Mpherefere wa Kora
1Kora morwa wa Jitsehara morwa wa Kahathe morwa wa Lefi o kile a bitša Dathane le Abirama barwa ba Eliaba, le Oni morwa wa Pelete barwa ba Rubeni. 2Ba tsogela Moshe ba na le banna ba bangwe ba Baisiraele, ba le makgolo a mabedi le masome a mahlano, a bagolo ba phuthego ba ba badilwego. 3Ba rapa lešaba ba tsogela Moshe le Arone ba re: Le a ikgodiša! Hleng ba phuthego bohle ke ba bakgethwa ka moka ga bona, mme Morena o mo go bona! Le reng le ipea godimo ga phuthego ya Morena?
4Moshe a ba kwa, a lotšha a inametše fase. 5A kgona go bolela le Kora le lešaba la gagwe, a re: Ka moswana Morena o tlo šupa yo e lego wa gagwe, e lego e mokgethwa, yo Morena a mo dumelelago go mmatamela; gomme o tlo batametša yo a mo kgethago. 6Le dire ka mokgwa wo: Kora le lešaba la gagwe le sware meruswi. 7Le olele mollo mo go yona, le nunetše diorelo pele ga Morena, bosasa; gomme mokgethwa e tlo ba monna eo, yo Morena a mo kgethago. Le a ikgodiša, lena Balefi!
8Moshe a iša pele a bolela le Kora a re: Kwang ge, lena Balefi! 9A le sa galala ge Modimo wa Isiraele a le hlaotše mo go setšhaba sa Isiraele, a le batamaetša go yena, gore le dire mediro ya mo Ntlong ya Morena, le gore le eme pele ga phuthego modirong e lego wa yona? 10Wena le bana beno ba Balefi bohle o le batamedišitše go yena; mme bjale le nyaka le bjona boperisita. 11Ge wena le lešaba la gago ka moka le dira ka mokgwa wo, le tsogela Morena; ka gobane Arone ke mang ge le mo tsota?
12Gomme Moshe a roma motho a bitša Dathane le Abirama barwa ba Eliaba; fela, bona ba re: Re ka se ke ra rotoga. 13A ke selo se senyenyane ge o re ntšhitše nageng e elago maswi le nose, mme wa re bolaela lešokeng? Bjale gomme o šetše o ipea kgoši ya rena. 14Mo o re tlišitšego ntshe ga se naga e elago maswi le nose; ga o ešo wa re nea mašemo le dirapa tša merara! A o tlo gonya banna ba mahlo? -- Rena ga re tle.
15Moshe a befelwa gagolo, a bolela le Morena a re: O se ke wa lebelela dibego tša bona. Ga go na le o tee wa bona yo ke mo amogilego le pokolo; le o tee wa bona ga se ka ba ka mo senya.
16Ya ba gona a bolelago le Kora a re: Wena le lešaba la gago ka moka le tle pele ga Morena ka moswana; e tlo ba wena, le bona, le Arone. 17Le tlo swara meruswi, e mongwe le e mongwe o tlo swara wa gagwe, a nunetša diorelo, a fihliša moruswi le diorelo pele ga Morena; e tlo ba meruswi e makgolo a mabedi a nago le masome a mahlano; Gomme wena le Arone le tlo swara ya lena. 18Bohle ba ya ba tšea meruswi ya bona, ba olela mollo, ba nunetša diorelo, ba ema mojako wa Ngwako wa Kgwerano, ba na le Moshe le Arone. 19Kora a tla a rapile phuthego ka moka, ba ema mojako wa Ngwako wa Kgwerano. Gomme letago la Morena la bonala, la bonwa ke phuthego ka moka. 20Morena a botša Moshe le Arone a re: 21Aroganang le lešaba le ke tle ke le fetše ka bjako.
22Bona ba lotšha ba inametše fase ba re: Modimo! Wena Modimo wa meoya ya batho bohle! A e ka re ge go sentše motho o tee, wa galefela phuthego ka moka?
23Morena a fetola a re: 24Botša phutego o re: Sirogang fela mekutwaneng ya Kora le Dathane le Abirama le eme kgole thoko tšohle.
