Jesu o lekwa ke Diabolo. O thoma modiro wa gagwe
1Mehleng yeo Jesu a išwa šokeng ke Moya, gore a lekwe ke Diabolo. 2Ya re ge a feditše matšatši a masome a mane le mašego a ona a sa je selo, a ba a kwa tlala. 3Mme Moleki a batamela, a bolela nae a re: Ge o le Morwa-Modimo, bolela le mabje a a fetoge bogobe.
4Jesu a fetola a re: Go ngwadilwe gore motho ga a phele ka bogobe fela; o phela ka mantšu ohle a a tšwago molomong wa Modimo.
5Diabolo a mo iša motseng o mokgethwa, a mmea sehlweng sa Ntlokgethwa. 6A bolela nae a re: Ge o le Morwa-Modimo, ikušetše kua fase, gobane go ngwadilwe gwa thwe: O tlo go laelela barongwa ba gagwe, ba go kuka ka matsogo, gore leoto la gago le se kgopje ke lebje.
7Jesu a fetola a re: Le gona go ngwadilwe gwa thwe: Morena Modimo wa gago o se ke wa mo leka!
8Ya ba gona Diabolo a mo išitšego thabeng e telele, a mmontšha mebušo ka moka ya lefase le letago la yona; 9a bolela nae a re: Tšonatše ka moka ke tlo go neela tšona, ge o ka khunama wa lotšha nna.
10Ke mo Jesu a fetotšego a re: Ntlogele Sathane, gobane go ngwadilwe gwa thwe: o khunamele Morena Modimo wa gago, o direle Yena a nnoši!
11Ya ba gona Diabolo a mo tlogelago, gwa napa gwa batamela barongwa ba mo direla.
12Mohla Jesu a kwele gore Johane o golegilwe, o tlogile a ya Galilea. 13A khuduga Natsaretha, a tla a aga Kaperenaume motseng wa lewatleng, wa nageng ya Sebulone le Nafutali. 14Ya ba gona go phethega se se boletšwego ke Jesaya moporofeta e a itšego: 15Naga ya Sebulone, le naga ya Nafutali, tseleng ya lewatle, mošola wa Jorodane, Galilea ditšhabeng, 16Setšhaba se se dutšego fsifsing se bona seetša se segolo; mme ba ba dutšego nageng le moriting wa lehu, ba hlabelwa ke seetša se segolo.
17Ke lona lebaka le Jesu a thomilego ka lona go goelela a re: Sokologang, gobane mmušo wa magodimo o batametše.
18Ya re ge a šika le lewatle la Galilea, a bona banna ba babedi, barwa ba motho o tee; e be e le Simeone e a reetšwego la Petro, a na le Andrea ngwanabo; ba be ba rea malokwa a bona lewatleng, gobane e be e le barei ba dihlapi. 19A bolela le bona a re: Ntateleng, ke le dire barei ba go phutha batho. 20Ke mo bona ba napilego ba tlogela malokwa a bona, ba mo latela.
21Ge a tloga moo, a bona ba babedi ba bangwe, barwa ba motho o tee; e be e le Jakobo morwa wa Tsebedeo, le Johane ngwanabo. Ba be ba dutše leselawatleng la Tsebedeo tatabo, ba hunaganya malokwa a bona; mme a ba bitša. 22Bona ba napa ba tlogela leselawatle la tatabo, mme ba mo latela.
23Bjale Jesu a sepela le naga ya Galilea ka moka, a fela a ruta diphuthegong tša bona, a tsebatša Ebangedi ya mmušo wa magodimong, a fodiša malwetši ka moka le mefokolo ka moka mo bathong. 24Mme tumo ya gagwe ya enela naga ya Siria ka moka, batho ba tliša bohle ba ba babjago ke malwetši a mehutahuta, le ba ba swerwego ke mahloko le ba meoya e mebe, le magafa a ngwedi, le ba ba rephilego ditho; ba ba tliša go Yena, mme a ba fodiša. 25A tšama a latelwa ke mašaba a mantši a ba Galilea le Dekapoli le Jerusalema, le ba naga ya Juda, le ba mošola wa noka ya Jorodane.
