LUKA 21

₁Ya re ge a lebelela a bona bahumi ge ba tšhela dineo tša bona polokelong ya Ntlokgethwa. ₂A bona mosadi wa mohlologadi e a humanegilego a tšhela ditšheletiana tše pedi. ₃A bolela a re: Ruri, ke a le botša mohlologadi yo wa modiitšana o tšhetše se se fetišago sa ba bangwe ka moka. ₄Gobane bao ka moka ba ba tšhetšego moo go yago dineo, ba di ntšhitše go tše di ba tlaletšego; mme yena o ntšhitše bohumaneging bja gagwe, a tšhela tšohle tše a bego a tlo phela ka tšona.

₅Ba bangwe ge ba bolela Ntlokgethwa ba re e thakgilwe ka mabje le ka matsaka. ₆Yena a re: Ge e le tšeo le di bogelago, go etla matšatši ao go ka se kego gwa šadišwa lebje le sa hlatlagane le le lengwe, le sa ka la šuthišwa.

₇Ba mmotšiša ba re: Moruti, ke tša go tlo direga neng? Gomme re tlo bona kang ge di šetše di tlo tšwelela?

₈A re: Le bone gore le se forwe; gobane ba bantši ba tlo tla ka leina la ka ba re: Ke nna! Ba re: Lebaka le batametše! Le se ke la tšeetšana le bona. ₉Mohla le kwago dintwa le meferefere, le se ke la tšhoga; gobane tšeo di swanetše go ba gona pele; bofelo bo tlo ba bo se kgauswi le go tla.

₁₀A ba botša a re: Setšhaba se tlo tsogela setšhaba; mmušo o tlo tsogela mmušo. ₁₁Go tlo ba le ditšhišinyego tše kgolo kua le kua, le ditlala le dinkhu, le tše di tšhošago, le matete a magolo e legodimo. ₁₂Fela, ba tlo ba ba thomile go le iša matsogo, ba le tlaiša; ba tlo le sekiša diphuthegong tša bona, ba le iša kgolegong, la gogelwa pele ga dikgoši le babuši, ka baka la leina la ka. ₁₃Fela, tšeo di tlo le diregela gore le bee bohlatse. ₁₄Ke gona, felang le tseba tšeo, gore le se ke la belaela la re re tlo iphetolela bjang. ₁₅Gobane ke nna ke tlogo le nea molomo le bohlale, bjo bahloi ba lena ka moka ba tlogo šitwa go bo fenya le go bo phema. ₁₆Le gona le tlo lahlwa ke batswadi le bana ba bolena, le metswalo le bagwera, mme ba tlo bolaya ba bangwe ba lena. ₁₇Le tlo ba ba ba hloilwego ke bohle ka baka la leina la ka. ₁₈Fela, le thabe e tee ya moriri wa hlogo tša lena e ka se ke ya timela. ₁₉Mme bophelo bja lena le tlo bo rua ka kgotlelelo.

₂₀E re ge le bona motse wa Jerusalema o dikilwe ke makoko a madira, gona le tsebe gore go batametše go phušolwa ga wona. ₂₁Mehleng yeo ba ba lego nageng ya Juda ba tšhabele dithabeng; ba ba lego mo motseng ba ngwege; ba dinakaneng ba se ke ba ya motseng. ₂₂Gobane matšatši ao e tlo ba a tefetšo, gore go tšwelele tšohle tše di ngwadilwego. ₂₃Ba madimabe mehleng yeo e tlo ba baima le ba ba amušago; gobane tlalelo e tlo ba e kgolo lefaseng e tlo ba kotlo e bogale e welago setšhaba se. ₂₄Ba tlo fela ka bogale bja marumo; ba išwa bothopša ditšhabeng ka moka; mme Jerusalema o tlo gatakelwa ke bantle, go be go phethege mabaka a bantle.

₂₅Go tlo ba le matete letšatšing le kgweding le dinaleding; mme lefaseng go tlo ba le tlalelo ditšhabeng. Di tlo gakanega ge lewatle le duma, mafula a lona a tsogile. ₂₆Batho ba tlo nolega moko ka poifo le ka go dula ba re lefase le sa tlo welwa ke eng? Gobane le maatla a legodimo a tlo šišinyega. ₂₇Ke moo ba tlogo bona Morwamotho a etla ka leru le ka maatla le ka letago le legolo. ₂₈E re ge tšeo di thoma go direga, le inamologe, le tsoše dihlogo tša lena, ka gobane go tlo ba go batamela topollo ya lena.

₂₉A ba botša seswantšho a re: Bonang mogo le dihlare ka moka. ₃₀Ge le bona di hlogile le ye le tsebe ka noši gore lehlabula le batametše. ₃₁Dirang bjalo le tabeng ye; ge le bona dilo tšeo di direga, le tsebe gore mmušo wa Modimo o batametše.

₃₂Ruri, ke a le botša, di tlo direga tšohle moloko wo o sešo wa fela. ₃₃Legodimo le lefase di tlo feta; gomme dipolelo tša ka di ka se ke tša feta.

₃₄Fela, le itote gore dipelo tša lena di se ke tša imelwa ke bohori le go boiwa, le dipelaelo tša bophelo bjono, mme letšatši leo la tlo le wela sehlogo. ₃₅Gobane le tlo etša sefu ge le wela ba ba dutšego lefaseng mo go fela. ₃₆Phakgamang gee le fele le rapela ka mabaka ohle, gore le hwetšwe le loketše go phonyokga tšeo ka moka di tlogo direga, le go tlo ema pele ga Morwamotho.

₃₇Ge e le mosegare o be a fela a ruta Ntlongkgethwa; mme bošego a tloge a ye go dula thabeng ye ba rego ke ya Mehlware. ₃₈Gomme batho ka moka ba be ba tsogela Ntlongkgethwa, ba tla go yena e sa le bosasa ba rata go mo kwa.