere molaodi ke Akihudi morwa wa Selomi. ₂₈Wa moloko wa Banafutali molaodi ke Pedaele morwa wa Amihudi.

₂₉Ke bona ba ba Morena a laetšego gore ba arolele Baisiraele naga ya Kanana.