MAREKA 6

₁A tloga fao a tla motseng wa gabo; barutiwa ba gagwe ba mo latela. ₂Ge go tlile tšatši la Sabatha, a ruta phuthegong, mme ba ba mo kwelego, e le ba bantši, ba tlabega ba re: Ditaba tše o di tšere kae? Ke bohlale mang bjo a bo filwego? Ke maatla mang a makaakaa a a dirago ka matsogo a gagwe? ₃A ga se yena mmetli yola morwa wa Maria, ngwanabo Jakobo le Jose le Juda le Simone? Le dikgaetšedi tša gagwe a ga di mo go rena? Ba re: O a re gakiša.

₄Jesu a bolela le bona a re: Moporofeta ga a ke a nyatšega ge e se motseng wa gabo, le metswalong ya gagwe, le lapeng la gabo.

₅Gomme felo fao ga a ka a kgona go dira mohlolo, ge e se go fodiša balwetši ba sego nene ka go ba bea diatla. ₆A kgotsa go se dumele ga bona.

A dikologa ka dinakaneng tša gona, a fela a ruta. ₇A bitša ba lesome le metšo e mebedi, a ba roma ka babedi ka babedi, a ba fa maatla a go fenya meoya ya ditšhila. ₈A ba laela a re ba se ke ba tloga le mefago, ge e se lepara fela; a re ba se ke ba tloga le mekotla le ge e le senkgwa, le ge e le tšhelete dikgwameng. ₉Dieta, a re ba rwale; fela, ba se apare dikobo tše pedi. ₁₀A re: Lapa le le tsenago go lona, le dule mo go lona, le be le fetele pele. ₁₁Mo ba ganago go le amogela le go le kwa, le tloge fao le hlohlore le lerole la dinaong tša lena, gore e be bohlatse go bona. Ruri ke a le botša, motse woo ka tšatši la kahlolo, -- metse ya Sodoma le Gomora e tlo bona tše kaone.

₁₂Barutiwa ba tšwa, ba tšama ba goelela ba re batho ba sokologe. ₁₃Ba leleka meoya e mebe e mentši, ba tlodiša balwetši ba bantši makhura, ba ba fodiša.

₁₄Kgoši Herode ge a kwele ge la Jesu le tumile, a re: Johane Mokolobetši o tsogile bahung; ke tšona di mo kgonišago go dira mehlolo.

₁₅Ba bangwe ba re: Ke Eliya.

Ba bangwe ba re: Ke moporofeta, o swana le baporofeta ba kgale.

₁₆Herode ge a di kwa a re: Ke yena Johane yo ke mo kgaotšego hlogo; o tsogile bahung. ₁₇Ka gobane Herode o be a romile bahlanka ba swara Johane; a mo tlema a mo iša kgolegong, e le ka baka la Herodia yo a bego a mo tšere e le mosadi wa Filipi ngwanabo. ₁₈Gobane Johane o be a sotše Herode a re: Ga go a go lokela ge o tšea mosadi wa ngwaneno.

₁₉Herodia a dula a mo hloile, a rata go mmolaya, mme a šitwa. ₂₀Ka gobane Herode o be a boifa Johane, a mo tseba ge e le monna wa moloki, e le e mokgethwa. A mo lotola; ditabeng tše ntši a mo kwa, a kgokgona; a upa a kganyoga go mo kwa.

₂₁Gwa ba gwa tla letšatši la tšona. Ke la mohla Herode a dirilego monyanya wa matswalo a gagwe, a o diretše dikala tša gagwe, le balaodi ba dira, le bagolo ba Galilea. ₂₂Gwa tsena morwedi wa Herodia a bina, a kgahliša Herode le ba ba bego ba dutše dijong le yena. Yena kgoši a bolela le mosetsana yoo a re: Kgopela ke go nee se o se ratago. ₂₃A ba a ena a re: Se o se kgopelago ke tlo go nea, le ge e ka ba go go arolela naga ya ka ka bogare.

₂₄Mosetsana a tšwa a yo bolela le mmagwe a re: Ke tlo kgopelang?

Mmagwe a re: Kgopela hlogo ya Johane Mokolobetši.

₂₅Mosetsana a kitima a tsena go kgoši a kgopela a re: Ke rata ge o mpha hlogo ya Johane Mokolobetši, e tle fa ka mogopo e sa le bjale.

