Melao ya Bafarisei; mosadi wa Siro fenike; sefoa sa semuma
1Bafarisei le ba bangwe ba bamangwalo ba ba tšwago Jerusalema, ba phuthegela go yena. 2Ba bona ba bangwe ba barutiwa ba gagwe ba eja bogobe ka diatla tše ditšhila, ke go re, tše di sešogo tša hlapišwa.
3Ge e le bafarisei le Bajuda ka moka ga ba ke ba eja ba sešo ba hlapa diatla, e le gona go gomarela mekgwa ya ba bagolo. 4Le ge ba boa kgorong, ga ba je ba sešo ba hlapa. Le tše dingwe tše ntši di gona tše ba di tlwaetšego ba di gomarela, tša go hlatswa dinwelo le dipitša le meruswi le malao.
5Bjale bafarisei le bamangwalo ba mmotšiša ba re: Ke go reng barutiwa ba gago ba sa ye ka mokgwa wa bagolo, ge ba fo ja bogobe ka diatla tše ditšhila?
6Jesu a fetola a re: Jesaya o porofetile gabotse a era bolena baikaketši, ge a ngwala a re: Setšhaba se se ntheta ka melomo, mola dipelo tša bona di le kgole le nna. 7Ge ba mpoifa e fo ba lefela, ba ruta thuto ya malayabatho.
8Le tlogela molao wa Modimo, la gomarela metlwae ya batho.
9A re: Le kgona gabotse go hlokomologa molao wa Modimo, gore le gomarele metlwae ya lena. 10Gobane Moshe o itše: Godiša tatago le mmago; a re: E a rogago tatagwe le mmagwe o tlo hwa lehu. 11Lena la tla la re: Ge motho a ka botša tatagwe le mmagwe a re: Se ke bego ke swanetše go le hola ka sona ke se dirile sedimo; la re o thakgile. 12Ke mo le lesišago motho go thuša tatagwe le mmagwe. 13Le fediša molao wa Modimo ka go šetša mekgwa ya lena ye le e atlaladitšego; gomme ke tše ntši tše bjalo tše le di dirago.
14A buša a bitša lešaba le mo kgobokanela; a bolela a re: Ka moka ga lena theetšang se ke se bolelago, le kwišiše. 15Motho ga a kgone go tšhilafala ka se se mo tsenago se etšwa ntle. Tše di mo tšhilafatšago ke tše di tšwelago ntle di etšwa mo go yena. 16Ge motho a na le ditsebe tša go kwa, a a kwe.
17Ya re a tlogetše lešaba, a ile ngwakong, barutiwa ba gagwe ba mmotšiša seswantšho seo. 18A fetola a re: Anthe le lena le sa hloka tlhaologanyo? A ga le lemoge gore tše di tsenago motho di etšwa ka ntle, di ka se mo tšhilafatše? 19Ka gobane ga di tsene pelong, di tsena maleng, tša tsebo tšwela mantle ka tsela e ntšhago tšohle tše di llwego.
20A re: Tše di hlagago mothong ke tšona tše di mo tšhilafatšago. 21Mo pelong tša batho ke mo go hlagago dikgopolo tše mpe tša maotswa, le tša bohodu, le tša polao. 22Le tša tlhalo, le tša megabaru, le tša lonya, le tša bomenetša, le tša bohori, le tša mona, le tša mahlapa, le tša boikgodišo, le tša bošilo. 23Tše mpe tše ka moka di hlaga pelong tša tšhilafatša motho.
24A tloga moo a ya mathokong a Tiro le Sidone, a tsena ntlong e nngwe a sa rate go tsebja; fela, a šitwa go ikuta, 25Ka gobane mosadi e mongwe, e a bego a na le ngwananyana wa moya wa ditšhila, ge a mo kwele, a tla a wela fase maotong a Jesu. 26E be e le mosadi wa Mogerika wa mohuta wa ba Sirofenike. A kgopela Jesu gore a leleke moya woo o mobe go ngwananyana wa gagwe. 27Jesu a fetola a re: Lesa go thome go khora bana. Ga go botse ge motho a ka tšea bogobe bja bana a bo lahlela dimpšanyana.
28Mosadi a fetola a re: Go bjalo, Morena. Dimpšanyana di le tlase ga majelo di ja marathana a dijo tša bana.
29Jesu a re: Sepela! Moya o mobe o tšwile go ngwananyana wa gago. Ke realo ka baka la polelo ya gago.
30Mosadi a boela lapeng la gagwe, a hwetša ngwananyana wa gagwe a robetše malaong, moya o mobe o tšwile.
31A boa moo mathokong a Tiro, a phatša naga ya Sidone, a tla lewatleng la Galilea nageng ya Dekapoli. 32Ba tla go yena ba na le motho wa sefoa sa semuma ba mo kgopela ba re a mmee diatla. 33Jesu a tšwa nae lešabeng, a tshwa mare, a mo kgwatha leleme. 34A lelala, a fegelwa, a bolela nae a re: Hefatha! Ke go re: Thibologa!
35Motho yoo a thibologa ditsebe, le leleme la gagwe la lokologa ka pele, mme a bolela gabotse. 36Jesu a ba laela a re ba se ke ba botša motho; fela, go ba iletša ya ba gona go ba gašiša taba yeo. 37Mme ba tlabegile gagologolo ba re: Tšohle o di dirile gabotse; o kwiša difoa; o bolediša dimuma.
