Diema tša Bileama
1Bileama a botša Balaka a re: Felo fa, nkagele dialetare tše di šupago, o ntlhaolele dipoo tše di šupago, le dikgapana tše di šupago.
2Balaka a dira bjalo ka ge Bileama a boletše. Gomme Balaka le Bileama ba hlaba poo le kgapana mo aletareng e engwe le e engwe. 3Bileama a botša Balaka a re: Sala o eme fa sehlabelong sa gago; nna ke sa ya kwa pejana; mohlomongwe ke tlo hlakana le Morena. Gomme taba ye a tlogo nkutollela yona, ke tlo go anexela yona. A realo a ya serwaolong. 4Bileama a gahlana le Morena; a bolela a re: Ke lokišitše dialetare tše di šupago, ka hlaba poo le kgapana mo aletareng e nngwe le e nngwe.
5Gomme Morena a bea Lentšu mo molomong wa Bileama, a re: Boela go Balaka o bolele lona leo. 6Bileama ge a boa a hwetša Balaka a eme mo sehlabelong sa gagwe, a na le matona ka moka a Moaba.
7A hlaba seema a re:
Kwa Siria ke bitšwa ke Balaka kgoši ya Moaba.
Ke le kua thabeng tša bohlabela ke thwe:
Tla o nthogele Jakobo!
Tla o nkgalemele Isiraele!
8Nka roga bjang moserogwe wa Modimo?
ka kgalema byang mosekgalengwe wa Modimo?
9Ke mmone ke le godimo lentsweng;
ka se bogela ke le kwa madutameng.
Sese setšhaba sedulasennoši,
sesoladitšhaba tše dingwe.
10Marole a Jakobo a balwa ke mang?
Mmadi ke mang wa mehlape ya Isiraele?
A nke moya waka o hwe la baloki;
tša go tlo ntlela di etše tša bona.
11Balaka a bolela le Bileama a re: O ntira taba mang? Ke go bileditše go roga manaba a ka. Bjale šedi; o bile o ba šegofaditše.
12Bileama a fetola a re: Nna ke itota gore ke bolele tše Morena a di beago molomong waka.
13Balaka a re: Tlaa hle, re ye felo mo gongwe, mo o tlogo se bona o le ntshe; wa tlo bona dinakana tša sona fela, e sego ka moka ga sona; mme o nthogele setšhaba se o le fao. 14A mo iša mo sehlabeng sa bahlapetši thabeng ya Pisiga, a aga aletare tše di šupago, a tliša sehlabelo sa poo le kgapana mo aletareng e nngwe le e nngwe.
15Bileama a bolela le Balaka a re: Šala o eme fa sehlabelong sa gago; nna ke sa yo hlakanetša fala.
16Bileama a hlakana le Morena; Morena a mmea Lentšu molomong, a re: Boela go Balaka o mmotše lona leo. 17A tla a hwetša Balaka a sa eme sehlabelong sa gagwe, a na le matona a Moaba. Balaka a re: Morena o itšeng?
18Bileama a hlaba seema a re:
Balaka tsoga o theetše.
O ntshekegele tsebe wena morwa wa Tsiporo.
19Modimo ga se motho a kago aketša,
ga se ngwana motho e a kago thiša.
Naa a ka bolela, a napa a lesa go dira?
Naa a ka fo rera, a lesa go di phetha?
20Sedi! Nna ke laetšwe go atla; ge yena a atla, nna nka se hlanoše.
21Go Jakobo ga go hwetšwe bobe; ga
go bonwe mahlomola go Isiraele.
Morena Modimo wa bona o nabo,
ba mo gobela megobo ya kgoši.
22Modimo o ba ntšhitše Egipita;
dinaka tša bona di etša tša nare.
23Jakobo ga kgonege ka boloi;
Isiraele ga dirwe selo ka bonoge.
Go ba Jakobo le Isiraele go thwe:
Tše kaakaa di dirwa ke Modimo.
24Sese, setšhaba se tsoga wa tau ya thsadi;
se tlo nanoga bjalo ka tau.
E ka se ke ya boba e sešo ya ja nama,
e sešo ya nwa madi a ba hlabilwego.
25Balaka a bolela le Bileama a re: Ge o sa kgone go ba roga, gona o ke o lese le go ba šegofatša.
26Bileama a fetola a re: A ga nka ka go botša ka re: Ke tlo dira se Morena a mpotšago sona?
27Balaka a re: Tlaa ge, ke go iše felo mo gongwe; mohlomong re le kua Modimo a ka dumela ge o nthogela setšhaba seo. 28Balaka a mo iša thabeng ya Peoro ye e lebago thoko ya lehanateng. 29Bileama a botša Balaka a re: Nkagele aletare tše di šupago gona fa, o ntlišetše dipoo tše di šupago gona fa, le dikgapana tše di šupago. 30Balaka a dira tše Bileama a mmoditšego tšona, a hlaba poo le kgapana aletareng e nngwe le e nngwe.
