NUMERI 19

₁Morena o boletše le Moshe le Arone a re: ₂Taelo ye Morena a rego ke molao še: o re: Botša Baisiraele o re ba ntšhe kgomo e nakhulong, e se nago bosodi, e se nago lebadi, e sešogo ya rwala joko. ₃Le e nee Eleasara moperisita, gore a e iše kua ntle ga mešaša, mme e hlabiwe pele ga gagwe. ₄Eleasara moperisita a kgwathe madi a yona ka monwana, a foke a dire gašupa a leba kua mojakong wa Ngwako wa Kgwerano. ₅Yona kgomo e fišwe a lebeletše; go fišwe letlalo la yona, le nama ya yona, le madi a yona, le mošwang wa yona. ₆Moperisita a tšee legong la marokwane, le difokana tša lehlakanoka, le moretele, a di lahlele mo mollong o fišago kgomo yeo. ₇Moperisita a tsebo hlatswa diaparo tša gagwe le go hlapa mmele ka meetse, a kgone go boela mešašeng, e be wa ditšhila go fihla mantšiboa. ₈Le eo a fišitšego kgomo yeo a hlatswe diaparo tša gagwe, a hlape mmele ka meetse, a be wa ditšhila go fihla mantšiboa. ₉Go kgone go tla monna e a sekegilego a kgobele molora wa kgomo yeo, a o botege felo go sekilego ka ntle ga mešaša, o bolokelwe Baisiraele gore go dirwe meetse a thakgafatšo ka wona; ke sehlatswasebe. ₁₀Le yena yo wa go kgoba molora wa kgomo a hlatswe diaparo tša gagwe, mme a be wa ditšhila go fihla mantšiboa. Ke molao wa neng le neng wa Baisiraele, le wa badiiledi ba ba diiletšego go bona.

₁₁E a kgwathišago setopo sa motho ofe le ofe o fetša matšatši a šupago e le wa ditšhila. ₁₂Ka tšatši la boraro le ka tšatši la go šupa a tagafatšwe ka meetse ao. Ge a sa tagafatšwe ka la boraro le ka la go šupa, a ka se ke a sekega ka la go šupa. ₁₃E a kgwathišago setopo, mmele wa motho e a hwilego, mme a lesa go itagafatša, o tlo tšhilafatša Ntlo ya Morena. E mobjalo a a kgaolwe mo go Baisiraele. Ge meetse a thakgafatšo a sa fokelwe go yena, o tlo ba wa ditšhila; gomme ditšhila tša gagwe di tlo ba le yena.

₁₄Molao wa ge motho a hwela ntlong šo: Bohle ba ba tsenego ntlong yeo, le bohle ba ba lego mo go yona ba fetše matšatši a šupago e le ba ditšhila. ₁₅Le sebjana se sengwe le se sengwe se se sa khurumelwago ka sekhurumelo se se thibago, se tšhilafetše. ₁₆Le e a swarago motho e a bolailwego ka lerumo, le ge e le setoto, le ge e le mašapo a motho, le ge e le lebitla, o tlo fetša matšatši a šupago e le wa ditšhila.

₁₇Gomme e a tšhilafetšego ba mo tšeele molora wa sefišwa sehlatswa -- sebe, ba o tšhele meetse a noka o le ka pitšeng. ₁₈Motho e a se nago ditšhila a tšee sefokana sa lehlakanoka, mme a fokele ntlo le dilo tšohle, le batho ba ba lego gona, le yena eo e a kgwathilego lešapo, goba mmolawa, goba mohu, goba lebitla. ₁₉Gomme motho eo e a se nago ditšhila a fokele motho eo e a tšhilafetšego ka tšatši la boraro le ka tšatši la go šupa, a hlatswe diaparo tša gagwe, a hlape mmele ka meetse, a tšwe ditšhila ka mantšiboa.

₂₀Fela, ge motho e a tšhilafetšego a sa ithakgafatše, gona a kgaolwe phuthegong ka gobane o tlo tšhilafatša sekgethwa sa Morena. O dula a tšhilafetše ge a sa tšhelwe meetse a thakgafatšo. ₂₁A e be molao wa neng le neng, wa go re, e a fokolwago ka meetse a thakgafatšo a hlatswe diaparo tša gagwe, le e a swarago meetse a thakgafatšo o tšhilafetše go fihla mantšiboa. ₂₂Tšohle tše di kwathwago ke motho wa ditšhila, di tšhilafetše: le motho e a swarago dilo tšeo o tšhilafetše go fihla mantšiboa.