25Gomme Moshe a tsoga a ya go Dathane le Abirama; bagolo ba Baisiraele ba ya nae. 26A laela phuthego a re: Tlogang fa mekutwaneng ya banna ba babe ba; le se ke la ba la swara dilo tša bona, gore le se tlo kgogolwa gotee le dibe tša bona. 27Batho ba široga mekutwana ya Kora le Dathane le Abirama thoko tšohle.
Dathane le Abirama ba tšwela ntle ba ema diferong tša mešaša ya bona ba na le basadi ba bona, le barwa ba bona, le bana ba bona ba banyenyane. 28Moshe a re: Bjale gomme ke mo le tlogo lemoga gobane ke Morena e a nthomilego go dira tiro tše ka moka, le gore ga ke dire ka go ithatela. 29Ge batho ba ba ka hwa ka mokgwa wa batho ba bangwe, ge ba ka otlwa ka mokgwa wa batho ba bangwe, ke tla ba ke sa rongwa ke Morena. 30Fela, ge Morena a ka hlola mohlolo, lefase la ahlama la ba metša le dilo tša bona ka moka, ba theogela kua bodulabahu ba sa phela, ke mo le tlogo tseba gobane batho ba ba nyaditše Morena.
31Ya re a sa fetša go bolela mantšu ao ka moka, lefase la fatoga ka tlase ga bona. 32Lefase la ahlama la ba metša, le mešaša ya bona, le batho ka moka ba Kora, le dilo tša bona ka moka. 33Ba kodumela bodulabahu ba sa phela, le dilo tša bona ka moka; lefase la ba fihla; ya ba go fedišwa ga bona phuthegong. 34Baisiraele ka moka ba ba bego ba ba dikologile ba tšhaba ge ba kwa dikolomelo tša bona, ba re: E se re lefase la metša le rena!
35Ge e le banna bala ba makgolo a mabedi a nago le masome a mahlano ba ba bego ba swere diorelo, go tšwile mollo go Morena wa ba fiša.
36Morena a bolela le Moshe a re: 37Botša Eleasara morwa wa Arone moperisita gore a ntšhe meruswi yeo ya diorelo mo pilong; mme mollo o lego go yona o lahlelwe kgole; meruswi yona ke ya sekgethwa. 38Meruswi yeo ya banna bao ba ba sentšego meoya ya bona ka sebe se le e dire dipapetlo tša go manega aletare, ka gobane ba e tlišitše pele ga Morena, e kgethegile. Gomme a e dule e le seeletši go Baisiraele. 39Eleasara moperisita a tšea meruswi yeo ya mphiri e tlišitšwego ke bala ba ba fišitšwego; gomme ba di natla ya ba dimanego tša aletare; 40ya ba seeletši go Baisiraele sa gore motho o šele, yo e sego wa moloko wa Arone, a se ke a batamela a thuntšha diorelo pele ga Morena, gore a se tlo etša Kora le lešaba la gagwe; a se tlo dirwa tše Morena a mmoditšego ka Moshe.
41Ka la ka moswana phuthego ka moka ya Baisiraele e omantše Moshe le Arone ya re: Le bolaile setšhaba sa Morena! 42Ya re ge phuthego e kgobokana go tsogela Moshe le Arone, ya iša mahlo kua Ngwakong wa Kgwerano, ba bona o apešwa ke leru, mme letago la Morena la bonala. 43Moshe le Arone ba ya kua pele ga Ngwako wa Kgwerano; 44Morena a bolela le Moshe a re: 45Tšwang fao makgatheng a phuthego ye, ke e fetše ka bjako.
Bona ba lotšha ba inametše fase. 46Moshe a bolela le Arone a re: Napa o tšee moruswi, o olele mollo wa aletare, o nunetše diorelo, o akgofe o tšwele go phuthego o e direle poelanyo, ka gobane se se tšwilego go Morena ke kgalefo e kgolo, mme kotlo e bile e thomile. 47Arone a tšea moruswi bjalo ka ge Moshe a mo laetše, a hlaganela a tsena mo gare ga phuthego, a hwetša kotlo e šetše e thomile mo gare ga setšhaba; a nunetša diorelo, a direla setšhaba poelanyo. 48A ema mo gare ga ba ba hwilego le ba ba phelago, ya ba gona kotlo e kgaotšago. 49Ba ba hwilego ka kotlo yeo ke ba dikete tše lesome le metšo e mene le makgolo a šupago, go sa balwe bala ba ba hwilego ka molato wa Kora.
