NEHEMIA 8

₁Ge go balame kgwedi ya go šupa, mola Baisiraele ba šetše ba dutše metseng ya bona, setšhaba ka moka sa phuthegela lepatlelong la mo pele ga kgoro ya motse bokamonna o tee, ba bolela le Esera moruti wa mangwalo ba re a tliše puku ya molao wa Moshe ye Morena a e laetšego Baisiraele. ₂Moperisita Esera a tliša molao woo pele ga phuthego ya banna le basadi le bohle ba ba nago le tlhaologanyo ba kgona go kwa; e be e le ka la pele la kgwedi ya go šupa. ₃Gona moo lepatlelong la pele ga kgoro ya motse a ba balela puku yeo, a thoma ge go esa, ya ba mosegare o mogolo a sa bala, go na le banna le basadi le ba ba nago le tlhaologanyo; gomme ditsebe ka moka tša setšhaba di be di sekegetše taba tša puku ya melao.

₄Esera moruti wa mangwalo o be a eme godimo ga sethala se ba bego ba se diretše taba ye; hleng ga gagwe ka letsogong la gagwe le letona go be go eme Mathithya, le Sema, le Anaya, le Uria, le Hilikia, le Maaseya; ka go la ntsogošo go be go eme Pedaya, le Misaele, le Malakia, le Hasuma, le Hasibadana, le Sekaria, le Mesulama.

₅Esera a phutholla puku ba mo lebeletše bohle, a ukametše setšhaba ka moka; ya re ge a phutholla puku, setšhaba ka moka sa ema.

₆Esera a reta Morena Modimo o mogolo, setšhaba ka moka sa fetola sa re: Amene, Amene! Ba emiša matsogo, ba tsebo inama, ba lotšha Morena ba inamišitše difahlogo.

₇Gomme Jeshua, le Bani, le Serebja, le Jamini, le Akuba, le Sabathai le Hodia, le Maaseya, le Kelita, le Asaria, le Josabadi, le Hanani, le Pelaya, le Balefi, ba hlathollela setšhaba molao; setšhaba se eme felo fao. ₈Ba bala puku yeo ya molao ka go šielana ditema, ba di hlathollela batho ba di hlaologanya.

₉Nehemia yena moakanaga, le Esera moperisita moruti wa mangwalo, le Balefi ba go e hlathollela setšhaba ka moka, ba re: Letšatši le le kgethetšwe Morena Modimo wa lena; le se ke la nyama, le se ke la lla! Ba realo ka gobane batho ka moka ba be ba lla ge ba ekwa se molao o se bolelago. ₁₀Nehemia a ba rera a re: Yang le jeng dijo tše botse, le nweng tše bose, le hlallele ba ba sešogo ba apeelwa, gobane go thabela Morena ke ona maatla a rena.

₁₁Balefi ba homotša batho ka moka, ba re: Homolang, gobane tšatši le ke le lekgethwa! Lesang go hlokofala! ₁₂Bjale batho ka moka ba ya go ja le go nwa, ba hlallela ba ba hlokago, ya ba lethabo le legolo, gobane ba be ba kwišitše se ba bego ba boditšwe sona.

₁₃Ka tšatši la bobedi gwa kgobokana bagolo bohle ba meloko ya setšhaba, le baperisita le Balefi, ba phuthegela go Esera moruti wa mangwalo, gore ba rutwe mantšu a molao. ₁₄Ba hwetša mo molaong wo Morena a o laetšego Moshe go ngwadilwe gwa thwe: Ka monyanya wa mešaša ka kgwedi ya go šupa Baisiraele ba dule mešašeng. ₁₅Ba re go di kwa ba napa ba roma batho ba ya metseng ka moka ya bona le Jerusalema, ba re batho ba tšwele dithabeng ba boe le mahlare a mohlware wa gae le wa naga, le a dihlare tše di teteanego, le a molala, le matlakala ka moka a matala, gore go hlongwe mešaša ka mo go ngwadilwego ka gona.

₁₆Batho ba tšwa ba boa le mahlare, ba hloma mešaša mo dihlakeng tša nywako ya bona le malapeng a bona, le mo malapeng a Ngwako wa Modimo, le mo lepatlelong la kgoro ya meetse, le mo lepatlelong la kgoro ya Efuraimi. ₁₇Phuthego ka moka ya ba ba boilego bothopša ya hloma mešaša ya dula mešašeng; gobane go tloga mehleng ya Joshua morwa wa Nuni Baisiraele ba be ba sa ka ba dira tše bjalo, ge e se ka tšatši le; mme ya ba lethabo le legolo ka kudu. ₁₈Gomme puku ya melao ya Modimo ya hlwa e balwa ka matšatši ao ka moka; monyanya woo ba o dira ka matšatši a šupago. La seswai ya ba la pitšo e kgolo ka mokgwa wa monyanya woo.