LUKA 17

₁A bolela le barutiwa ba gagwe a re: Dikgopišo, go tla ga tšona ga go dibege; fela yo madmabe ke eo di tlago ka yena. ₂Go kaone ge lwala la go šila le ka tlemelwa molaleng wa motho eo, mme a tekesetšwa lewatleng, gore a a se kgopiše e mongwe wa banyane ba. ₃Itoteng.

Ge ngwaneno a go senyetša, mo sole; gomme ge a sokologa o mo lebalele. ₄Le ge a ka go senyetša gašupa ka letšatši, mme a boela go wene gašupa, a re: Ke sokologile! O mo lebalele.

₅Baapostola ba kile ba kgopela Morena ba re: Re ekeletše tumelo.

₆Morena a re: Ge le na le tumelo e kakago thorwana ya lehloko, le ka bolela le sehlare se sa mogo la re: Tomoga, o yo itlhoma lewatleng, mme se tlo le kwa.

₇Ke mang mo go lena e a nago le mohlanka, e ka ba e a lemago goba e a dišago, yo e rego ge a sa boa nageng, a kago mmotša a re: Tlaa ka pele, o dule dijong? ₈A a ka se mo laele a re: Lokiša se ke tlogo lalela ka sona, o gare dikobo, o ntsholele ke je ke nwe, e be gona o tlogo ja wa nwa le wena? ₉Bjale ge mohlanka eo a dirile tše a di laetšwego, a o tlo mo leboga? Nna ke re aowa. ₁₀Le lena, a e re ge le dirile tšohle tše le di laetšwego, le tle le re: Ga re bahlanka ba selo; re filo dira tše re swanetšego go di dira.

₁₁Ya re ge a eya Jerusalema, a phatša naga ya Samaria le ya Galilea. ₁₂Ge a tsena motsaneng o mongwe a gahlana le banna ba lesome ba lephera ba eme kgole, ₁₃ba hlaboša lentšu ba re: Jesu Morena, re gaugele!

₁₄Jesu ge a ba bona, a ba laela a re: Sepelang le ipontšhe go baperisita!

Ya re ge ba sa ya, ba fola. ₁₅E mongwe ge a bona a fodile, a boa a tumiša Modimo ka lentšu le legolo. ₁₆A tla a wela fase ka sefahlogo maotong a Jesu, a mo leboga. Gomme yena e be e le Mosamaria. ₁₇Jesu a fetola a re: A ga go a fodišwa ba lesome? Ba senyane ba kae? ₁₈A go hlokegile ba ba boago ba tla ba reta Modimo, ge e se motho e e lego wa mohuta o šele? ₁₉A bolela le motho eo a re: Tsoga o sepele. Tumelo ya gago e go phološitše.

₂₀Mohla a botšišwa ke bafarisei, ge ba re mmušo wa Modimo o tlo tla neng, a fetola a re: Mmušo wa Modimo ga o tle ka tše di bonwago. ₂₁Go ka se ke gwa thwe: Bona, šo, goba; Bona, šola! Tsebang gobane mmušo wa Modimo o ka mo teng ga lena.

₂₂A bolela le barutiwa ba gagwe a re: Go tlo tla matšatši a le tlogo lla go bona le tee la matšatši a Morwamotho; gomme le ka se ke la le bona. ₂₃Ba tlo le botša ba re: Bonang šo, goba: Bonang šola -- Se yeng. Se ba lateleng. ₂₄Gobane Morwamotho ka letšatši la gagwe o tlo etša legadima ge le gadima le etšwa thoko yeno ya legodimo, la ediša gohle go fihla thoko yela ya legodimo. ₂₅Fela, Morwamotho sa gagwe ke gore a thome go tlaišwa ka tše ntši, le go lahlwa ke moloko wo. ₂₆Matšatšing a Morwamotho go tlo dirwa tše di dirilwego mehleng ya Noage. ₂₇Ba be ba eja ba enwa, ba nyala ba nyadišwa, gwa ba gwa tla letšatši leo Noage a tsenego polokelong ka lona, mme meetsefula a tla a ba fediša bohle. ₂₈Ke tšona tše di dirilwego mehleng ya Loto. Ba be ba eja ba enwa, ba reka ba rekisa, ba bjala, ba aga, ₂₉Gomme ka tšatši leo Loto a tšwilego Sodoma, gwa na mollo le tshebela di etšwa legodimong, tša ba fetša ka moka. ₃₀Le ka tšatši le Morwamotho a tlogo utologa ka lona, go tlo ba bjalo.

₃₁Mohla woo e a lego seokamong sa ngwako, thoto tša gagwe di le ka ngwakong, a se ke a fologa a yo di tšea; le e a lego nageng, a se ke a boela gae. ₃₂Gopolang mosadi wa Loto. ₃₃E a tlogo re a ipolokele bophelo, o tlo bo timetša; gomme e a bo timetšago, o tlo iphediša. ₃₄Ke a le botša, ka bjona bošego bjoo ba babedi ba tlo ba bolaong bo tee, e mongwe a tlo amogelwa, e mongwe a tlogelwa. ₃₅Ba babedi ba tlo ba ba šila gammogo, e mongwe a tlo amogelwa e mongwe a tlogelwa. ₃₆Ba babedi ba tlo ba ba le tšhemong, e mongwe a tlo amogelwa e mongwe a tlogelwa.

₃₇Ba mmotšiša ba re: Morena ke tša kae?

Yena a re: Mo go nago le setoto, ke mo go welago manong.