Nehemia o tla go tsoša motse wa Jerusalema
1Ka kgwedi ya Nisani ka ngwaga wa masome a mabedi wa ge go buša kgoši Arithasasitha, ge beine e beilwe pele ga gagwe, nna ka e tšea ka e neela kgoši. Bjale ka ge ke sešo ka ba ka tla pele ga gagwe ke šulafetše, 2kgoši ya nthera ya re: Sefahlogo sa gago se šulafetšeng, etšwe o sa babje? Ga se sengwe, o ja pelo. Nna ka tšhoga ka kudu.
3Ka fetola ka re: A kgoši e phele ka go sa felego! Sefahlogo sa ka se ka se hlafe bjang ge motse wola go lego mabitla a botatawešo o šwalalantšwe, dikgoro tša wona di swile ka mollo!
4Kgoši ya nthera ya re: Bjale o kgopelang?
Nna ka rapela Modimo wa legodimo, 5ka tsebo bolela le kgoši ka re: Ge wene Kgoši o ka dumela, mme ge nna mohlanka wa gago ke sa foše pele ga gago, nka re: A k o nthome ke ye kua nageng ya Juda, motseng wa mabitla a botate, gore ke o tsoše.
6Gomme kgoši, le mohumagadi e a bego a dutše lehlakoreng la gagwe, ba mpotšiša ba re: Leeto la gago e tlo ba le lekae, mme o tlo boa neng? Bjale ge kgoši e rata go nthoma, ka bolela lebaka, 7ka re: Ge kgoši e ka dumela, a ke newe mangwalo a go ya go bakgoma ba mošola wa noka, a gore ba mphe tsela, ke be ke fihle Juda. 8Le gona ke neelwe lengwalo la go ya go Asafa molaki wa sekgwa sa kgoši, gore a mphe dikota tša go lokiša dikgoro tša sebo sa mo Ntlongkgethwa, le tša morako wa motse, le tša ngwako wo nna ke tlogo dula go wona. Kgoši ya ntumelela, gobane seatla se botho sa Modimo se be se na le nna.
9Ka fihla go bakgoma ba mošola wa noka, ka ba neela mangwalo a kgoši. Kgoši e be e romile le ditona tša dira le banamedi ba dipitsi ba go ya le nna. 10Sanebalathi wa Horoni, le Tobia mohlanka wa Moamoni, ge ba ekwa gore go tlile motho wa go hola Baisiraele, ba selekega ka kudu.
11Nna ge ke fihla Jerusalema ka hlwa matšatši a mararo, 12ka tsoga bošego ke nna le banna be sego nene; ka se ke ka botša motho se Modimo a bego a se beile pelong ya ka gore ke se dire Jerusalema. Lekaba le re tšwilego nalo, e be e le le bego le nametšwe ke nna. 13Ka tšwa ka kgoro ya moeding e le bošego ka leba sedibeng sa Mamokebe, ka theogela kgorong ya morole, ka lebeleša merako ya Jerusalema ka mo e bego e phušogile ka gona, le dikgoro tše di bego di swile ka mollo. 14Ka fetela kgorong ya sediba, le letšhaneng la kgoši; ka hwetša go se tsela e kago sepela lekaba le ke bego ke le nametše. 15Ka napa ka rotoga mo moeding, e le bošego, ka lebeleša merako, ka ba ka fihla fala kgorong ya moeding, mme ka boela gae.
16Bagolo bona ba be ba sa tsebe mo ke bego ke ile gona le se ke bego ke rata go se dira; gobane Bajuda ke be ke sešo ka ba botša selo, le baperisita, le bakgoma, le bao ke bego ke re ba tlo aga. 17Bjale gona ka bolela le bona ka re: Tšhego ye re lego mo go yona le a bona. Jerusalema e sa marope; dikgoro tša gona di swile ka mollo. Eriyeng re tsoše merako ya Jerusalema, gore re se ke ra hlwa re eba ba go kwerwa. 18Ka ba botša ka mo seatla sa Modimo se nkekelelago, le mantšu ao kgoši e mpoditšego ona.
Mme bona ba re: Eriyeng, re age! Ba tiišana go dira modiro o mobotse woo.
19Ya re ge Sanebalathi wa Horoni, le Tobia mohlanka wa Horoni, le Tobia mohlanka wa Moamoni, le Gesema Moarabia, ge ba ekwa go bolelwa se re se dirago, ba thoma go re kwera le go re sega, ba re: Taba ye le e dirago ke eng? A le rata go hlanogela kgoši?
20Nna ka fetola ka ba botša ka re: Modimo wa legodimo o tlo re kgoniša; gomme rena bahlanka ba gagwe re thomile, mme re a aga; ge e le bolena, ga go na se e lego sa lena fa Jerusalema; ga go buše lena felo fa; ga se marope a lena.