₂₆Kgoši a nyama ka kudu. Fela a šitwa go mo tima ka ge e enne go na le ba ba dutšego dijong le yena. ₂₇A napa a roma mohlabani, a mo laela a re a yo tšea hlogo ya Johane. ₂₈Mohlabani a ya ntlong ya kgolego a mo kgaola hlogo, a e tliša ka mogopo, a e nea mosetsana yoo; mosetsana a ya a e nea mmagwe. ₂₉Ya re ge barutiwa ba Johane ba di kwa, ba tla ba rwala setoto sa gagwe, ba se boloka lebitleng.

₃₀Gomme baapostola ba boa ba phuthegela go Jesu, ba mo anegela tšohle tše ba di dirilego, le tše ba di rutilego batho. ₃₁Yena a re: Tlang re ye lešokeng re nnoši, re ye mo go sego batho, le khutše ka go nyane; ka gobane ba ba bego ba tsena ba etšwa e be e le ba bantši, ba ba hlokiša le lebaka la go ja. ₃₂Ba tloga ka leselawatle, ba ya felo go lego lešoka, mo go sego batho.

₃₃Fela, mašaba a ba bona ge ba eya; ba bantši ba mo tseba. Ba tla ba etšwa metseng ba sepela ka dinao, ba kganyelela felo moo a yago, ba bokana a sešo a fihla. ₃₄Jesu ge a tšwelela a bona e le lešaba le lentši; a ba šokelwa gobane ba be ba le bjalo ka dinku tše di se nago modiši; a thoma go ba ruta ka ditaba tše ntši. ₃₅Letšatši ge le šetše le rapama, barutiwa ba gagwe ba tla go yena ba re: Felo fa ke lešokeng, gomme letšatši le ile. ₃₆Laela batho ba ye merakeng le metseng e lego kgauswi, ba ithekele dijo.

₃₇Yena a fetola a re: A ba fiwe dijo ke bolena.

Bona ba re: A o re re ka yo reka dinkgwa ka mašeleng a makgolo a mabedi, ra ba nea ba ja?

₃₈Yena a re: Le na le dinkgwa tše kae? Sepelang le bone.

Ba ya ba hlola, ba tla ba re: Dinkgwa ke tše tlhano; dihlapi ke tše pedi.

₃₉Yena a laela a re batho ba dule fase bohle ka dihlopha bjanyeng bjo botala. ₄₀Batho ba bokana fase ka dihlopha tša ba lekgolo le tša ba masome a mahlano. ₄₁Yena a tšea dinkgwa tšeo tše tlhano le dihlapi tše pedi, a lelala, a leboga, a di ngwathaganya a nea barutiwa ba gagwe; bona ba di abela batho; le dihlapi tšela tše pedi a di arolela bohle. ₄₂Ka moka ba ja ba khora. ₄₃Ba topa marathana, gwa tlala diroto tše lesome le metšo e mebedi, ba topile le marathana a dihlapi tšela. ₄₄Gomme ba ba llego dinkgwa e be e le banna ba dikete tše tlhano.

₄₅Bjale a gapeletša barutiwa ba gagwe a re ba namele leselawatle, ba mo ete pele ba selele mošola ba ye Betsaida, yena a sa laelana le lešaba. ₄₆A re a ba kgaoletše, a rotogela thabeng a yo rapela. ₄₇E šetše e le mantšiboa, leselawatle le be le le gare ga lewatle. Yena a le lebotong a nnoši. ₄₈A bona ge ba swere bothata ka go sepediša leselawatle, gobane, phefo e be e etšwa mo ba lebilego gona. Ka tišo ya bone ya bošego a tla go bona a sepela godimo ga lewatle, a rata go ba feta. ₄₉Ge ba mmona a sepela godimo ga lewatle, ba re ke seriti, ba hlaba mokgoši. ₅₀Gobane ba ba mmona bohle, mme ba tlalelwa.

Yena a bolela le bona a re: Beang dipelo! Ke Nna! Se boifeng! ₅₁A tla a namela leselawatle la bona, mme phefo ya ruthela. Ya ba gona ba tlabegago ruri ba kgotsa; ₅₂Ka gobane ba be ba sešo ba hlaologanya modiro wola wa dinkgwa, dipelo tša bona di sa tšhogile.

₅₃Ge ba setše, ba tla nageng ya Genesareta, ba fologa leselawatle. ₅₄Ba sa namela lebotong, batho ba mo tseba ka pele. ₅₅Ba kitima ba ya mathokong ka moka a naga yeo, ba yo rwala balwetši ka maako, ba ba iša mo ba kwago gore o ile gona. ₅₆Mo gohle mo a tsenago, metsaneng le merakeng, mo go fela ba bea balwetši dikgorong, ba ba kgopelela gore ba kgwathe morumo wa kobo ya gagwe; mme bohle ba ba o kgwathilego ba fola.