LUKA 13

₁Mehleng yeo gwa rotoga ba bangwe ba botša Jesu taba ya Bagalilea, bao Pilato a hlakantšego madi a bona le didimo tša bona. ₂Jesu a fetola a re: A le re Bagalilea bao, ge ba wetšwe ke bohloko bjo bokaakaa, e be e le badiradibe ba ba fetišago Bagalilea bohle? ₃Nna ke re ga go bjalo; gomme ge le sa sokologe, le tlo fedišwa ka moka ka mokgwa woo. ₄Le bala ba lesome le metšo e seswai ba go welwa ke morako wa Siloa wa ba bolaya, a le re ba be ba na le molato o fetago wa bohle ba ba agilego Jerusalema? ₅Nna ke re ga go bjalo; gomme ge le sa sokologe, le tlo fedišwa ka moka ka mokgwa woo.

₆A ba botša seswantšho a re: Motho e mongwe o be a na le mohlare wa gagwe wa mogo wo o medilego tšhemong ya gagwe ya merara; a tla a nyaka dienywa go wona, a di hloka. ₇A bolela le molemi wa tšhemo a re: Bona, bjale ke nywaga e meraro ge ke fela ke etla ke nyaka dienywa tša mogo wo; gomme ga ke di hwetše. O o reme, o sa reng o diba tšhemo? ₈Molemi a fetola a re: Morena, o lese lenyaga, ke tle ke leme ke o dikologe, ke tšhele morole. ₉Mohlomongwe o ka bea dienywa. Ge o ka pala, ke mo o tlo go kgona o o rema.

₁₀Ka la Sabatha o kile a ruta phuthegong e nngwe. ₁₁Gonamoo go be go na le mosadi e a feditšego nywaga e lesome le metšo e seswai a na le moya wa bolwetši. O be a hunagane, a šitwa go inamologa le ganyane. ₁₂Jesu ge a mmona, a mmitša a tla; a bolela le yena a re: Mosadi, o hunolotšwe bolwetšing bjoo bja gago. ₁₃A mmea diatla; mosadi a otlologa e sa le semetseng, a reta Modimo.

₁₄Mogolo wa phuthego a mmefela ge Jesu a fodišitše motho ka la Sabatha, a bolela le lešaba a re: Matšatši a go dira mediro ke a selelago. Tlang ka onaao le fodišwe: Le lese go tla ka Sabatha.

₁₅Gwa fetola Morena a re: O moikaketši. Ka moka ga lena a ga le tlemolle kgomo le pokolo mo magopong ka la Sabatha, la di iša mo di nwago? ₁₆Bjale motho e e lego ngwana wa Aborahama, e a feditšego nywaga e lesome le metšo e seswai a tlemilwe ke Sathane, a ka leswa bjang go hunollwa ditlemo ka tšatši la Sabatha? ₁₇Ge a realo a ba leša dihlong ka moka ba bego ba ganana nae: batho bona ba thabela mediro ye e bego e retwa e dirwa ke yena.

₁₈Jesu a re: Mmušo wa Modimo o swana le eng? Ke tlo o swantšha le eng? ₁₉O swana le thorwana ya lehloko, ye motho a e tšeago a e bjala serapeng sa gagwe, ya mela ya ba sehlare se segolo; mme dinonyana tša sebakeng tša tla, tša aga dihlaga makaleng a sona.

₂₀A buša a re: Mmušo wa Modimo ke tlo o swantšha le eng? ₂₁O swana le komelo ye mosadi a e tšerego, a e tswakanya le bupi bja diroto tše tharo, bja tla bja omelega ka moka.

₂₂Gomme a thetha le metse le metsana a fela a ruta, mme a šikela Jerusalema. ₂₃E mongwe a mmotšiša a re: Morena, a ke ba bakae fela ba ba tlo go phološwa?

Jesu a fetola a re: ₂₄Katanang gore le tsene ka mojako o pitlaganego; gobane ke a le botša, ba bantši ba tlo leka go tsena ba šitwa. ₂₅Mohla mong wa ngwako a šetše a tsogile a tswalela mojako, ke mo le tlo ema ntle, la re: Morena! Morena! Re bulele! A tlo fetola a re: Ga ke le tsebe mo le tšwago. ₂₆Ke mo le tlo go thoma go re: Re kile ra ja ga gago! O rutile dikgorong tša rena! ₂₇Mong wa ngwako o tlo re: Ke le boditše, ga ke le tsebe mo le tšwago. Ntlogeleng lena bohle badiri ba bokgopo. ₂₈Ke mo go tlo go tsoga dillo le ditsikitlano tša meno, ge le tlo bona Aborahama le Isaka le Jakobo le baporofeta ka moka ba le mmušong wa Modimo, mme lena le kgoromeletšwa ntle. ₂₉Ba Bohlabela le ba Bodikela, ba Leboa le ba Borwa, ba tlo tla ba dula dijong mmušong wa Modimo. ₃₀Tsebang, go na le ba morago ba e tlo go ba ba pele; go na le ba pele ba e tlo go ba ba morago.

₃₁Ka lona lebaka leo gwa tla ba bangwe ba bafarisei ba mo sebela ba re: Tloga mo, o ye mo gongwe; gobane Herode o nyaka go go bolaya. ₃₂Jesu a re: Sepelang le yo botša phukubye yeo, le re: Tseba gore ke leleka meoya e mebe, ke fodiša batho lehono le bosasa; ka moso ke yo feleletša. ₃₃Se Nna ke lebanego naso ke go sepela lehono le bosasa le ka moso; ka gobane sa moporofeta ke go bolaelwa motseng wa Jerusalema e sego mo gongwe.

₃₄Hee Jerusalema! Hee Jerusalema, wena o bolayago baporofeta! O thumago ka mafsika ba ba romilwego go wene! Ke gantši ke ratile go phuthela bana bago bjalo ka nonyana ge e apeša bana ba yona ka diphego; mme la gana. ₃₅Le tlo di bona; ngwako wa lena o tlo le tlogelelwa e le lešope. Ke a le botša, le ka se hlwe le mpona, gwa tlo ba gwa tla lebaka la ge le tlo re: A go šegofatšwe e a tlago ka Leina la Morena.