MAREKA 2

₁Ge go fetile matšatši, a boela motseng wa Kaperenaume, gwa kwala gore o mo gae. ₂Gwa bokana batho ba bantši, ba tlala pele ga mojako wa ntlo, yena a ba ruta lentšu. ₃Gwa fihla ba ba tlišago motho e a rephilego ditho, ba mo rwele e le ba bane. ₄Ge ba šitwa go batamela ka baka la lešaba la batho, ba rutla hlaka ya ngwako woo, ba phula ba fološa bolao bjoo bo letšego motho yoo wa go repha ditho. ₅Jesu ge a bona tumelo ya bona, a re: Ngwanaka, o lebaletšwe dibe tša gago! A era morephaditho yoo.

₆Bjale gona moo go be go dutše ba bangwe ba bamangwalo. Bona ba eleletša dipelong tša bona ba re: ₇Motho yo o bolela dilo mang? O roga Modimo. Ke mang e a kgonago go lebalela dibe ge e se Modimo?

₈Ke ge Jesu a šetše a ba lemogile moyeng wa gagwe ge ba eleletša tše bjalo; a ba botšiša a re: Le reng le eleletša tšeo dipelong tša lena? ₉Se se bolelo ke se fe? A ke go botša morephaditho yo wa re: O lebaletšwe dibe tša gago; goba ke go re: Tsoga! Rwala malao a gago o sepele? ₁₀Fela, le tlo lemoga gobane Morwamotho o na le maatla a go lebalela dibe mo lefaseng! Ya ba gona a bolelago le yo a rephilego ditho, a re: ₁₁Ke ra wena ge ke re: Tsoga! Rwala malao a gago, o ye ngwakong wa gago.

₁₂Motho yoo a tsoga a rwala malao a gagwe, a tšwa a bonwa ke bohle. Ka moka ba tlabega, ba tumiša Modimo ba re: Tše bjalo ga re ešo ra di bona.

₁₃Jesu a buša a tšwela thoko ya lewatle; lešaba ka moka la tla go yena, mme a ba ruta. ₁₄Ya re ge a feta, a bona Lefi morwa wa Alifeo a dutše ngwakong wa lekgetho. A mmitša a re: Ntatele! Lefi a ema a mo latela.

₁₅Ya re ge Jesu a dutše dijong ngwakong wa Lefi gwa tla ba lekgetho ba bantši le badiradibe, ba dula dijong le Jesu le barutiwa ba gagwe, ka gobane ba be ba mo latetše e le ba bantši. ₁₆Gomme bamangwalo le bafarisei ge ba mmona a eja le ba lekgetho le badiradibe, ba botšiša barutiwa ba gagwe ba re: O jelang le balekgetho le badiradibe? O nwelang le bona?

₁₇Jesu ge a di kwa, a fetola a re: Ballangaka ga se ba thabilego, ke balwetši. Ba ke tlilego go ba biletša tshokokogong ga se ba ba lokilego, ke badiradibe.

₁₈Barutiwa ba Johane le ba bafarisei e be e le ba go fela ba ikona dijo. Bona bao ba tla ba re: Ke go reng barutiwa ba Johane le ba bafarisei ba ikona dijo, mola barutiwa ba gago ba sa ikone?

₁₉Jesu a fetola a re: A bagwera ba monyadi ba ka kgona go ikona ge monyadi a sa na le bona? Mehleng ya ge monyadi a sa na le bona, ba ka se kgone go ikona. ₂₀A tlo tla matšatši ao monyadi a tlogo tlošwa go bona; ke mo ba tlogo ikona.

₂₁Ga go e a beago setsiba sa lešela le lefsa seaparong se setala; setsiba seo sa go thiba se ka gagola seaparo se setala sa godiša lešoba. ₂₂Le gona morara o mofsa ga o photlelwe mo nkgong e onetšego; nkgo yeo e ka palešwa ke morara; morara wa falala, le yona nkgo ya senyega. Morara o mofsa o tšhelwa mo nkgong e mpsha.

₂₃Ka tšatši le lengwe la Sabatha ge a phatša ka mabeleng, barutiwa ba gagwe ba tšama ba ekga diako. ₂₄Bafarisei ba tla go yena ba re: O nke bone; ba reng ba dira ka Sabatha se se sa swanelago?

₂₅Yena a re: A ga lešo la bala tše Dafida a kilego a di dira mohla wola a hloka a swerwe ke tlala, a na le batho ba gagwe? ₂₆Ka mo a tsenego Ngwakong wa Modimo, mehleng yela Abyathara e le yena moperisita e mogolo, a ja dinkgwa tša go bewa pele ga Modimo, tše di bego di sa swanela go ka lewa ke motho, ge e se moperisita, a nea le bao a bego a na nabo.

₂₇Le gona Jesu a ba botša a re: Letšatši la Sabatha le diretšwe go hola motho; ga se motho e a diretšwego go hola letšatši la Sabatha. ₂₈Le gona Morwamotho, le letšatši la Sabatha, Mong wa lona ke yena.