Ba aga le ge manaba a ba tshwenya
1Bjale Sanebalathi ge a ekwa gore re aga morako wa motse, a tlalwa ke pelo, a selekega gagolo, a kwera Bajuda. 2A bolela le bana babo le ba madira a Samaria, a re: BaJuda bo ba dirang mola ba šetše ba notlegile? A ba tlo fo leswa ba aga? A ba tlo ba ba kgakola felo fao? A ba tlo kgona go phetha lehono? Maswika ao a senyegilego ka mollo a ba tlo buša ba a phediša?
3Tobia Moamoni, e a bego a eme hleng ga gagwe, a re: Le ge ba re re a aga, le phukubje e kago tabogela morako woo wa bona wa maswika, e tla o gereša.
4Joo, Modimo wa rena! Kwaa se ba se bolelago! Re šetše re le sekwero. Retološetša mašapa a bona dihlogong tša bona, ba hlakolwe, ba išwe nageng ya bothopša. 5Bobe bja bona o se ke wa bo bipa; dibe tša bona o se ke wa di phumola pele ga gago; gobane ba gobošitše baagi ba.
6Gomme rena ra fela re aga, ra kopanya morako ka moka go fihla bogareng bja wona, gobane setšhaba se be se dira ka mafolofolo.
7Sanebalathi le Tobia, le Baarabia, le Baamoni, le ba Asidodo, ge ba ekwa gore morako wa Jerusalema o a tsoga, le gore diroba tša wona di a thibja, ba befelwa gagolo. 8Ka moka ba lakana ba re: re ba tšwela dira, gore motse wa Jerusalema re o ferekanye. 9Gomme rena ra rapela Modimo wa rena; re bea bahlometši ka baka la bona; gwa hlometšwa bošego le mosegare.
10Bajuda bona ba re: Barwadi ba dikago ba feletšwe ke maatla, mme matlawa a sa atile; ga re sa kgona go aga morako wo.
11Manaba a rena a re: Ba se ke ba tseba selo; mme ba se ke ba re bona, ge e se ge re šetše re ba tsene re ba bolaya, ra fediša modiro woo. 12Go rena gwa tla Bajuda ba ba bego ba agile le manaba a rena; ba fela ba tla ba etšwa metseng ya bona, ba ba ba tla la lesome, ba fela ba re: Boelang go rena. 13Gomme nna, mo ke hweditšego go sa ahlame, mo morako o bego o sa hlaela, ka bea bahlometši ka nthago ga merako, ka ba bea ka go ya ka meloko, ba swere maruno, le ditšhoša le mara.
14Ka bona go le bjalo ka nanoga ka yo bolela le bakgoma le bagolo, ka re: Le se ke la boifa manaba ao; le išeng megopolo go Morena e lego e mogolo e a tšhabegago, mme le hlabanele bana ba bolena, le barwa ba lena, le barwedi ba lena, le basadi ba lena, le nywako ya lena. 15Manaba a rena ge a ekwa gore a sebilwe, le gore Morena o sentše morero wa ona, rena ka moka ra boela morakong, ka moka ra boela modirong wa rena.
16Go tloga mohla woo ba bangwe ba masogana a ka ba swara modiro, ba bangwe ba ema ba swere marumo le dikotse le diphemo; bakgoma bona ba be ba eme ba laola setšhaba sa Juda ka moka. 17Ba ba bego ba aga morako. Ba go rwala dikago le ba ba bego ba ba rweša, ba be ba dira ka seatla se sengwe, mme ka se sengwe ba be ba swere lerumo. 18E a bego a aga o be a itlemeletše tšhoša lethekeng, a aga a le bjalo; gomme moletši wa phalafala o be a eme hleng ga ka. 19Bagolo, le bakgoma, le ba bangwe ba setšhaba ke be ke ba boditše ka re: Modiro o godile, mme o atlaletše; mme rena re abilwe ka morako, re phatlaletše; 20ka gona, e re mo le kwago go lla phalafala, le re phalalele; Modimo wa rena o tlo re hlabanela. 21Ra swara modiro ka mokgwa woo, ra thoma ge mahuba a hlatloga, ra kgaotša ge dinaledi di bonala.
22Mehleng yeo ka bolela le setšhaba ka re: Bohle ba robale motseng wa Jerusalema le bahlanka ba bona, gore bošego ba re hlomeletše, mosegare ba re diriše. 23Gomme nna le bana bešo, le bahlanka ba ka, ka moka re be re sa apole diaporo; e mongwe le e mongwe o be a swere lerumo la gagwe le meetse a gagwe.
