NUMERI 25

₁Mehleng yeo ya ge Baisiraele ba dutše Sithima, setšhaba se thomile go dira bootswa le basadi ba Moaba. ₂Ba laleditše setšhaba go tla didimong tša medimo ya bona; setšhaba sa tla sa ja sa khunamela medimo ya bona. ₃Baisiraele ge ba latela Baali-Peoro ka mokgwa, wo, bogale bja Morena bja ba tukela. ₄Morena a botša Moshe a re: Ntšha bagolo bohle ba setšhaba o ba fege letšatšing pele ga Morena, gore bogale bja Morena bo gomele Baisiraele. ₅Moshe a botša baahlodi ba Isiraele a re: Ka moka bolayang ba geno ba ba latetšego Baali-Peoro.

₆A sa realo gwa tla monna e mongwe wa Baisiraele, a tliša mosadi wa Momidiani go bana babo; Moshe le ba phuthego ka moka ya Isiraele ba mmone ba sa le go boboleng pele ga mojako wa Ngwako wa Kgwerano. ₇Ya re Pinease morwa wa Eleasara motlogolo wa Arone moperisita ge a mmona, a nanoga a le gare ga phuthego a swere lerumo ka seatla; ₈a latela monna eo wa Moisiraele, a ba hwetša dilaong, a ba hlaba bobedi bja bona, monna eo wa Moisiraele, le mosadi eo a mo hlaba mpeng. Ya ba gona go fela ga kotlo mo go Baisiraele. ₉Ba ba hwilego ka kotlo yeo ke ba dikete tše masome a mabedi a metšo e mene.

₁₀Bjale Morena a bolela le Moshe a re: ₁₁Pinease morwa wa Eleasara motlogolo wa Arone moperisita o gomišitše bogale bja ka bjo bo bego bo tuketše Baisiraele ka ge a galefa a le mo gare ga bona; ka lesa go ba fetša ke galefile. ₁₂Bjale mmotše o re: Tša ka šedi; ke dira kgwerano ya ka ya khutšo nae. ₁₃Boperisita bja neng le neng e tlo ba bja gagwe le bja bana ba gagwe ba ba tlogo ba gona, ka baka la ge a galefile ka baka la Modimo wa gagwe, a direla Baisiraele poelanyo.

₁₄Ge e le leina la Moisiraele e a hlabilwego a na le mosadi wa Momidiani, e be e le Simiri morwa wa Salu, letona la lešika la Basimeone. ₁₅Leina la mosadi yeo wa Momidiani e a hlabilwego e be e le Kosibi morwedi wa Tsuri, kgošana e nngwe ya leloko la Bamidiani.

₁₆Morena a bolela le Moshe a re: ₁₇Bamidiani le ba dire manaba; le ba bolaye; ₁₈ka gobane ba le dirile ka bonaba le ka maanomabe, a ba le logetšego ona ka dilo tša Baalipeoro, le ka tša Kosibi mosadi yola wa kgošana ya Bamidiani kgaetšedi ya bona, e a bolailwego ka tsatši la kotlo ka molato wa tša Baali-Peoro.